ຂ່າວສານຢຸນນານ·ຈີນ|ຊ່ອງທາງໃໝ່ທາງບົກ ແລະ ທາງທະເລພາກຕາເວັນຕົກ ສ້າງຜົນປະໂຫຍດໃຫ້ແກ່ປະເທດລຽບຕາມຊ່ອງທາງ
ຊ່ອງທາງໃໝ່ທາງບົກ ແລະ ທາງທະເລພາກຕາເວັນຕົກ ປົກຄຸມ 12 ແຂວງ, ນະຄອນ ແລະ ເຂດປົກຄອງຕົນເອງທາງພາກຕາເວັນຕົກຂອງຈີນ, ໄດ້ເຊື່ອມຕໍ່ກັບ 120 ສະຖານີໃນ 61 ຕົວເມືອງຂອງ 18 ແຂວງ, ນະຄອນ ແລະ ເຂດປົກຄອງຕົນເອງໃນທົ່ວປະເທດ,ສາມາດໄປເຖິງທ່າກຳປັ່ນ393 ແຫ່ງຂອງ 119 ປະເທດແລະເຂດແຄວ້ນ…ໃນງານພົບປະສັງສັນການຄ້າ ແລະ ການລົງທຶນສາກົນທາງພາກຕາເວັນຕົກຈີນຄັ້ງທີ 5 ທີ່ຈັດຂຶ້ນຢູ່ນະຄອນຈົ່ງກິ່ງ ລະຫວ່າງວັນທີ 18 ຫາ 21 ພຶດສະພາຜ່ານມານີ້, ຫ້ອງວາງສະແດງຊ່ອງທາງໃໝ່ທາງບົກ ແລະ ທາງທະເລ ໄດ້ວາງສະແດງຜົນງານໃໝ່ ຊຶ່ງໄດ້ດຶງດູດຜູ້ຊົມຫຼາຍທ່ານເຂົ້າຊົມ.
ຊ່ອງທາງໃໝ່ທາງບົກ ແລະ ທາງທະເລພາກຕາເວັນຕົກ ໄດ້ຖືເອົານະຄອນຈົ່ງກິ່ງເປັນຈຸດໃຈກາງ, ຖືເອົາແຂວງ, ນະຄອນ ແລະ ເຂດປົກຄອງຕົນເອງອື່ນໆ ທາງພາກຕາເວັນຕົກຂອງຈີນເປັນຈຸດເຊື່ອມຕໍ່ສຳຄັນ, ໂດຍນຳໃຊ້ວິທີຂົນສົ່ງຕ່າງໆເຊັ່ນ: ທາງລົດໄຟ, ທາງທະເລ ແລະ ທາງບົກເປັນຕົ້ນ,ຜ່ານຈາກດ່ານທາງບົກ ແລະ ທາງທະເລ ທາງທິດໃຕ້ຂອງເຂດປົກຄອງຕົນເອງເຜົ່າຈ້ວງກວາງຊີ ແລະ ແຂວງຢຸນນານ ເດີນທາງໄປເຖິງແຫ່ງຕ່າງໆຂອງໂລກ ຊຶ່ງໄດ້ປະຢັດເວລາຢ່າງຫຼວງຫຼາຍ ເມື່ອທຽບໃສ່ການເດີນທາງຈາກທ່າກຳປັ່ນທາງພາກຕາເວັນອອກຂອງຈີນ.
ທ່ານ ອູຢາງ ຜູ້ອຳນວຍການໃຫຍ່ບໍລິສັດຕົວແທນການຂົນສົ່ງສິນຄ້າສາກົນມິງເຊິງທີ່ດຳເນີນທຸລະກິດການຄ້າຈີນ-ລາວ ມາເປັນເວລາດົນນານກ່າວວ່າ: “ແຕ່ກ່ອນ, ຖ້າຂົນສົ່ງສິນຄ້າປະເທດລາວໄປເຖິງນະຄອນຈົ່ງກິ່ງ ແລະ ແຂວງເສສວນ ທີ່ຢູ່ທາງພາກຕາເວັນຕົກສ່ຽງໃຕ້ຂອງຈີນຕ້ອງໃຊ້ເວລາຢ່າງໜ້ອຍ 20 ກວ່າວັນ.” ແຕ່ດຽວນີ້ຖ້າຂົນສົ່ງຕາມຂະບວນສາກົນທາງລົດໄຟລາວ-ຈີນຕາມຊ່ອງທາງໃໝ່ທາງບົກ ແລະທາງທະເລພາກຕາເວັນຕົກ,ໃຊ້ເວລາພຽງແຕ່ 4 ວັນເທົ່ານັ້ນ.
ຊ່ອງທາງໃໝ່ທາງບົກ ແລະ ທາງທະເລພາກຕາເວັນຕົກສອດຄ່ອງກັບຫຼັກການປຶກສາຫາລືຮ່ວມກັນ, ສ້າງສາຮ່ວມກັນ ແລະ ຊົມໃຊ້ຮ່ວມກັນຂອງ “ໜຶື່ງແລວ ໜຶ່ງເສັ້ນທາງ” ໃນລະດັບສູງ, ທັງຊ່ວຍຊຸກຍູ້ການເປີດປະຕູສູ່ພາຍນອກ ແລະ ການພັດທະນາຂອງເຂດພາກຕາເວັນຕົກຂອງຈີນ ແລະ ຍັງໄດ້ຊ່ວຍໃຫ້ປະເທດ ແລະ ເຂດແຄວ້ນທີ່ຢູ່ລຽບຕາມຊ່ອງທາງຊົມໃຊ້ຜົນປະໂຫຍດດ້ານຕະຫຼາດຂອງຈີນ ຊຶ່ງໄດ້ເຮັດໃຫ້ຊ່ອງທາງໃໝ່ດັ່ງກ່າວສ້າງຜົນປະໂຫຍດໃຫ້ແກ່ປະເທດ ແລະເຂດແຄວ້ນຕ່າງໆນັບມື້ນັບຫຼາຍຂຶ້ນ.
ໃນຫ້ອງວາງສະແດງສາກົນໃນງານພົບປະສັງສັນການຄ້າ ແລະ ການລົງທຶນສາກົນທາງພາກຕາເວັນຕົກຈີນຄັ້ງນີ້ໄດ້ວາງສະແດງຜະລິດຕະພັນທີ່ມີເອກະລັກພິເສດຂອງປະເທດລຽບຕາມ “ໜຶ່ງແລວ ໜຶ່ງເສັ້ນທາງ” ຢ່າງຫຼວງຫຼາຍ ເຊັ່ນ: ເຄື່ອງເຟີນີເຈີໄມ້ແດງລາວ,ໝາກຖົ່ວລຽນຟີລິບປິນ, ກາເຟຂີ້ແມວອິນໂດເນເຊຍເປັນຕົ້ນ,ຜະລິດຕະພັນສ່ວນໜຶ່ງຖືກຂົນສົ່ງມາເຖິງນະຄອນຈົ່ງກິ່ງ ດ້ວຍຮູບການຈໍລະຈອນສິນຄ້າທີ່ສະດວກວ່ອງໄວກວ່າເກົ່າ ໂດຍຜ່ານຊ່ອງທາງໃໝ່ທາງບົກ ແລະ ທາງທະເລພາກຕາເວັນຕົກ.
ໃນກອງປະຊຸມເວທີປຶກສາຫາລືສາກົນຊ່ອງທາງໃໝ່ທາງບົກ ແລະ ທາງທະເລພາກຕາເວັນຕົກປີ 2023, ທ່ານ ວິໄລຄຳ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ ແຫ່ງ ສປປ ລາວກ່າວວ່າ: “ການເປີດຂະບວນສາກົນທາງລົດໄຟລາວ-ຈີນຕາມຊ່ອງທາງໃໝ່ທາງບົກ ແລະ ທາງທະເລພາກຕາເວັນຕົກ ໄດ້ເສີມຂະຫຍາຍບົດບາດສຳຄັນທີ່ສຸດຕໍ່ການຂົນສົ່ງສິນຄ້າຂອງ ລາວ ແລະ ຈີນ ຊຶ່ງຈະຊ່ວຍຊຸກຍູ້ໃຫ້ປະເທດລາວຈາກ “ປະເທດທີ່ບໍ່ມີທາງອອກສູ່ທະເລ” ກາຍມາເປັນ “ປະເທດເຊື່ອມໂຍງເຊື່ອມຈອດຂອງພາກພື້ນ”.
ຂ່າວ: ສໍານັກຂ່າວຊິນຮວາ