ຂ່າວສານຢຸນນານ·ຈີນ| ຍິນດີຕ້ອນຮັບບັນດາທ່ານມາສໍາຜັດກັບ"ແບບແຜນຊີວິດຢູ່ຢູນນານ"
ວັນທີ 7 ມີນາຜ່ານມາ, ທ່ານ ຫວາງໜິງ(Wang Ning) ຜູ້ແທນສະພາປະຊາຊົນແຫ່ງຊາດຈີນ, ເລຂາຄະນະພັກແຂວງຢູນນານ ໄດ້ສົ່ງຈົດໝາຍໄປຍັງຊາວເນັດທັງຫຼາຍ, ທ່ານໄດ້ ສຸມໃສ່ຫົວຂໍ້ຈຸດສຸມ, ຕອບຄໍາຖາມທີ່ຊາວເນັດໃຫ້ຄວາມສົນໃຈທີ່ສຸດ, ພ້ອມທັງໄດ້ເຊື້ອເຊີນຊາວເນັດທັງຫຼາຍມາສຳຜັດກັບ “ແບບແຜນຊີວິດຢູນນານ”.
ທ່ານ ຫວາງໜິງ ແນະນໍາວ່າ, ແຂວງຢູນນານມີທິວທັດທໍາມະຊາດທີ່ສວຍງາມ ມີຮີດຄອງປະເພນີຂອງຊົນເຜົ່າທີ່ເຂັ້ມຂຸ້ນ, ຍັງຖືກຂະໜານນາມເປັນ“ອານາຈັກພຶກສາຊາດ” “ອານາຈັກສັດສາວາສິ່ງ” ແລະ “ສວນດອກໄມ້ຂອງໂລກ”. ແຂວງຢູນນານເປັນແດນສະຫວັນໃນບົດກະວີ, ເປັນບ້ານເກີດແຫ່ງຄວາມຝັນ, ຢູ່ທີ່ນີ້, ມີເສັ້ນທາງແຫ່ງຄວາມອົບອຸ່ນຂອງຊ້າງອາຊີທີ່ເດີນທາງຂຶ້ນເໜືອແລ້ວລົງໃຕ້, ມີຈຸດນັດພົບກັບນົກນາງນວນປາກແດງໃນຕົວເມືອງແຫ່ງລະດູບານໃໝ່, ມີປ່າຝົນເຂດຮ້ອນໃນກິ່ງແຂວງສິບສອງພັນນາ, ມີທິວທັດທຳມະຊາດທີ່ສວຍງາມຢູ່ຕາມພູຊ່າງຊັ່ນ(Cangshan)ແລະ ໜອງເອີໄຫ(Er’hai), ມີທ້ອງຟ້າທີ່ປອດໂປ່ງສົດໃສຫຼັງຝົນຕົກຂອງໜອງລູກູ່(Luguhu), ນອກຈາກນັ້ນຍັງມີ “ສາຍດ່ວນແມ່ນໍ້າລ້ານຊ້າງ-ແມ່ນໍ້າຂອງ” ທີ່ອອກເດີນທາງຈາກນະຄອນຄຸນໝິງໃນຕອນເຊົ້າ ແລະ ເດີນທາງໄປຮອດປະເທດລາວໃນຕອນແລງ, ທັງໝົດເຫຼົ່ານີ້ລ້ວນແຕ່ແມ່ນການສຳຜັດພິເສດທີ່ມີສະເພາະແຕ່ຢູ່ແຂວງຢູນນານເທົ່ານັ້ນ.
ທ່ານ ຫວາງໜິງ ກ່າວຕື່ມວ່າ, ໃນຊຸມປີຜ່ານມາ, ແຂວງຢູນນານໄດ້ລົງເລິກການປະຕິຮູບດ້ານການທ່ອງທ່ຽວ, ສືບຕໍ່ປັບປຸງຕະຫຼາດການທ່ອງທ່ຽວໃຫ້ດີຂຶ້ນຢ່າງຕໍ່ເນື່ອງ ແລະ ໄດ້ຮັບຜົນສໍາເລັດ, ໃນນັ້ນແອັບ “ທ່ຽວຢູນນານດ້ວຍມືຖື” ໄດ້ກາຍເປັນສັນຍາລັກການທ່ອງທ່ຽວແບບອັດສະລິຍະ. ແຂວງຢູນນານສືບຕໍ່ດຳເນີນການປະດິດສ້າງໃໝ່ໃນດ້ານຜະລິດຕະພັນ, ສະພາບການ ແລະ ຮູບແບບການທ່ອງທ່ຽວ, ສົ່ງເສີມການພັດທະນາແບບປະສົມປະສານກັນລະຫວ່າງການທ່ອງທ່ຽວ ກັບ ຫຼາຍຂະແໜງການ, ຫັນຮູບແບບການທ່ອງທ່ຽວຈາກການທ່ຽວຊົມແຫຼ່ງທ່ອງທ່ຽວຢ່າງດຽວເທົ່ານັ້ນ ມາເປັນການພັກຜ່ອນຢ່ອນອາລົມແບບເລິກເຊິ່ງ.ປັດຈຸບັນ, ໄປສໍາຜັດກັບການສຶກສາຄົ້ນຄວ້າໃນສວນໝີແພນດານ້ອຍພູເອີ, ໄປຊົມຍາມຕາເວັນຂຶ້ນໃນຕອນເຊົ້າຢູ່ພູຊົງຊານເໝີຍລີ(Songtsam Meili)ເມືອງເຕີຊິງ(Deqin), ໄປດົມກິ່ນຫອມຫວນຂອງກາເຟຢູ່ “ບ້ານອັນດັບ 1 ຂອງກາເຟຈີນ” ຢູ່ນະຄອນປາວຊານ(Baoshan), ໄປຊື້ເຄື່ອງປັ້ນດິນເຜົາສີມ່ວງໜ່ວຍໜຶ່ງຢູ່ຕາແສງເກົ່າລິນອ່ານເມືອງຈ້ຽນສຸຍ(Jianshui),ໄປຟ້ອນລໍາທຳເພັງແບບ “ດາປີຢ້າ” ຢູ່ບ້ານ ລາວມູເຕິງ(Laomudeng)ກິ່ງແຂວງນູ້ຈຽງ(Nujiang), ສິ່ງເຫຼົ່ານີ້ໄດ້ກາຍເປັນສິ່ງແຟຊັນໃໝ່ໃນການທ່ອງທ່ຽວ, ຖືກຊາວເນັດເອີ້ນວ່າເປັນ “ແບບແຜນຊີວິດຢູນນານ”.ທ່ານ ຫວາງໜິງ ກ່າວຕື່ມອີກວ່າ, ໃນຊ່ວງບຸນກຸດຈີນປີນີ້, ລະຄອນໂທລະພາບເລື່ອງ “ໄປບ່ອນທີ່ມີສາຍລົມຜັດມາ”, ເຮັດໃຫ້ການທ່ອງທ່ຽວແຂວງຢູນນານມີຊື່ສຽງໂດ່ງດັງຂຶ້ນອີກຄັ້ງໜຶ່ງ, “ຊາວຈີນເຄິ່ງໜຶ່ງພວມທ່ຽວຢູ່ແຂວງຢູນນານ” ໄດ້ເປັນຫົວຂໍ້ເດັ່ນໃນທາງອິນເຕີເນັດ. ຍິນດີຕ້ອນຮັບບັນດາທ່ານມາສໍາຜັດກັບ “ແບບແຜນຊີວິດຢູນນານ” ຢ່າງຈິງໃຈ.
ຂ່າວ: ເວັບໄຊຂ່າວສານປະຊາຊົນຂອງຈີນ