ຂ່າວສານຢຸນນານ·ຈີນ| ນາຍົກລັດຖະມົນຕີ ສປ ຈີນ:ຈີນທີ່ເປີດປະຕູສູ່ພາຍນອກ ຍິນດີຕ້ອນຮັບບັນດາທ່ານມາລົງທຶນ ແລະ ສ້າງທຸລະກິດຢູ່ຈີນ
ວັນທີ 13 ມີນາຜ່ານມາ, ໃນກອງປະຊຸມຖະແຫຼງຂ່າວຂອງກອງປະຊຸມຄັ້ງທີ 1 ຂອງສະພາປະຊາຊົນແຫ່ງຊາດຈີນສະໄໝທີ 14, ທ່ານ ຫຼີສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຖະແຫຼງຂ່າວ ແລະ ໄດ້ຕອບຄໍາຖາມຂອງນັກຂ່າວຈີນ ແລະ ຕ່າງປະເທດ.
ໃນກອງປະຊຸມຖະແຫຼງຂ່າວດັ່ງກ່າວ, ທ່ານ ຫຼີສຽງ ກ່າວວ່າ, ປີນີ້ແມ່ນຈີນດຳເນີນການປະຕິຮູບ ແລະ ເປີດປະຕູສູ່ພາຍນອກຄົບຮອບ 45 ປີ, ການປະຕິຮູບ ແລະ ເປີດປະຕູສູ່ພາຍນອກ ໄດ້ຊຸກຍູ້ການພັດທະນາຂອງຈີນ ແລະ ໄດ້ສ້າງຜົນສະທ້ອນຕໍ່ໂລກ. ຈາກຂໍ້ມູນທີ່ເກັບກໍາໃຫ້ຮູ້ວ່າ, ວິສາຫະກິດທຶນຕ່າງປະເທດສ່ວນຫຼາຍ ແມ່ນຍັງຄົງມີຄວາມເຫັນໄປໃນແງ່ດີຕໍ່ກັບອະນາຄົດຂອງຕະຫຼາດຈີນ, ປີກາຍນີ້, ຈີນໄດ້ນຳໃຊ້ທຶນຕ່າງປະເທດໃນຕົວຈິງເຖິງ 189 ຕື້ໂດລາ, ຊຶ່ງໄດ້ສ້າງສະຖິຕິສູງສຸດໃນປະຫວັດສາດ, ເພີ່ມຂຶ້ນ 50 ຕື້ໂດລາເມື່ອທຽບໃສ່ 3 ປີກ່ອນ ຊຶ່ງສະແດງໃຫ້ເຫັນວ່າ, ຈີນຍັງເປັນຈຸດໝາຍປາຍທາງດ້ານການລົງທຶນທີ່ໄດ້ຮັບຄວາມນິຍົມທີ່ສຸດຂອງໂລກ.
ທ່ານ ຫຼີສຽງ ກ່າວວ່າ, ການເປີດປະຕູສູ່ພາຍນອກແມ່ນນະໂຍບາຍພື້ນຖານແຫ່ງຊາດຂອງຈີນ, ບໍ່ວ່າສະຖານະການພາຍນອກປ່ຽນແປງແນວໃດ, ຈີນຈະຍຶດໝັ້ນສືບຕໍ່ກ້າວເດີນໄປໜ້າຢ່າງໝັ້ນໜຽວບໍ່ປ່ຽນແປງ. ງານວາງສະແດງສິນຄ້ານໍາເຂົ້າສາກົນຈີນ ແມ່ນມາດຕະການທີ່ສໍາຄັນຂອງຈີນ ເພື່ອເປັນເຈົ້າການໃນການເປີດກວ້າງຕະຫຼາດຈີນຕໍ່ໂລກ ແລະ ຊົມໃຊ້ໂອກາດການພັດທະນາກັບໂລກ, ຊຶ່ງໄດ້ຈັດຂຶ້ນເປັນເວລາ5 ປີລຽນຕິດກັນແລ້ວ, ເຖິງແມ່ນວ່າໄດ້ເກີດມີການແຜ່ລະບາດຂອງພະຍາດໂຄວິດ-19
ກໍຕາມ, ກໍບໍ່ໄດ້ຂາດສະບັ້ນໄປ, ປີກາຍນີ້ ມີຫຼາຍກວ່າ 2800 ວິສາຫະກິດຈາກ 127 ປະເທດແລະ ເຂດແຄວ້ນໄດ້ເຂົ້າຮ່ວມການວາງສະແດງດັ່ງກ່າວ. ການຈັດງານວາງສະແດງສິນຄ້ານໍາເຂົ້າສາກົນຈີນ ໄດ້ສ່ອງແສງໃຫ້ເຫັນຢ່າງເຕັມປ່ຽມວ່າ,ຕະຫຼາດໃຫຍ່ຂອງຈີນທີ່ເປີດປະຕູສູ່ພາຍນອກ ເປັນກາລະໂອກາດອັນໃຫຍ່ຫຼວງໃຫ້ແກ່ການພັດທະນາຂອງວິສາຫະກິດປະເທດຕ່າງໆ.
ທ່ານ ຫຼີສຽງ ກ່າວຕື່ມວ່າ, ປີນີ້, ຈີນຍັງຈະປະສານສົມທົບກັບລະບຽບການດ້ານເສດຖະກິດການຄ້າສາກົນທີ່ມີມາດຖານສູງ, ເປີດກວ້າງການເປີດປະຕູສູ່ພາຍນອກຕື່ມອີກ. ຈີນຈະເປີດກວ້າງການເປີດປະຕູສູ່ພາຍນອກຢ່າງບໍ່ຢຸດຢັ້ງ, ສະພາບແວດລ້ອມຈະນັບມື້ນັບດີຂຶ້ນ, ການບໍລິການຈະນັບມື້ນັບສົມບູນຂື້ນກວ່າເກົ່າ. ປະເທດຈີນທີ່ເປີດປະຕູສູ່ພາຍນອກຍິນດີຕ້ອນຮັບບັນດາທ່ານມາລົງທຶນ ແລະສ້າງທຸລະກິດຢູ່ຈີນ.
ຂ່າວ: ສໍານັກຂ່າວຊິນຮວາ