ທ່ານສີຈິ້ນຜິງຕ້ອນຮັບການເຂົ້າຢ້ຽມຄຳນັບຂອງນາຍົກລັດຖະມົນຕີບັງກະລາເດັດ

ຕອນບ່າຍວັນທີ 23 ສິງຫານີ້ຕາມເວລາທ້ອງຖິ່ນ, ໃນໄລຍະເຂົ້າຮ່ວມການພົບປະລະຫວ່າງຜູ້ນຳອົງການປະເທດບຣິກສຢູ່ນະຄອນໂຈຮານເນັສເບີກຂອງອາຟຣິກາໃຕ້, ທ່ານສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານນາງ ເຊັກ ຮາຊິນາ ນາຍົກລັດຖະມົນຕີບັງກະລາເດັດ.

ທ່ານສີຈິ້ນຜິງກ່າວເນັ້ນວ່າ, ຈີນສະໜັບສະໜູນບັງກະລາເດັດປົກປັກຮັກສາອະທິປະໄຕ ເອກະລາດ ແລະ ຜືນແຜ່ນດິນອັນຄົບຖ້ວນຂອງຊາດ, ຄັດຄ້ານການແຊກແຊງຈາກພາຍນອກ, ປົກປັກຮັກສາຄວາມສາມັກຄີ ແລະ ຄວາມໝັ້ນຄົງພາຍໃນປະເທດ, ບັນລຸການພັດທະນາໃຫ້ຈະເລີນຮຸ່ງເຮືອງ, ຍິນດີຮ່ວມກັບບັງກະລາເດັດສືບຕໍ່ສະໜັບສະໜູນເຊິ່ງກັນ ແລະ ກັນຢ່າງເດັດດ່ຽວໃນບັນຫາທີ່ພົວພັນເຖິງຜົນປະໂຫຍດແກນກາງຂອງກັນ ແລະ ກັນ. ສອງຝ່າຍຄວນເພີ່ມທະວີການແລກປ່ຽນດ້ານຍຸດທະສາດ, ຮັດແໜ້ນການໄປມາຫາສູ່ກັນລະຫວ່າງພາກສ່ວນຕ່າງໆ ແລະ ລະດັບຕ່າງໆ. ຄວນຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ດ້ວຍຄຸນນະພາບສູງ, ເສີມຂະຫຍາຍທ່າແຮງແບບຊ່ວຍຊູຍູ້ໜູນກັນດ້ານເສດຖະກິດຂອງສອງປະເທດຢ່າງເຕັມສ່ວນ, ເພີ່ມທະວີການຮ່ວມມືໃນຂົງເຂດພື້ນຖານໂຄງລ່າງ, ເຕັກໂນໂລຊີຂໍ້ມູນຂ່າວສານ, ພະລັງງານໃໝ່, ກະສິກຳ ແລະອື່ນໆ, ເພີ່ມທະວີການໄປມາຫາສູ່ກັນດ້ານບຸຄະລາກອນ, ລົງເລິກການແລກປ່ຽນດ້ານວັດທະນະທຳ.

ທ່ານນາງຮາຊິນາກ່າວວ່າ, ບັງກະລາເດັດປະຕິບັດນະໂຍບາຍຈີນດຽວຢ່າງເດັດດ່ຽວ, ຊົມເຊີຍຈີນທີ່ເສີມຂະຫຍາຍບົດບາດອັນສຳຄັນເຂົ້າໃນການຊຸກຍູ້ສັນຕິພາບ ແລະ ສະຖຽນລະພາບຂອງພາກພື້ນ. ບັງກະລາເດັດຍິນດີຮ່ວມກັບຝ່າຍຈີນລົງເລິກສາຍພົວພັນສອງຝ່າຍ, ເພີ່ມທະວີການຮ່ວມມືພາຍໃຕ້ກົນໄກຫຼາຍຝ່າຍ ເຊິ່ງລວມທັງອົງການບຣິກສ, ເຊື່ອໝັ້ນວ່າການເຕີບໃຫຍ່ຂະຫຍາຍຕົວຂອງກົນໄກບຣິກສຈະນຳເອົາໂອກາດ້ານການພັດທະນາອັນໃໝ່ມາໃຫ້ແກ່ປະເທດພວມພັດທະນາ.