ຂ່າວສານຢຸນນານ·ຈີນ|ນາງ ວັນນະພອນ ຄໍາພິລົມ ກ່າວວ່າ: ທາງລົດໄຟລາວ-ຈີນ ຊ່ວຍບັນລຸຄວາມໄຝ່ຝັນຂອງເຮົາ
“ຖ້າທ່ານເດີນທາງໄປທ່ຽວປະເທດລາວໃນອະນາຄົດ, ຂໍໃຫ້ທ່ານຕິດຕໍ່ຫາບໍລິສັດຂອງພວກເຮົາເດີ!”
“ບໍລິສັດຂອງພວກເຮົາສາມາດໃຫ້ການບໍລິການທ່ອງທ່ຽວແບບຄົບວົງຈອນ, ຖ້າທ່ານອອກເດີນທາງຈາກນະຄອນຄຸນໝິງໄປນະຄອນຫຼວງວຽງຈັນປະເທດລາວ, ທ່ານພຽງແຕ່ຫິ້ວກະເປົາ, ກໍສາມາດອອກເດີນທາງໄດ້ເລີຍ.”
ເມື່ອເວົ້າເຖິງການໄປທ່ຽວປະເທດລາວ ທີ່ໄດ້ຮັບຄວາມນິຍົມຊົມຊອບທີ່ສຸດໃນຫວ່າງມໍ່ໆມານີ້, ນາງ ວັນນະພອນ ທີ່ເປັນນັກສຶກສາລາວຮຽນປີ 3 ຢູ່ມະຫາວິທະຍາໄລຄຸນໝິງ ເຕັມໄປດ້ວຍຄວາມຫ້າວຫັນ ແລະ ມີຄວາມກະຕືລືລົ້ນ. ເມື່ອບໍ່ດົນມານີ້, ລາວໄດ້ຮ່ວມກັບທ້າວ ວຽງໄຊ ພຸດທະວົງ ທີ່ເປັນຄົນລາວ ພ້ອມທັງບໍລິສັດທີ່ປຶກສາຂໍ້ມູນຂ່າວສານຂ້າມແດນ ຢົງຈື້ ຂອງເຂດທົດລອງການຄ້າເສລີ(ຢຸນນານ)ຈີນໄດ້ສ້າງຕັ້ງບໍລິສັດການທ່ອງທ່ຽວສາກົນຮ່ວມທຶນລາວ-ຈີນ ຂຶ້ນແຫ່ງທໍາອິດຂອງປະເທດຈີນ, ແລະ ໄດ້ຮັບໃບທະບຽນທຸລະກິດຢູ່ເຂດທົດລອງການຄ້າເສລີ(ຢຸນນານ)ຈີນສາຂາເຂດຄຸນໝິງ.
ນາງ ວັນນະພອນ ຮຽນຢູ່ຄຸນໝິງເປັນເວລາ 3 ປີ. ພາຍຫຼັງດ່ານບໍ່ຫານໄດ້ເປີດດ່ານຄືນໃໝ່ຢ່າງເປັນປົກກະຕິບໍ່ດົນ, ນາງໄດ້ຈັດແຈງການທ່ອງທ່ຽວຂ້າມຊາຍແດນຄັ້ງໜຶ່ງແກ່ຄອບຄົວ. ໂດຍຜ່ານການທ່ອງທ່ຽວຄັ້ງນີ້, ລາວມີຄວາມຄິດບາງຢ່າງ ນັ້ນກໍຄື: ຈະສາມາດນໍາໃຊ້ໂອກາດການເປີດນຳໃຊ້ທາງລົດໄຟ ລາວ-ຈີນ ເພື່ອເຮັດໃຫ້ຄົນຈີນເຂົ້າໃຈ ແລະ ຮັບຮູ້ຕໍ່ປະເທດລາວໃຫ້ຫຼາຍຂຶ້ນ ໄດ້ຫຼືບໍ? ເຮັດໃຫ້ຄົນລາວມາທ່ຽວຈີນຫຼາຍກວ່າເກົ່າໄດ້ບໍ່? ສະນັ້ນ, ນາງເລີຍມີຄວາມຄິດຢາກສ້າງຕັ້ງບໍລິສັດການທ່ອງທ່ຽວ.
ພາຍຫຼັງມີຄວາມຄິດແລ້ວ, ນາງ ວັນນະພອນ ເລີ່ມກະກຽມ“ເປີດບໍລິສັດ”. ກ່ອນອື່ນ, ຕ້ອງຕິດຕໍ່ຫາຄູ່ຮ່ວມມືຝ່າຍລາວ ເພື່ອຮັບປະກັນໃຫ້ນັກທ່ອງທ່ຽວສາມາດເຊົ່າລົດ, ມີທີ່ພັກອາໄສ, ມີບໍລິການນຳທ່ຽວ ແລະ ການບໍລິການອື່ນໆຢູ່ລາວ. ຕໍ່ມາ, ຕ້ອງຮັບຮູ້ເງື່ອນໄຂການສ້າງຕັ້ງບໍລິສັດການທ່ອງທ່ຽວຢູ່ຈີນສໍາລັບຄົນຕ່າງປະເທດ. ນາງ ວັນນະພອນ ເວົ້າວ່າ, ດຽວນີ້ມີນັກທ່ອງທ່ຽວຈີນຄ່ອຍຕິດຕໍ່ມາຫາລາວ ໂດຍຜ່ານທາງອິນເຕີເນັດແລ້ວ ແລະ ໄດ້ໃຊ້ການບໍລິການຂອງບໍລິສັດລາວ.
ນາງ ວັນນະພອນ ຫວັງວ່າ:“ ເຖິງແມ່ນວ່າດຽວນີ້ພຽງເປັນການເລີ່ມຕົ້ນນ້ອຍໆກໍຕາມ, ແຕ່ຂ້ອຍຈະພະຍາຍາມສຸດຂີດ ເພື່ອເປີດກວ້າງການບໍລິການຂອງບໍລິສັດ, ຫວັງວ່າຂ້ອຍຈະສາມາດປະກອບສ່ວນເຂົ້າໃນການແລກປ່ຽນວັດທະນະທໍາລະຫວ່າງສອງປະເທດລາວ ແລະ ຈີນ.”
ຂ່າວ: ໜັງສືພິມລາຍວັນຢຸນນານ