ຂ່າວສານຢຸນນານ·ຈີນ| ນາງ ຮວງຢວນຢາ ຈາກມາເລເຊຍ: ຮຽນງິ້ນປັກກິ່ງ ເພື່ອເຜີຍແຜ່ໄປທົ່ວໂລກ

2023-03-31 16:54:04
ມາຈາກ:

ຂ້ອຍໄດ້ເກີດຢູ່ຄອບຄົວທີ່ພໍ່ເປັນຄົນມາເລເຊຍ, ແມ່ມາຈາກນະຄອນຄຸນໝິງ ສປ ຈີນ.ປີນີ້ຂ້ອຍອາຍຸ 12 ປີ, ຂ້ອຍເລີ່ມຮຽນງິ້ວ​ປັກ​ກິ່ງຕັ້ງແຕ່​ຕອນ​ຮຽນ​ປະ​ຖົມ, ໄດ້ຮຽນມາເປັນເວລາ 5 ປີແລ້ວ. ເປັນຫຍັງຈຶ່ງສາມາດຮຽນມາເປັນເວລາດົນປານ​ນີ້, ນັ້ນ​ແມ່ນຍ້ອນວ່າ​ຂ້ອຍ​ມັກ​ງິ້ວ​ປັກ​ກິ່ງຫຼາຍ.

ກ່ອນມາຮຽນງິ້ວ​ປັກ​ກິ່ງ, ຂ້ອຍກໍ​ເຄີຍ​ຮຽນຫຼີ້ນ​ປີ​ອ​າໂນ ແລະ ການ​ຟ້ອນບາເລ. ແຕ່ທຸກເທື່ອໄດ້ເຫັນນັກສະແດງງິ້ວ​ປັກ​ກິ່ງ​ທີ່​ໄດ້​ແຕ່ງ​ໜ້າ​ຕາ​ຢ່າງ​ສວຍ​ງາມ ແລະ ມີ​ທ່າ​ທາງ​ທີ່​ງາມ​ສະ​ຫງ່າຢູ່ຕາມໂທລະພາບ, ຂ້ອຍກໍໄດ້ຮຽນຕາມທ່າ​ທາງຂອງ ພ​ວກ​ນັກ​ສະ​ແດງ. ດັ່ງນັ້ນ, ແມ່ໄດ້ຊອກ​ຫາຫ້ອງຮຽນຝຶກງິ້ວ​ປັກ​ກິ່ງ ທີ່​ຕັ້ງ​ຢູ່ໂຮງລະຄອນລຽນຮວາສື ຖະໜົນສູຝູ ນະຄອນຄຸນໝິງແຂວງຢຸນນານ ໃຫ້ຂ້ອຍ ໂດຍຜ່ານທາງອິນເຕີເນັດ.

ຜູ້​ຮັບ​ຜິດ​ຊອບ​ຂອງ​ຊຸດ​ຝຶກ​ອົບ​ຮົມ​ເດັກ​ນ້ອຍ​ເປັນ​ຄູ່​ຄອງ ຊື່ ​ຟູ້​ສຽງ ແລະ ຈ້າວ​ສຽວ​ລິງ ທີ່​ເປັນ​ນັກ​ສິ​ລະ​ປິນ​ງິ້ວ​ປັກ​ກິ່ງ​ທີ່​ເຂົ້າ​ກິນ​ເບ້ຍ​ບຳ​ນານ​ແລ້ວຂອງ​ໂຮງ​ລະ​ຄອນ​ງິ້ວ​ປັກ​ກິ່ງ​ແຂວງ​ຢຸນ​ນານ. ພາຍ​ໃຕ້​ການ​ຊີ້​ນຳ​ຂອງ​ພວກ​ເພິ່ນ, ຂ້ອຍ​ໄດ້​ຮຽນຮູ້​ວິ​ທີ​ອອກ​ສຽງ​ທີ່​ໄດ້​ມາດ​ຕະ​ຖານ​ຂອງ​ງິ້ວ​ປັກ​ກິ່ງ​ຢ່າງວ່ອງ​ໄວ, ທ່າ​ທາງ ແລະ ຄຸນ​ນະ​ທຳ​ປະ​ຈຳ​ຕົວ​ກໍ​ໄດ້​ຮັບ​ການ​ຊີ້​ນຳ​ທາງວິ​ຊາ​ການ. ນອກ​ນີ້, ຍ້ອນ​ວ່າ​ຂ້ອຍ​ມັກ, ຂ້ອຍ​ຍັງ​ໄດ້​ຮຽນຫຼິ້ນ​ຜີ​ຜາ ທີ່​ເປັນ​ເຄື່ອງ​ເສບ​ທີ່​ໃຊ້​ປະ​ຈຳ​ໃນ​ງິ້ວ​ປັກ​ກິ່ງ.

ຫວ່າງມໍ່ໆນີ້, ຂ້ອຍໄດ້​ເສັງຜ່ານການສອບ​ເສັງງິ້ວ​ປັກ​ກິ່ງ​ປະ​ເພດນັກສະແດງ​ສະ​ໝັກຫຼິ້ນຊັ້ນ 6 ຂອງສະຖາບັນລະຄອນ​ງິ້ວຈີນ. ​ປູ່ຍ່າຂອງຂ້ອຍທີ່ຢູ່ມາເລເຊຍຮູ້ແລ້ວ, ດີໃຈ​ທີ່​ສຸດ. ພວກ​ເພິ່ນສະໜັບສະໜູນການຮຽນງິ້ວປັກ​ກິ່ງຂອງຂ້ອຍ​ທີ່​ສຸດ. ເມື່ອ​ຂ້ອຍກັບຄືນມາເລເຊຍທຸກເທື່ອ​ໃນ​ຍາມ​ພັກ, ຂ້ອຍກໍສະແດງງິ້ວ​ປັກ​ກິ່ງໃນງານລ້ຽງຂອງຄອບຄົວ.

ຂ້ອຍມີ​ຄວາມ​ຮູ້​ສຶກ​ທີ່​ດີ​ໃນເວ​ລາ​ສະ​ແດງ​ຢູ່​ເທິງ​ເວ​ທີ,​ ຂ້ອຍເຫັນວ່າຂ້ອຍບໍ່ພຽງແຕ່ໄດ້ສະແດງຄວາມມັກຮັກ ແລະ ຈຸດເດັ່ນຂອງຕົນ​ເທົ່າ​ນັ້ນ, ຫາກຍັງໄດ້ສະແດງ ມົນສະເໜ່ຂອງມູນ​ເຊື້ອວັດທະນະທໍາຂອງຈີນອີກ​ດ້ວຍ. ໃນ​ອະ​ນາ​ຄົດ, ຂ້ອຍຈະຕັ້ງໃຈຮຽນງິ້ວ​ປັກ​ກິ່ງຫຼາຍກວ່າເກົ່າ, ພ້ອມທັງນໍາເອົາງິ້ວ​ປັກ​ກິ່ງໄປມາເລເຊຍ, ແລະ ສະຖານທີ່ຕ່າງໆຂອງໂລກ, ເພື່ອເຮັດໃຫ້ ຄົນຮັບຮູ້, ເຂົ້າໃຈ ແລະ ຮັກສິລະປະທີ່​ມີ​ມູນ​ເຊື້ອ​ປະ​ເພດ​ນີ້ຂອງຈີນອີກດ້ວຍ.

ຂ່າວ: ໜັງສຶືພິມລາຍວັນຢຸນນານ

ຂ່າວສານຢຸນນານ·ຈີນ| ນາງ ຮວງຢວນຢາ ຈາກມາເລເຊຍ: ຮຽນງິ້ນປັກກິ່ງ ເພື່ອເຜີຍແຜ່ໄປທົ່ວໂລກ