ຂ່າວສານຢຸນນານ·ຈີນ| "ຊຸກຍູ້ການພັດທະນາທົ່ວໂລກ ໃນຂະບວນການຫັນເປັນທັນສະໄໝ"
ການພັດທະນາຂອງຈີນໄດ້ສ້າງຜົນປະໂຫຍດໃຫ້ແກ່ໂລກ, ການພັດທະນາຂອງຈີນແຍກອອກຈາກໂລກບໍ່ໄດ້. ຢາກຊຸກຍູ້ການເປີດປະຕູສູ່ພາຍນອກຢ່າງມີຄຸນນະພາບສູງຢ່າງໜັກແໜ້ນ, ທັງນຳໃຊ້ຕະຫຼາດ ແລະ ຊັບພະຍາກອນຂອງໂລກເພື່ອພັດທະນາຕົນເອງໃຫ້ດີ, ທັງຕ້ອງຊຸກຍູ້ການພັດທະນາຮ່ວມກັນຂອງໂລກ.
—— ຄັດຈ້ອນຈາກ ຄໍາປາໄສຂອງ ທ່ານ ສີຈິ້ນຜິງ ປະທານປະເທດຈີນ ທີ່ກ່າວໃນກອງປະຊຸມຄັ້ງທໍາອິດຂອງສະພາປະຊາຊົນແຫ່ງຊາດຈີນສະໄໝທີ 14
“ວັນທີ 4 ມີນາຜ່ານມາ, ກອງປະຊຸມສອງສະພາຂອງຈີນໄດ້ຈັດຂຶ້ນຢູ່ນະຄອນຫຼວງປັກກິ່ງ, ໂຄງການຂອງພວກເຮົາກໍມີຂ່າວດີເຊັ່ນກັນ, ນັ້ນກໍຄື: ການຂົນສົ່ງຜູ້ໂດຍສານຂອງທາງລົດໄຟ ລາວ-ຈີນ ຕອນພາຍໃນປະເທດລາວໄດ້ຂຶ້ນສູ່ລະດັບສູງສຸດ, ໄດ້ຂົນສົ່ງຜູ້ໂດຍສານຫຼາຍກວ່າ 10.000 ເທື່ອຄົນໃນມື້ດຽວ ຊຶ່ງໄດ້ສ້າງສະຖິຕິການຂົນສົ່ງຜູ້ໂດຍສານສູງສຸດ ພາຍຫຼັງການເປີດນໍາໃຊ້ທາງລົດໄຟ ລາວ-ຈີນ.” ເມື່ອຕອບຄໍາຖາມຂອງນັກຂ່າວກ່ຽວກັບເປັນຫຍັງຈຶ່ງສົນໃຈນຳກອງປະຊຸມສອງສະພາຂອງຈີນ, ທ່ານ ວົງທອງ ສຸວັນທອງທີ່ມາຈາກບໍລິສັດທາງລົດໄຟ ລາວ-ຈີນ ໄດ້ກ່າວຄຳເວົ້າດັ່ງກ່າວແບບຍິ້ມແຍ້ມແຈ່ມໃສ.
ທາງລົດໄຟ ລາວ-ຈີນ ເປັນໂຄງການທີ່ເຊື່ອມຕໍ່ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ກັບ ຍຸດທະສາດ “ຫັນປະເທດທີ່ບໍ່ມີທາງອອກສູ່ທະເລ ມາເປັນປະເທດທີ່ເຊື່ອມໂຍງເຊື່ອມຈອດຂອງພາກພື້ນ” ຂອງລາວ. ການຂົນສົ່ງຜູ້ໂດຍສານ ແລະ ສິນຄ້າຕາມທາງລົດໄຟ ລາວ-ຈີນ ມີຄຸນນະພາບສູງຂຶ້ນ ທັງມີຂະໜາດໃຫຍ່ຂຶ້ນ, ຊຶ່ງໄດ້ເກີນຄວາມຄາດໝາຍຂອງຄົນທັງຫຼາຍ. ມາຮອດທ້າຍເດືອນກຸມພາປີນີ້ ໄດ້ຂົນສົ່ງຜູ້ໂດຍສານທັງໝົດ 1,8 ລ້ານເທື່ອຄົນ, ຂົນສົ່ງສິນຄ້າເກືອບ 2,9 ລ້ານໂຕນ, ຊະນິດການຂົນສົ່ງສິນຄ້າຈາກ 100 ກວ່າຊະນິດໃນເບື້ອງຕົ້ນ ໄດ້ຂະຫຍາຍມາເປັນ 2.000 ກວ່າຊະນິດໃນປັດຈຸບັນ, ຊຶ່ງໄດ້ສະໜັບສະໜູນການຮ່ວມມືລະຫວ່າງສອງຝ່າຍ ລາວ-ຈີນຢ່າງແຂງແຮງ.
ໃນຖານະເປັນຮອງວິສະວະກອນເອກຂອງ ບໍລິສັດທາງລົດໄຟ ລາວ-ຈີນ, ທ່ານ ວົງທອງ ສຸວັນທອງ ມີຄວາມຮູ້ສຶກຢ່າງເລິກເຊິ່ງວ່າ: ໂຄງການນີ້ໄດ້ເພີ່ມພະລັງຂັບເຄື່ອນອັນແຂງແຮງໃຫ້ແກ່ການພັັດທະນາຂອງປະເທດລາວ. ທ່ານກ່າວວ່າ, “ໃນກອງປະຊຸມສອງສະພາຂອງຈີນປີນີ້, ລັດຖະບານຈີນໄດ້ສະເໜີວ່າ, ຈະດໍາເນີນຕາມແຜນການຊຸກຍູ້ການຫັນເປັນທັນສະໄໝແບບຈີນຢ່າງໜັກແໜ້ນ, ໃນອະນາຄົດ,ຈີນຈະສືບຕໍ່ເປີດກວ້າງການເປີດປະຕູສູ່ພາຍນອກ ແລະ ຮ່ວມກັນສ້າງ ‘ໜຶ່ງແລວ ໜຶ່ງເສັ້ນທາງ’ ຢ່າງມີຄຸນນະພາບສູງ, ນີ້ຈະສ້າງໂອກາດໃໝ່ດ້ານການຮ່ວມມືໃຫ້ແກ່ບັນດາປະເທດ ແລະ ໄດ້ນໍາໂອກາດການພັດທະນາທີ່ດີໃຫ້ແກ່ຂ້າພະເຈົ້າເອງ.”
ການຫັນເປັນທັນສະໄໝແບບຈີນ, ເປັນການຫັນເປັນທັນສະໄໝແບບທີ່ເດີນຕາມເສັ້ນທາງການພັດທະນາໂດຍສັນຕິ. ປະເທດຈີນໃນສູ່ມື້ນີ້ ໄດ້ເຊື່ອມໂຍງເຊື່ອມຈອດກັບໂລກຢ່າງເລິກເຊິ່ງ. ປະຊາຄົມໂລກເຫັນວ່າ, ເສັ້ນທາງຫັນເປັນທັນສະໄໝແບບຈີນ ຈະນັບມື້ນັບຂະຫຍາຍກວ້າງອອກ, ໃນຂະນະທີ່ຊຸກຍູ້ການພັດທະນາຂອງຕົນແລ້ວ, ກໍໄດ້ສ້າງຜົນປະໂຫຍດໃຫ້ແກ່ທົ່ວໂລກ.
ທ່ານ ເທວເນສ ຮິການິໂລ ວິສະວະກອນ ກຸ່ມບໍລິສັດພະລັງງານ ຣູອັນດາ ກ່າວວ່າ, “ຈີນໄດ້ສ້າງໂອກາດຢ່າງຫຼວງຫຼາຍໃຫ້ແກ່ໂລກ. ຢູ່ອາຟຣິກາ, ຫຼາຍປະເທດໄດ້ຮັບຜົນປະໂຫຍດຈາກໂຄງການກໍ່ສ້າງພື້ນຖານໂຄງລ່າງຂອງຈີນ. ຈີນໄດ້ຍຶດໝັ້ນການພັດທະນາໂດຍສັນຕິ, ບໍ່ແຊກແຊງວຽກງານພາຍໃນຂອງປະເທດອື່ນ, ໄດ້ຊ່ວຍພວກເຮົາສ້າງໂຮງງານ, ໂຮງແຮມ ແລະ ຊຸບເປີມາເກັດ.ນີ້ເປັນສະພາບຕົວຈິງທີ່ຈີນໄດ້ຊຸກຍູ້ການພັດທະນາທົ່ວໂລກໃນຂະບວນການຫັນເປັນທັນສະໄໝແບບຈີນ.”
ຂ່າວ: ສໍານັກຂ່າວຊິນຮວາ