ຂ່າວສານຢຸນນານ·ຈີນ| ແນວຄວາມຄິດກ່ຽວກັບການສ້າງປະຊາຄົມຮ່ວມຊາຕາກໍາຂອງມວນມະນຸດ ຊີ້ແຈງທິດທາງໃຫ້ແກ່ການແກ້ໄຂບັນຫາລັກສະນະທົ່ວໂລກ
ທ່ານ Pierre Laurent ປະທານຄະນະກໍາມະການທົ່ວປະເທດຂອງພັກກອມມູນິດຝຣັ່ງກ່າວໃນເວລາໃຫ້ສໍາພາດຕໍ່ນັກຂ່າວຫວ່າງມໍ່ໆມານີ້ວ່າ: “ຕາມເສັ້ນທາງແຫ່ງການສ້າງຄວາມຮັ່ງມີຮ່ວມກັນນັ້ນ, ຈະບໍ່ໃຫ້ຂາດຜູ້ໃດຜູ້ໜຶ່ງ. ນີ້ແມ່ນພຶດຕິກໍາຕົວຈິງແຫ່ງແນວຄວາມຄິດການພັດທະນາທີ່ຖືປະຊາຊົນເປັນໃຈກາງຂອງພັກກອມມູນິດຈີນ, ຊຶ່ງສະແດງໃຫ້ເຫັນເຖິງຄວາມກ້າຫານ ແລະ ຄວາມຕັດສິນໃຈອັນໝັ້ນແກ່ນ.”
ໃນສາຍຕາຂອງທ່ານ Laurent ນັ້ນ, ພັກກອມມູນິດຈີນໄດ້ຍຶດໝັ້ນການສະແຫວງຫາສັດຈະຈາກສະພາບຄວາມເປັນຈິງ ແລະ ເດີນທາງກ້າວໄປໜ້າພ້ອມກັບຍຸກສະໄໝຢ່າງສະເໝີຕົ້ນສະເໝີປາຍ ຊຶ່ງໄດ້ຄົ້ນພົບເສັ້ນທາງແຫ່ງການພັດທະນາທີ່ສອດຄ່ອງກັບສະພາບຕົວຈິງຂອງຈີນ. “ພັກກອມມູນິດຈີນໄດ້ນໍາພາປະຊາຊົນຈີນກ້າວເດີນໄປໜ້າຢ່າງບໍ່ຢຸດຢັ້ງ, ພາຍຫຼັງບັນລຸເປົ້າໝາຍສູ້ຊົນຮອບຮ້ອຍປີປະການທີໜຶ່ງແລ້ວ, ກໍໄດ້ມຸ່ງໜ້າໄປສູ່ເປົ້າໝາຍສູ້ຊົນຮອບຮ້ອຍປີປະການທີສອງອີກ, ແລະ ກ້າວເຂົ້າສູ່ໄລຍະການພັດທະນາໃໝ່ແລ້ວ.” ທ່ານ Laurent ກ່າວຕື່ມວ່າ, ພັກກອມມູນິດຈີນຕັ້ງໃຈວິເຄາະທີ່ຕັ້ງປະຫວັດສາດ ແລະ ໄລຍະການພັດທະນາຂອງຈີນໃນປັດຈຸບັນ, ປັບປຸງທິດທາງນະໂຍບາຍເລື້ອຍໆ, ແລະ ນໍາພາປະເທດຈີນບັນລຸ
ການພັດທະນາຢ່າງໜັກແໜ້ນ.
ພັກກອມມູນິດຈີນບໍ່ພຽງແຕ່ສຸມໃສ່ການພັດທະນາຄວາມກ້າວໜ້າຂອງຕົນເທົ່ານັ້ນ, ຫາກຍັງໄດ້ເອົາໃຈໃສ່ອະນາຄົດ ແລະ ຊາຕາກໍາຂອງມວນມະນຸດດ້ວຍສາຍຕາໂລກຢ່າງສະເໝີຕົ້ນສະເໝີປາຍອີກດ້ວຍ. ທ່ານ Laurent ກ່າວວ່າ: “ປັດຈຸບັນນີ້, ຫຼາຍບັນຫາທີ່ບັນດາປະເທດປະເຊີນໜ້ານັ້ນສ່ວນຫຼາຍເປັນບັນຫາລັກສະນະທົ່ວໂລກ, ຄວາມຈິງທີ່ນັບມື້ນັບຫຼາຍໄດ້ບົ່ງບອກພວກເຮົາວ່າ, ບໍ່ມີປະເທດໃດເປັນເກາະດອນທີ່ໂດດດ່ຽວ, ທຸກໆປະເທດກໍາລັງກາຍເປັນປະຊາຄົມດຽວກັນ ທີ່ມີຜົນປະໂຫຍດພົວພັນກັນຢ່າງແໜ້ນແຟ້ນເປັນກ້າວໆ. ພວກເຮົາຄວນສາມັກຄີຮ່ວມມືກັນ ເພື່ອຮັບມືກັບສິ່ງທ້າທາຍລັກສະນະທົ່ວໂລກ.ແນວຄວາມຄິດກ່ຽວກັບການສ້າງປະຊາຄົມຮ່ວມຊາຕາກໍາຂອງມວນມະນຸດທີ່ປະເທດຈີນໄດ້ນໍາສະເໜີນັ້ນ ໄດ້ຊີ້ແຈງທິດທາງໃຫ້ແກ່ການແກ້ໄຂສິ່ງທ້າທາຍ ແລະ ບັນຫາລັກສະນະທົ່ວໂລກ.”
ຂ່າວ: “ໜັງສືພິມປະຊາຊົນລາຍວັນ”ຂອງຈີນ