ຂ່າວສານຢຸນນານ·ຈີນ| ຂໍ້ລິເລີ່ມຂອງຈີນຈະຊ່ວຍໂລກພັດທະນາຮ່ວມກັນ
ທ່ານ ອາລີສແຕ ມີເຊຍ ເລຂາທິການໃຫຍ່ ຄະນະກໍາມະການອາຊີຕາເວັນອອກຂອງອັງກິດ, ຜູ້ຊ່ຽວຊານດ້ານການຕ່າງປະເທດສາທະລະນະ ແລະ ບັນຫາປະເທດຈີນ ກ່າວຫວ່າງມໍ່ໆມານີ້ວ່າ: ໃນໂລກປັດຈຸບັນ, ບັນຫາຫຼາຍຢ່າງ ມີແຕ່ໃຫ້ປະເທດຕ່າງໆ ຮ່ວມມືກັນ ແລະ ພະຍາຍາມຮ່ວມກັນ ຈຶ່ງຈະສາມາດແກ້ໄຂໃຫ້ຕົກໄດ້. ທັດສະນະຄະຕິການສ້າງປະຊາຄົມຮ່ວມຊາຕາກໍາຂອງມວນມະນຸດທີ່ຝ່າຍຈີນສະເໜີອອກມາ ໄດ້ເປີດຊ່ອງທາງໃຫ້ບັນດາປະເທດໃນການຮັບມືກັບສິ່ງທ້າທາຍລັກສະນະທົ່ວໂລກ ແລະ ບັນລຸການພັດທະນາທີ່ດີກວ່າເກົ່າ ພ້ອມທັງເສີມຂະຫຍາຍບົດບາດອັນສໍາຄັນ ເພື່ອຜົນປະໂຫຍດຂອງມວນມະນຸດ.
ໃນຫຼາຍປີຜ່ານມາ, ທ່ານອາລີສແຕ ມີເຊຍ ໄດ້ຢ້ຽມຢາມ ແລະ ເຮັດວຽກຢູ່ 20 ກວ່າແຂວງ ແລະ ນະຄອນຂອງຈີນ, ໄດ້ເປັນສັກຂີພິຍານໃຫ້ແກ່ການພັດທະນາ ແລະ ປ່ຽນແປງໃໝ່ຂອງຈີນ. ທ່ານ ໄດ້ສັງເກດເຫັນການສ້າງພື້ນຖານໂຄງລ່າງຂອງຈີນ ໄດ້ປະສົບຜົນສໍາເລັດອັນຍິ່ງໃຫຍ່. ປະເທດຈີນ ໄດ້ເລັ່ງໃສ່ການສ້າງລະບົບອິນເຕີເນັດສາຍກວ້າງຢ່າງຕໍ່ເນື່ອງ ຊຶ່ງໄດ້ສ້າງພື້ນຖານທີ່ດີໃຫ້ແກ່ການພັດທະນາຫັນເປັນເຕັກໂນໂລຊີຂໍ້ມູນຂ່າວສານ.
ທ່ານ ອາລີສແຕ ມີເຊຍ ໄດ້ເຮັດວຽກງານກ່ຽວກັບການສື່ສານສາກົນ ແລະ ໃຫ້ຄຳປຶກສາການຕ່າງປະເທດສາທາລະນະເປັນໄລຍະຍາວ. ທ່ານ ກ່າວວ່າ: ສິ່ງທ້າທາຍຕ່າງໆໃນໂລກເຊັ່ນ: ການປ່ຽນແປງຂອງດິນຟ້າອາກາດ, ລັດທິກໍ່ການຮ້າຍ, ຄວາມປອດໄພດ່ານນິວເຄຼຍ ແລະ ອື່ນໆ ກໍາລັງເພີ່ມຂຶ້ນ ຊຶ່ງໄດ້ສະແດງໃຫ້ເຫັນວ່າ: ການບໍລິຫານທົ່ວໂລກຕ້ອງການໄດ້ຮັບການປັບປຸງຢ່າງຮີບດ່ວນ. ທ່ານ ອາລີສແຕ ມີເຊຍ ກ່າວຕື່ມວ່າ: ນັບແຕ່ການຮ່ວມສ້າງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ທັດສະນະຄະຕິການສ້າງປະຊາຄົມຮ່ວມຊາຕາກໍາຂອງມວນມະນຸດ ຈົນເຖິງຂໍ້ລິເລີ່ມວ່າດ້ວຍການພັດທະນາທົ່ວໂລກ, ຂໍ້ລິເລີ່ມວ່າດ້ວຍຄວາມໝັ້ນຄົງທົ່ວໂລກ ແລະ ຂໍ້ລິເລີ່ມວ່າດ້ວຍອະລິຍະທໍາທົ່ວໂລກ, ແຜນການບໍລິຫານທົ່ວໂລກ ທີ່ປະເທດຈີນສະເໜີອອກມາ ເພື່ອຮ່ວມມືກັບປະເທດຕ່າງໆໃນໂລກ ຮ່ວມກັນສ້າງການພົວພັນສາກົນແບບໃໝ່ ທີ່ເຄົາລົບນັບຖືຊຶ່ງກັນ ແລະ ກັນ, ຍຸຕິທໍາ, ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ.
ທ່ານ ອາລີສແຕ ມີເຊຍ ກ່າວຢໍ້າວ່າ: ສຽງຂອງປະເທດຈີນ ຕ້ອງການຮັບຟັງຢ່າງຕັ້ງໜ້າ ແລະ ຖືກເຜີຍແຜ່ຢ່າງກວ້າງຂວາງ. ຈຸດຢືນ ແລະ ຂໍ້ລິເລີ່ມຂອງປະເທດຈີນ ຈະຊ່ວຍປະຊາຄົມໂລກ ໃນການຄຸ້ມຄອງ ແລະ ຄວບຄຸມຄວາມຂັດແຍ້ງ, ເປີດກວ້າງຄວາມເຫັນທີ່ເປັນເອກະພາບກັນ ແລະ ບັນລຸການພັດທະນາຮ່ວມກັນ.
ຂ່າວ: ໜັງສືພິມປະຊາຊົນລາຍວັນຂອງຈີນ