ຂ່າວສານຢຸນນານ·ຈີນ|ກິດຈະກຳຈີນພາຍໃຕ້ຫົວຂໍ້“ຈາກສັນຍາກາຍມາເປັນການປະສານງານກັນ ເພື່ອຟື້ນຟູຊີວະນາໆພັນ”ຈັດຂຶ້ນຢູ່ນະຄອນຄຸນໝິງ
ວັນທີ 22 ພຶດສະພາ ແມ່ນວັນຊີວະນາໆພັນສາກົນ, ກິດຈະກຳຈີນພາຍໃຕ້ຫົວຂໍ້ “ຈາກສັນຍາກາຍມາເປັນການປະສານງານກັນ ເພື່ອຟື້ນຟູຊີວະນາໆພັນ” ເລີ່ມຈັດຂຶ້ນຢູ່ນະຄອນຄຸນໝິງແຂວງຢຸນນານ ສປ ຈີນ.
ກອງປະຊຸມໃຫຍ່ພາຄີຄັ້ງທີ 15 ຂອງ “ສົນທິສັນຍາຊີວະນາໆພັນ” ຫຼື COP15 ໄດ້ກ້າວເຖິງຂັ້ນເຊັນ “ຂອບຊີວະນາໆພັນທົ່ວໂລກຄຸນໝິງ-ມົງເຕຣອານ”. ໃນກິດຈະກຳທົ່ວໂລກວັນຊີວະນາໆພັນສາກົນປີ 2023ທີ່ຈັດຂຶ້ນໃນວັນທີ 22 ພຶດສະພານີ້, ທ່ານ ຈ້າວຢິງມິນ ຮອງລັດຖະມົນຕີກະຊວງສິ່ງແວດລ້ອມນິເວດຈີນກ່າວວ່າ, ການຊຸກຍູ້ໃຫ້ຊີວະນາໆພັນກ້າວຂຶ້ນສູ່ເສັ້ນທາງຟື້ນຟູ, ຕ້ອງຢ່ວງບາດກ້າວຈາກຄວາມຮັບຮູ້ຄືກັນມາເປັນຂະບວນການຕົວຈິງ, ຕ້ອງການໃຫ້ຝ່າຍຕ່າງໆເຂົ້າຮ່ວມ ແລະ ມີການເຄື່ອນໄຫວຕົວຈິງ.
ທ່ານ ຈ້າວຢິງມິງ ກ່າວຕື່ມວ່າ, ການລິເລີ່ມກິດຈະກຳຈີນພາຍໃຕ້ຫົວຂໍ້ “ຈາກສັນຍາກາຍມາເປັນການປະສານງານກັນ ເພື່ອຟື້ນຟູຊີວະນາໆພັນ” ໂດຍຮຽກຮ້ອງໃຫ້ຝ່າຍພາຄີຕ່າງໆ ແລະ ຝ່າຍທີ່ໄດ້ຮັບຜົນປະໂຫຍດພະຍາຍາມຮ່ວມກັນ, ປະກອບສ່ວນເພື່ອປົກປ້ອງຊີວະນາໆພັນຂອງທົ່ວໂລກ. ຈີນຈະສືບຕໍ່ປະຕິບັດຕາມພັນທະທີ່ເປັນປະເທດປະທານ COP15 ເປັນຢ່າງດີ, ນຳພາຂະບວນການປົກປ້ອງຊີວະນາໆພັນຂອງທົ່ວໂລກ, ພະຍາຍາມປະສານສົມທົບໃຫ້ຝ່າຍຕ່າງໆຈັດຕັ້ງປະຕິບັດ “ຂອບຊີວະນາໆພັນທົ່ວໂລກຄຸນໝິງ-ມົງເຕຣອານ” ຢ່າງຮອບດ້ານ ເພື່ອສ້າງແບບຢ່າງແຫ່ງການຮ່ວມມືທົ່ວໂລກໃນຂົງເຂດຊີວະນາໆພັນ ແລະ ຮ່ວມກັນສ້າງປະຊາຄົມຊີວິດໜ່ວຍໂລກ.
ແຂວງຢຸນນານຖືກເອີ້ນວ່າເປັນ “ອານາຈັກສັດ”, “ອານາຈັກພືດ” ແລະ “ສາງພັນທຸກຳ”, ຈຳນວນຊີວະຊາດສະກຸນໃຫຍ່ປະເພດຕ່າງໆ ໄດ້ກວມເກືອບ ຫຼື ຫຼາຍກວ່າເຄິ່ງໜຶ່ງຂອງຍອດຈຳນວນຊີວະຊາດພາຍໃນປະເທດຈີນ. ເພື່ອປົກປ້ອງຊີວະນາໆພັນໃຫ້ດີ, ແຂວງຢຸນນານໄດ້ຂີດແບ່ງເນື້ອທີ່ປ້ອງກັນນິເວດ 113.500 ກິໂລຕາແມັດ, ໄດ້ສ້າງເຂດສະຫງວນທຳມະຊາດປະເພດຕ່າງໆ ແລະ ຂັ້ນຕ່າງໆ360 ກວ່າແຫ່ງ ຊຶ່ງໄດ້ປົກປ້ອງລະບົບນິເວດແບບຢ່າງຫຼາຍກວ່າ 90% ແລະ ປະເພດສັດ ແລະ ພືດທີ່ໄດ້ຮັບການປົກປ້ອງເປັນພິເສດ 83% ຂຶ້ນໄປຂອງທົ່ວແຂວງເປັນຢ່າງດີ.
ຂ່າວ: ສໍານັກຂ່າວຊິນຮວາ