ຂ່າວສານຢຸນນານ·ຈີນ|ທ່ານ ເປໂດຣ ເຣໂນ ເຊື່ອວ່າຈີນຈະມີອະນາຄົດທີ່ດີງາມກວ່າເກົ່າ
ຢູ່ຕາແສງຈິນສຽວເມືອງຜູຕົ່ງນະຄອນຊຽງໄຮ້, ອາຄານຂອງວິທະຍາໄລທຸລະກິດສາກົນ ຈີນ-ເອີຣົບ ໄດ້ປະສານສົມທົບກັບສະຖາປັດຕະຍະກຳແບບຈີນ ແລະ ແບບຕາເວັນຕົກ, ມົນສະເໜ່ທີ່ມີເອກະລັກພິເສດຂອງບ້ານນ້ຳໃນເຂດພາກໃຕ້ຂອງຈີນໄດ້ສົມທົບກັບຄວາມງາມຂອງສະຖາປັດຕະຍະກຳຕາເວັນຕົກ, ຊຶ່ງໄດ້ຈໍ່ຕົວຂຶ້ນເປັນທີວທັດວິທະຍາໄລທີ່ມີເອກະລັກສະເພາະ. ເມື່ອຫວນຄືນເຖິງໄລຍະຫາກໍ່ສ້າງຕັ້ງວິທະຍາໄລ, ທ່ານ ເປໂດຣ ເຣໂນ ທີ່ເປັນຜູ້ອຳນວຍການກິດຕິມະສັກຝ່າຍເອີຣົບຂອງວິທະຍາໄລທຸລະກິດສາກົນ ຈີນ-ເອີຣົບ ແລະ ຊ່ຽວຊານດ້ານການບໍລິຫານເສດຖະກິດການຄ້າແອັສປາຍກ່າວວ່າ: “ເມື່ອວິທະຍາໄລແຫ່ງນີ້ຫາກໍ່ສ້າງຕັ້ງຂຶ້ນ, ເຂດອ້ອມຂ້າງຍັງເປັນດິນເຮື້ອ. ປັດຈຸບັນ, ເຂດຜູຕົ່ງໄດ້ປ່ຽນແປງແບບໜ້າມືເປັນຫຼັງມືແລ້ວ, ການພັດທະນາຂອງຈີນໄວອີ່ຫຼີ.”
ໃນຊຸມປີ 1980, ທ່ານ ເຣໂນ ໄດ້ເດີນທາງມາເຖິງປະເທດຈີນດ້ວຍຄວາມຄອງຄອຍຕໍ່ອະນາຄົດແຫ່ງການປະຕິຮູບ ແລະ ການເປີດປະຕູສູ່ພາຍນອກຂອງຈີນ. ຄວາມສາມາດບົ່ມຊ້ອນດ້ານຕະຫຼາດອັນໃຫຍ່ຫຼວງຂອງຈີນໄດ້ສ້າງຄວາມຕ້ອງການດ້ານການບໍລິຫານທຸລະກິດອັນໃຫຍ່ຫຼວງ, ຊຶ່ງທ່ານ ເຣໂນ ໄດ້ເປີດຝຶກອົບຮົມ MBA ຢູ່ນະຄອນຫຼວງປັກກິ່ງ. ໃນປີ 1994, ພາຍໃຕ້ການສົ່ງເສີມຂອງທ່ານ ເຣໂນ, ວິທະຍາໄລທຸລະກິດສາກົນ ຈີນ-ເອີຣົບ ທີ່ຈີນ ແລະ ສະຫະພາບເອີຣົບຮ່ວມກັນສ້າງຕັ້ງຂຶ້ນນັ້ນ ໄດ້ເລີ່ມລົງມືກໍ່ສ້າງຢູ່ເມືອງຜູຕົ່ງນະຄອນຊຽງໄຮ້, ຊຶ່ງໄດ້ສຸມໃສ່ການອົບຮົມບົ່ມສ້າງບຸກຄະລາກອນດ້ານການບໍລິຫານວິສາຫະກິດໃຫ້ແກ່ຈີນ.
ທ່ານ ເຣໂນ ກ່າວວ່າ, ປັດຈຸບັນ, ລັດທິຕ້ານກັບຂະບວນການໂລກາພິວັດ, ລັດທິຝ່າຍດຽວ ແລະ ລັດທິປົກປ້ອງ ພວມນັບມື້ນັບຮຸນແຮງຂຶ້ນ, ຈີນຍຶດໝັ້ນການເປີດປະຕູສູ່ພາຍນອກໃນລະດັບສູງ, ຮ່ວມກັນຊົມໃຊ້ຜົນປະໂຫຍດດ້ານການພັດທະນາກັບປະເທດຕ່າງໆໃນໂລກ, ສືບຕໍ່ເປັນແຫຼ່ງກຳລັງທີ່ໝັ້ນຄົງເພື່ອຊຸກຍູ້ການຟື້ນຟູເສດຖະກິດຂອງໂລກ. “ຂ້າພະເຈົ້າເຊື່ອໝັ້ນວ່າ: ອະນາຄົດຂອງຈີນຈະນັບມື້ນັບດີງາມກວ່າເກົ່າ, ແລະ ຈີນຈະນໍາເອົາກາລະໂອກາດອັນໃຫຍ່ຫຼວງກວ່າເກົ່າໃຫ້ແກ່ການພັດທະນາຂອງໂລກ.”
ຂ່າວ: ໜັງສືພິມປະຊາຊົນລາຍວັນຂອງຈີນ