ຂ່າວສານຢຸນນານ·ຈີນ| ຄວາມທັນສະໄໝແບບຈີນ ສ້າງໂອກາດການຮ່ວມມືໃຫ້ແກ່ໂລກ
ຈະເບິ່ງຄວາມທັນສະໄໝແບບຈີນວ່າ ຈະສົ່ງຜົນສະທ້ອນຕໍ່ໂລກແນວໃດນັ້ນ, ແມ່ນຫົວຂໍ້ສໍາຄັນທີ່ທົ່ວໂລກເອົາໃຈໃສ່ໃນປັດຈຸບັນນີ້. ໂດຍເບິ່ງຈາກມູມມອງທາງປະຫວັດສາດແລ້ວ, ເສັ້ນທາງທີ່ປະເທດຈີນສະແຫວງຫາຄວາມທັນສະໄໝແມ່ນເຕັມໄປດ້ວຍຄວາມຫຍຸ້ງຍາກລໍາບາກ ແລະ ບໍ່ແມ່ນເລື່ອງງ່າຍເລີຍ. ນັບແຕ່ສະໄໝມໍ່ໆເປັນຕົ້ນມາ, ປະເທດຈີນເຄີຍປະສົບກັບຄວາມວຸ້ນວາຍ ແລະ ເກີດເສິກສົງຄາມ, ການພັດທະນາທາງດ້ານການເມືອງ, ເສດຖະກິດ ແລະ ສັງຄົມໄດ້ພົບພໍ້ກັບຄວາມຫຍຸ້ງຍາກລຳບາກຫຼາຍປະການ. ຊຶ່ງປະຫວັດສາດໃນໄລຍະນັ້ນ ໄດ້ສ້າງຜົນສະທ້ອນຢ່າງເລິກເຊິ່ງຕໍ່ການຄົ້ນຄິດ ແລະ ການຄົ້ນຫາຄວາມເປັນທັນສະໄໝຂອງປະເທດຈີນ.
ບໍ່ວ່າຈະແມ່ນການຫວນຄືນປະຫວັດສາດ, ຫຼືວ່າ ສັງເກດເບິ່ງໃນປັດຈຸບັນ, ກໍລ້ວນແຕ່ຮັບຮູ້ວ່າ, ການສະແຫວງຫາຄວາມທັນສະໄໝຂອງປະເທດຈີນ ກັບ ຄວາມພະຍາຍາມເຊື່ອມໂຍງເຂົ້າກັບເສດຖະກິດທົ່ວໂລກຂອງປະເທດຈີນນັ້ນ ລ້ວນແຕ່ແມ່ນສອງດ້ານທີ່ຊ່ວຍຊູຍູ້ໜູນກັນ. ປັດຈຸບັນນີ້, ບໍ່ວ່າຈະຢູ່ໃນຂົງເຂດການພັດທະນາອຸດສາຫະກຳການຜະລິດ, ການຄ້າສິນຄ້າ ແລະການຄ້າການບໍລິການ, ຫຼືວ່າ ຢູ່ໃນຂົງເຂດການຊຸກຍູ້ຄວາມກ້າວໜ້າທາງດ້ານເຕັກນິກວິທະຍາສາດ, ປະເທດຈີນລ້ວນແຕ່ພົວພັນຢ່າງແໜ້ນແຟ້ນກັບໂລກ.
ໃນຂົງເຂດການພັດທະນາສີຂຽວ, ປະເທດຈີນໄດ້ຈໍ່ຕົວຂຶ້ນຖືເປັນປະສົບການພິເສດຂອງຊາດຕົນ, ຊຶ່ງມີຄວາມໝາຍສໍາຄັນຕໍ່ການສ້າງສາຄວາມສີວິໄລທາງດ້ານນິເວດວິທະຍາທົ່ວໂລກ. ປະເທດຈີນເພີ່ມການລົງທຶນໃນຂົງເຂດພະລັງງານສີຂຽວຢ່າງຕໍ່ເນື່ອງ ຊຶ່ງມີຄວາມໝາຍສໍາຄັນຢ່າງຍິ່ງຕໍ່ການເພີ່ມທະວີຄວາມສາມາດໃນການຮັບມືກັບການປ່ຽນແປງຂອງດິນຟ້າອາກາດໃນທົ່ວໂລກ.
ເມື່ອສັງເກດຈາກຂະບວນການພັດທະນາທົ່ວໂລກແລ້ວເຫັນວ່າ, ຄຸນຄ່າຂອງແຜນການຮ່ວມມືຂອງປະເທດຈີນ, ບໍ່ພຽງແຕ່ສະແດງອອກຢູ່ໃນການຊຸກຍູ້ໂຄງການຮ່ວມມືຕົວຈິງຕ່າງໆເທົ່ານັ້ນ, ຫາກຍັງເປັນການສະໜອງທາງເລືອກໃໝ່ໃຫ້ແກ່ບັນດາປະເທດທີ່ພວມພັດທະນາ ທີ່ພະຍາຍາມປັບປຸງສະພາບເສດຖະກິດຂອງປະເທດຕົນໃຫ້ດີຂຶ້ນ ແລະ ຊຸກຍູ້ການສ້າງສາຄວາມທັນສະໄໝຂອງຕົນ.
(ຄັດຈ້ອນຈາກບົດຄວາມເດີມຂອງໜັງສືພິມປະຊາຊົນລາຍວັນຂອງຈີນ, ຂຽນໂດຍ: ສາດສະດາຈານ ຣານາ ມິດເທີ້ ຫົວໜ້າສູນປະເທດຈີນ ມະຫາວິທະຍາໄລອ໊ອກຟອດ ປະເທດອັງກິດ)