ທ່ານສີຈິ້ນຜິງກ່າວຄຳປາໄສອັນສຳຄັນໃນກອງປະຊຸມສົນທະນາບຸກຄົນນອກພັກຄອມມູນິດ

ວັນທີ 21 ກໍລະກົດນີ້, ຄະນະກຳມະການສູນກາງພັກຄອມມູນິດຈີນໄດ້ຈັດກອງປະຊຸມສົນທະນາບຸກຄົນນອກພັກຄອມມູນິດຢູ່ສຳນັກງານຈົ່ງນານໄຫທີ່ນະຄອນຫຼວງປັກກິ່ງ, ໂດຍໄດ້ຮັບຟັງຄວາມເຫັນ ແລະ ຂໍ້ສະເໜີກ່ຽວກັບສະພາບເສດຖະກິດໃນປັດຈຸບັນ ແລະ ວຽກງານເສດຖະກິດໃນ 6 ເດືອນທ້າຍປີນີ້ຂອງຄະນະກຳມະການສູນກາງພັກຝ່າຍປະຊາທິປະໄຕຕ່າງໆ, ຜູ້ຮັບຜິດຊອບສະຫະພັນອຸດສາຫາກຳການຄ້າທົ່ວປະເທດ ແລະ ຜູ້ຕາງໜ້າບຸກຄົນບໍ່ຂຶ້ນກັບພັກຝ່າຍໃດ. ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນໄດ້ເປັນປະທານ ກອງປະຊຸມດັ່ງກ່າວ ແລະ ກ່າວຄຳປາໄສອັນສຳຄັນ, ໂດຍກ່າວເນັ້ນໜັກວ່າ: ການດຳເນີນວຽກງານເສດຖະກິດໃນ 6 ເດືອນທ້າຍປີນີ້ໃຫ້ດີ, ຕ້ອງຍຶດໝັ້ນຫຼັກການລວມທີ່ສະແຫວງຫາການເຕີບໂຕບົນພື້ນຖານຄວາມໝັ້ນທ່ຽງ, ຈັດຕັ້ງປະຕິບັດແນວຄວາມຄິດການພັດທະນາອັນໃໝ່ຢ່າງຄົບຖ້ວນ, ຖືກຕ້ອງ ແລະ ຮອບດ້ານ, ເລັ່ງລັດການສ້າງສະພາບການພັດທະນາອັນໃໝ່, ລົງເລິກການປະຕິຮູບ ແລະ ເປີດປະຕູສູ່ພາຍນອກຢ່າງຮອບດ້ານ, ເພີ່ມທະວີການດັດສົມ ແລະ ການຄວບຄຸມດ້ານນະໂຍບາຍມະຫາພາກ, ສຸມໃສ່ການເປີດກວ້າງຄວາມຮຽກຮ້ອງຕ້ອງການພາຍໃນ, ເພີ່ມທະວີຄວາມໝັ້ນໃຈ ແລະ ປ້ອງກັນຄວາມສ່ຽງ, ຊຸກຍູ້ໃຫ້ເສດຖະກິດບັນລຸການຍົກສູງຄຸນນະພາບຢ່າງບັງເກີດຜົນ ແລະມີການເຕີບໂຕທີ່ສົມເຫດສົມຜົນ.