ຂ່າວສານຢຸນນານ·ຈີນ| ນະຄອນຈື່ປໍແຂວງຊານຕົ່ງ: ຮ້ານປີ້ງເຮັດໃຫ້ຕົວເມືອງແຫ່ງໜຶ່ງ ມີຊື່ສຽງໂດ່ງດັງຂຶ້ນໃນທົ່ວປະເທດຈີນ

ເມື່ອບໍ່ດົນມານີ້, ນະຄອນຈື່ປໍແຂວງຊານຕົ່ງ ສປ ຈີນໄດ້ຂຶ້ນຊື່ລືນາມໃນສື່ສັງຄົມອອນລາຍ ຍ້ອນຂະແໜງການປີ້ງຂອງຕົນ, ໃນໄລຍະພັກວັນກໍາມະກອນສາກົນຂອງຈີນປີນີ້ (ລະຫວ່າງວັນທີ 29 ເມສາ - ວັນທີ 3 ພຶດສະພາ), ປະຊາຊົນຈາກເຂດແຂວງຕ່າງໆຂອງຈີນ ໄດ້ພາກັນເດີນທາງໄປສູ່ນະຄອນຈື່ປໍ, ເພື່ອຊິມຊີ້ນປີ້ງທີ່ມີເອກະລັກພິເສດຂອງທ້ອງຖິ່ນ.

ຕາມຕົວເລກຂໍ້ມູນຈາກເວັບໄຊບໍລິການການເດີນທາງໃຫ້ຮູ້ວ່າ, ພາຍໃນໄລຍະພັກວັນກໍາມະກອນສາກົນປີນີ້, ປະລິມານການຈອງໂຮງແຮມຂອງນະຄອນຈື່ປໍໄດ້ເພີ່ມຂຶ້ນເປັນ 20 ເທົ່າ ເມື່ອທຽບໃສ່ໄລຍະດຽວກັນຂອງປີ 2019. ຫຼາຍເດືອນກ່ອນໜ້ານີ້ ນະຄອນຈຶ່ປໍໄດ້ເປີດຖ້ຽວລົດໄຟຊິມຊີ້ນປີ້ງເປັນການສະເພາະ ແລະ ການຈອດລົດໃນເມືອງໂດຍບໍ່ເສຍຄ່າ, ຊຶ່ງໄດ້ດຶງດູດນັກທ່ອງທ່ຽວໃນທົ່ວປະເທດຈີນເດີນທາງໄປຈື່ປໍ ເພື່ອກິນອາຫານປີ້ງ. ຕົວເລກຂໍ້ມູນຈາກວີແຊັດສະແດງໃຫ້ເຫັນວ່າ, ມູນຄ່າການບໍລິໂພກໃນຂະແໜງການທ່ອງທ່ຽວຂອງນະຄອນຈື່ປໍໃນໄລຍະພັກວັນກໍາມະກອນສາກົນປີນີ້ ໄດ້ເພີ່ມຂຶ້ນ 73% ເມື່ອທຽບໃສ່ເດືອນເມສາຜ່ານມາ, ສ່ວນມູນຄ່າການບໍລິໂພກຂອງນັກທ່ອງທ່ຽວຕາມຮ້ານຄ້າຂະໜາດກາງ ແລະ ນ້ອຍ ຂອງນະຄອນຈຶ່ປໍ ກໍໄດ້ເພີ່ມຂຶ້ນເກືອບ 40% ເມື່ອທຽບໃສ່ເດືອນເມສາຜ່ານມາ.

ອີງຕາມສະຖິຕິຈາກອົງການສະຖິຕິນະຄອນຈື່ປໍໃຫ້ຮູ້ວ່າ, ໃນໄຕມາດທຳອິດປີນີ້, ລວມຍອດຜະລິດຕະພັນພາຍໃນຂອງນະຄອນດັ່ງກ່າວໄດ້ບັນລຸເຖິງ ປະມານ 15,65 ຕື້ໂດລາ, ເພີ່ມຂຶ້ນ 4,7% ເມື່ອທຽບໃສ່ໄລຍະດຽວກັນຂອງປີກາຍ.

ຂ່າວ: ໜັງສືພິມປະຊາຊົນລາຍວັນຂອງຈີນ, ສໍານັກຂ່າວຊິນຮວາ