ຂ່າວສານຢຸນນານ·ຈີນ| ຄວາມທັນສະໄໝແບບຈີນເປັນບົດຮຽນທີ່ດີໃຫ້ກັບປະເທດພວມພັດທະນາອັນ ກວ້າງໃຫຍ່ໄພສານ
ທ່ານ ເດວິດ ມອນຢາເຢ ຫົວໜ້າສູນຄົ້ນຄວ້າ ອາຟຣິກາ-ຈີນ ຂອງມະຫາວິທະຍາໄລໂຈຮັນແນສເບີກ ຂອງອາຟຣິກາໃຕ້ ກ່າວເວລາໃຫ້ສໍາພາດຕໍ່ນັກຂ່າວຢູ່ໂຈຮັນແນສເບີກຫວ່າງມໍ່ໆມານີ້ວ່າ: “ວິໄສທັດໃໝ່ຂອງຄວາມທັນສະໄຫມແບບຈີນ ໄດ້ເປັນບົດຮຽນທີ່ດີ ແລະ ສ້າງໂອກາດການພັດທະນາ ໃຫ້ກັບການພັດທະນາຂອງປະເທດພວມພັດທະນາອັນກວ້າງໃຫຍ່ໄພສານ ຊຶ່ງລວມທັງບັນດາປະເທດໃນທະວີບອາຟຣິກາ.”
ໃນຖານະທີ່ເປັນຜູ້ຊ່ຽວຊານດ້ານການຄົ້ນຄວ້າສາຍພົວພັນ ຈີນ-ອາຟຣິກາ, ທ່ານມອນຢາເຢ ໃຫ້ຄວາມສົນໃຈຢ່າງໃກ້ຊິດຕໍ່ຄວາມທັນສະໄໝແບບຈີນ. ທ່ານເຫັນວ່າ, ຄວາມທັນສະໄໝແບບຈີນແມ່ນ “ການປະດິດສ້າງໃໝ່ຢ່າງໜຶ່ງໃນການພັດທະນາສັງຄົມມະນຸດ.” ການຄົ້ນຄວ້າ ແລະ ພຶດຕິກຳຕົວຈິງຂອງຄວາມທັນສະໄໝແບບຈີນສະແດງໃຫ້ເຫັນວ່າ, ຈີນໄດ້ເດີນໄປຕາມເສັ້ນທາງພັດທະນາທີ່ສອດຄ່ອງກັບປະຫວັດສາດ ແລະ ສະພາບແຫ່ງຊາດຂອງຕົນ.
ທ່ານ ມອນຢາເຢ ກ່າວຕື່ມວ່າ, ອາຟຣິກາ ກັບ ຈີນ ໄດ້ດຳເນີນການຮ່ວມມືຢ່າງກວ້າງຂວາງໂດຍຜ່ານຂໍ້ລິເລີ່ມ“ໜຶ່ງແລວ ໜຶ່ງເສັ້ນທາງ”. ໃນອະນາຄົດ, ໃນຂະບວນການທີ່ຈີນຊຸກຍູ້ຄວາມທັນສະໄໝແບບຈີນນັ້ນ, ຄາດວ່າ: ການລົງທຶນ ແລະ ການຄ້າລະຫວ່າງ ອາຟຣິກາ ກັບ ຈີນ ໂດຍຜ່ານຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຈະເພີ່ມຂຶ້ນຢ່າງຫຼວງຫຼາຍ. “ການຮ່ວມມື ລະຫວ່າງ ອາຟຣິກາ-ຈີນ ມີອະນາຄົດກວ້າງຂວາງ, ເນື້ອໃນ ແລະ ຮູບແບບການຮ່ວມມືນັບມື້ນັບອຸດົມສົມບູນຂຶ້ນ, ຫວັງຢ່າງຍິ່ງວ່າ ຜົນສໍາເລັດແຫ່ງການຮ່ວມມືຕົວຈິງລະຫວ່າງສອງຝ່າຍຈະສ້າງຜົນປະໂຫຍດໃຫ້ແກ່ປະຊາຊົນທັງສອງຝ່າຍຫຼາຍຂຶ້ນກວ່າເກົ່າອີກ.”
ຂ່າວ: ສຳນັກຂ່າວຊິນຮວາ