ຂ່າວສານຢຸນນານ·ຈີນ| “ເພີ່ມແຮງຂັບເຄື່ອນທີ່ສໍາຄັນເຂົ້າໃນການພັດທະນາແບບຍືນຍົງຂອງໂລກ”
ທ່ານ ອັບດຸນຈາບໍ ອາຊີຊີ (Abduljabor Azizi) ຮອງປະທານຜູ້ທີໜຶ່ງຂອງພັກປະຊາທິປະໄຕປະຊາຊົນ ຕາຈີກີສຖານ ກ່າວໃນເວລາໃຫ້ສໍາພາດກັບນັກຂ່າວຂອງໜັງສືພິມປະຊາຊົນລາຍວັນຂອງຈີນວ່າ: “ພັກກອມມູນິດຈີນໄດ້ຍຶດໝັ້ນແນວຄິດການພັດທະນາທີ່ຖືເອົາປະຊາຊົນເປັນໃຈກາງຢ່າງສະເໝີຕົ້ນສະເໝີປາຍ, ຕອບສະໜອງຄວາມຕ້ອງການຂອງປະຊາຊົນທີ່ມີຕໍ່ຊີວິດການເປັນຢູ່ທີ່ດີງາມຢ່າງບໍ່ຢຸດຢັ້ງ, ແລະໄດ້ພະຍາຍາມຢ່າງບໍ່ລົດລະໃນການເພີ່ມຄວາມຜາສຸກໃຫ້ແກ່ປະຊາຊົນ.”
ທ່ານ ອາຊີຊີ ເຄີຍໄດ້ໄປຢ້ຽມຢາມຈີນຫຼາຍຄັ້ງ ແລະ ການຢ້ຽມຢາມທຸກຄັ້ງລ້ວນແຕ່ມີຄວາມປະທັບໃຈຢ່າງເລິກເຊິ່ງ. ຕາມຄວາມເຫັນຂອງທ່ານແລ້ວ, ເຄັດລັບແຫ່ງການພັດທະນາເສດຖະກິດສັງຄົມຢ່າງວ່ອງໄວຂອງຈີນແມ່ນຂຶ້ນກັບການຍຶດໝັ້ນການນຳພາຂອງພັກກອມມູນິດຈີນຢ່າງສະເໝີຕົ້ນສະເໝີປາຍ. “ສາຍເຫດຫຼັກໆທີ່ເຮັດໃຫ້ພາລະກິດຕ່າງໆຂອງຈີນສາມາດປະສົບຜົນສຳເລັດໄດ້ນັ້ນ, ກໍຍ້ອນວ່າພາຍໃຕ້ການນຳພາອັນເຂັ້ມແຂງຂອງພັກກອມມູນິດຈີນ, ຈີນໄດ້ເລືອກເອົາເສັ້ນທາງພັດທະນາທີ່ຖືກຕ້ອງ,ໄດ້ຮັບການສະໜັບສະໜູນ ແລະ ຄໍ້າຊູຊ່ວຍເຫຼືອຢ່າງກວ້າງຂວາງຈາກປະຊາຊົນ.”
ຈີນໄດ້ເອົາຊະນະໃນບັ້ນຫຼຸດພົ້ນອອກຈາກຄວາມທຸກຍາກ ແລະ ໄດ້ບັນລຸເປົ້າໝາຍຫຼຸດຜ່ອນຄວາມທຸກຍາກຂອງວາລະການພັດທະນາແບບຍືນຍົງປີ 2030 ຂອງອົງການສະຫະປະຊາຊາດ ກ່ອນເວລາກຳນົດ 10 ປີ. “ນີ້ແມ່ນໝາກຜົນທີ່ບໍ່ທໍາມະດາ ຊຶ່ງງເປັນການສະແດງໃຫ້ເຫັນຢ່າງແຈ່ມແຈ້ງວ່າ: ພັກກອມມູນິດຈີນເປັນພັກທີ່ສະແຫວງຫາຄວາມຜາສຸກໃຫ້ກັບປະຊາຊົນຢ່າງແທ້ຈິງ.” ທ່ານອາຊີຊີກ່າວຕື່ມອີກວ່າ, ຈີນຕັ້ງໜ້າແບ່ງປັນປະສົບການຂອງການຫຼຸດຜ່ອນຄວາມທຸກຍາກໃຫ້ກັບປະຊາຄົມໂລກ, ເພີ່ມທະວີການຮ່ວມມືໃນການຫຼຸດຜ່ອນຄວາມທຸກຍາກ, ໄດ້ປະກອບສ່ວນອັນສຳຄັນເຂົ້າໃນພາລະກິດການຫຼຸດຜ່ອນຄວາມທຸກຍາກຂອງໂລກ, ການພັດທະນາ ແລະ ຄວາມກ້າວໜ້າຂອງມວນມະນຸດ. ທ່ານເຫັນວ່າ, ໃນຂະນະທີ່ສຸມໃສ່ການພັດທະນາຂອງຕົນນັ້ນ, ຈີນຍັງໄດ້ຕັ້ງໜ້າຊຸກຍູ້ການພັດທະນາຮ່ວມຂອງປະເທດຕ່າງໆໃນໂລກ, ພ້ອມທັງໄດ້ເພີ່ມແຮງຂັບເຄື່ອນທີ່ສໍາຄັນເຂົ້າໃນການພັດທະນາແບບຍືນຍົງຂອງໂລກ.
ຂ່າວ: ໜັງສືພິມປະຊາຊົນລາຍວັນຂອງຈີນ