ຂ່າວສານຢຸນນານ·ຈີນ| "ກໍາລັງແຫ່ງຄວາມສາມັກຄີສາມາດເອົາຊະນະ ຄວາມມືດມົນທີ່ເຮັດໃຫ້ທົ່ວໂລກແຕກສະຫຼາຍ"
ທ່ານ ມາຕິນ ຈາເກສ ຜູ້ຊ່ຽວຊານບັນຫາຈີນ ທີ່ມີຊື່ສຽງຂອງອັງກິດກ່າວວ່າ: ກອງປະຊຸມປະຈຳປີຂອງເວທີປຶກສາຫາລືອາຊີ-ໂປອາວ ໄດ້ສຸມໃສ່ບັນຫາແຖວໜ້າແຫ່ງການພັດທະນາຂອງອາຊີ ກໍຄືຂອງໂລກ, ໄດ້ສະໜອງເວທີແລກປ່ຽນຄວາມຄິດ ແລະ ລົງເລິກແລກປ່ຽນກັນໃຫ້ແກ່ບຸກຄົນວົງການຕ່າງໆ. ຈີນແລະ ອາຊີ ໄດ້ເສີມຂະຫຍາຍບົດບາດນັບມື້ສຳຄັນໃນເວທີສາກົນ, ເວທີປຶກສາຫາລືອາຊີ-ໂປອາວ ກໍມີບົດບາດນັບມື້ສຳຄັນໃນເວທີສາກົນເຊັ່ນກັນ.
ໃນວັນທີ 31 ມີນາຜ່ານມາ, ກອງປະຊຸມປະຈຳປີ 2023 ຂອງເວທີປຶກສາຫາລືອາຊີ-ໂປອາວ ທີ່ຈັດຂຶ້ນຢູ່ເມືອງໂປອາວແຂວງໄຫຫຼຳ ແຫ່ງ ສປ ຈີນ ເປັນເວລາ 4 ວັນໄດ້ປິດລົງຢ່າງສໍາເລັດຜົນ ພາຍໃຕ້ຫົວຂໍ້: “ໂລກທີ່ບໍ່ແນ່ນອນ: ສາມັກຄີ ແລະ ຮ່ວມມືກັນ ເພື່ອຮັບມືກັບສິ່ງທ້າທາຍ, ເປີດປະຕູສູ່ພາຍນອກ ເພື່ອຊຸກຍູ້ການພັດທະນາຢ່າງກວມລວມ” ໂດຍມີບັນດາແຂກຜູ້ມີກຽດ 2.000 ກວ່າທ່ານ, ຈາກ 50 ກວ່າປະເທດ ແລະ ເຂດແຄວ້ນເຂົ້າຮ່ວມ.
ທ່ານ ຣັຟ ຈອນສັນ ກຳມະການຄະນະກຳມະການທີ່ປຶກສາເວທີປຶກສາຫາລືອາຊີ-ໂປອາວ, ປະທານບໍລິສັດ ອາສຕຣາ ເຊເນກາ ໄດ້ໃຫ້ສຳພາດຕໍ່ນັກຂ່າວວ່າ: ເວທີປຶກສາຫາລືອາຊີ-ໂປອາວ ແມ່ນເວທີສຳຄັນແຫ່ງການແລກປ່ຽນແລະ ສົນທະນາກັນ ຊຶ່ງໄດ້ກາຍເປັນໜຶ່ງໃນເວທີປຶກສາຫາລືທີ່ມີອິດທິພົນທີ່ສຸດໃນໂລກ, ໄດ້ດຶງດູດແຂກຜູ້ມີກຽດໃນວົງການການເມືອງ, ວົງການການຄ້າ ແລະ ວົງການວິຊາການທົ່ວໂລກ ເຂົ້າຮ່ວມເປັນຈຳນວນຫຼວງຫຼາຍ ໄດ້ດຳເນີນການສົນທະນາ ແລະ ປຶກສາຫາລືກັນຢ່າງຕັ້ງໜ້າ ແລະ ມີລັກສະນະສ້າງສັນ.
ທ່ານ ນາງ ກຣີຕາລີນາ ຈໍຈີວາ ຜູ້ອຳນວຍການໃຫຍ່ກອງທຶນເງິນຕາສາກົນ ຫຼື IMFກ່າວຄຳປາໄສວ່າ: ການຮ່ວມມື ແລະ ຄວາມສາມັກຄີ ປຽບເໝືອນທວນໄຟເຍືອງທາງໃຫ້ແກ່ພວກເຮົາຮ່ວມກັນຮັບມືກັບສິ່ງທ້າທາຍໃນອະນາຄົດ. ກຳລັງແຫ່ງຄວາມສາມັກຄີ ສາມາດເອົາຊະນະຄວາມມືດມົນທີ່ເຮັດໃຫ້ທົ່ວໂລກແຕກສະຫຼາຍ.
ໃນກອງປະຊຸມເວທີປຶກສາຫາລືອາຊີ-ໂປອາວ, ເສດຖະກິດຈີນ ໄດ້ເຕີບໂຕຢ່າງແຂງແຮງ ແລະ ການພັດທະນາຂອງອາຊີໄດ້ຟື້ນຕົວຄືນ, ເຮັດໃຫ້ບຸກຄົນຝ່າຍຕ່າງໆ ມີຄວາມໝັ້ນໃຈ ຢ່າງເຕັມປ່ຽມຕໍ່ການຮ່ວມມື ແລະ ການພັດທະນາໃນອະນາຄົດ.
ທ່ານ ນາງ ອໍລະໄທ ສັນຕິຄົງຄາ ຮອງປະທານສະມາຄົມນັກທຸລະກິດໜຸ່ມແຫ່ງຊາດລາວ ກ່າວວ່າ: ຢູ່ປະເທດລາວກໍສາມາດສຳຜັດກັບຄວາມມີຊີວິດຊີວາຂອງເສດຖະກິດຈີນ ໄດ້ນຳພາການພັດທະນາຂອງປະເທດອ້ອມຂ້າງ. ກ່ອນໜ້ານີ້, ທ່ານໃຫ້ສຳພາດຕໍ່ນັກຂ່າວວ່າ: ນັບແຕ່ຕົ້ນປີມານີ້, ມີຫຼາຍຄະນະຜູ້ແທນທຸລະກິດຈີນ ໄປທັດສະນະສຶກສາຢູ່ລາວ, ຜະລິດຕະພັນກະສິກຳລາວ ໄດ້ສົ່ງອອກໄປປະເທດຈີນ ຜ່ານທາງລົດໄຟລາວ-ຈີນ ເປັນຈຳນວນຫຼວງຫຼາຍ. ສິ່ງທີ່ສຳຄັນກວ່ານັ້ນຄື: ຈີນໄດ້ສະເໜີຜະລິດຕະພັນສາທາລະນະຕ່າງໆເຊັ່ນ: ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ຂໍ້ລິເລີ່ມວ່າດ້ວຍການພັດທະນາທົ່ວໂລກ ເປັນຕົ້ນ ພວມໄດ້ເພີ່ມພະລັງຂັບເຄື່ອນໃໝ່ ໃຫ້ແກ່ການພັດທະນາພາກພື້ນຢ່າງບໍ່ຢຸດຢັ້ງ.
ຂ່າວ: ສໍານັກຂ່າວຊິນຮວາ, ໜັງສືພິມປະຊາຊົນລາຍວັນຂອງຈີນ