ຂ່າວສານຢຸນນານ·ຈີນ| ທາງລົດໄຟ ລາວ-ຈີນ ແມ່ນຊ່ອງທາງໃຫຍ່ທີ່ຊຸກຍູ້ ການເຊື່ອມໂຍງເຊື່ອມຈອດຂອງພາກພື້ນ
ແຂ່ງໝາກກະຕໍ້ຮ່ວມກັນ, ຟ້ອນລຳທຳເພງຮ່ວມກັນ, ຖ່າຍຮູບຮ່ວມກັນ… ຄົນທັງຫຼາຍທີ່ຮ່ວມກິດຈະກຳລ້ວນແຕ່ມີໃບໜ້າທີ່ຍິ້ມແຍ້ມແຈ່ມໃສ. ໃນລະຫວ່າງວັນທີ 30 ຫາ 31 ພຶດສະພາຜ່ານມາ, ກິດຈະກຳແລກປ່ຽນວັດທະນະທຳສາກົນພາຍ
ໃຕ້ຫົວຂໍ້ “ສາຍນໍ້າສາຍໃຈດຽວ ກົມກຽວດັ່ງຄອບຄົວດຽວກັນ” ໃນຍຸກໃໝ່ ໄດ້ຈັດຂຶ້ນຢູ່ນະຄອນຄຸນໝິງແຂວງຢຸນນານ ສປ ຈີນ ຊຶ່ງເຕັມໄປດ້ວຍບັນຍາກາດທີ່ເບີກບານມ່ວນຊື່ນ.
6 ປະເທດແມ່ນໍ້າລ້ານຊ້າງ-ແມ່ນໍ້າຂອງ ທີ່ມີພູຜາ ແລະ ແມ່ນໍ້າຕິດຈອດກັນ ແລະ ມີມູນເຊື້ອວັດທະນະທຳທີ່ຄ້າຍຄືກັນ. ໃນຖານະເປັນກົນໄກຮ່ວມມືແບບໃໝ່ໃນອະນຸພາກພື້ນ ແລະ ເປັນກົນໄກທຳອິດ ທີ່ 6 ປະເທດແມ່ນໍ້າລ້ານຊ້າງ-ແມ່ນໍ້າຂອງໄດ້ປຶກສາຫາລືຮ່ວມກັນ, ສ້າງສາຮ່ວມກັນ ແລະ ຊົມໃຊ້ຮ່ວມກັນ, ນັບແຕ່ເລີ່ມປະຕິບັດກົນໄກໃນປີ 2016 ເປັນຕົ້ນມາ, ກົນໄກຮ່ວມມື ແມ່ນໍ້າລ້ານຊ້າງ-ແມ່ນໍ້າຂອງ ໄດ້ກາຍເປັນ“ແມ່ພິມສີຄໍາ” ໃນການຮ່ວມມືອະນຸພາກພື້ນ ດ້ວຍການພັດທະນາໃນລະດັບສູງ. ເນື່ອງໃນໂອກາດການສະເໜີການຮ່ວມກັນສ້າງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຄົບຮອບ 10 ປີ, ແຂກຜູ້ມີກຽດທັງພາຍໃນ ແລະ ຕ່າງປະເທດໄດ້ເຕົ້າໂຮມກັນຢູ່ນະຄອນຄຸນໝິງ ເພື່ອສ້າງຄວາມຮັກແພງປານພີ່ນ້ອງກັນ.
ທ່ານ ຈຽນລຽງ ເລຂາແຫ່ງລັດກະຊວງຖະແຫຼງຂ່າວກຳປູເຈຍເຄີຍໄປເຂົ້າຮ່ວມງານວາງສະແດງສິນຄ້າ ຈີນ-ອາຊີໃຕ້, ສໍາມະນາວຽກງານສື່ມວນຊົນ ບັນດາປະເທດແມ່ນໍ້າລ້ານຊ້າງ-ແມ່ນໍ້າຂອງ ຢູ່ແຂວງຢຸນນານຫຼາຍເທື່ອ. ທ່ານກ່າວວ່າ: ກິດຈະກຳ “ສາຍນໍ້າສາຍໃຈດຽວ ກົມກຽວດັ່ງຄອບຄົວດຽວກັນ” ຄັ້ງນີ້ໄດ້ກາຍເປັນຂົວມິດຕະພາບໃຫ້ແກ່ຄົນທັງຫຼາຍມາເຕົ້າໂຮມສາມັກຄີກັນ, ປຶກສາຫາລືແລກປ່ຽນກັນ ແລະ ຖອດຖອນບົດຮຽນ ເຊິ່ງກັນ ແລະ ກັນ ມີຜົນດີຊ່ວຍຊຸກຍູ້ໃຫ້ 6 ປະເທດແມ່ນໍ້າລ້ານຊ້າງ-ແມ່ນໍ້າຂອງ ເພີ່ມທະວີການໄປມາຫາສູ່ດ້ານວັດທະນະທຳ ແລະ ຖອດຖອນບົດຮຽນເຊິ່ງກັນ ແລະ ກັນ.
ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແຫ່ງ ສປປ ລາວ ໄດ້ເອົາໃຈໃສ່ຕໍ່ “ເສັ້ນທາງຄຳ” ກໍຄືທາງລົດໄຟລາວ-ຈີນ ສາຍນີ້ເປັນພິເສດ. ທ່ານກ່າວວ່າ: ນັບແຕ່ການເປີດນຳໃຊ້ທາງລົດໄຟ ລາວ-ຈີນ ເປັນຕົ້ນມາ, ການຂົນສົ່ງຜູ້ໂດຍສານ ແລະ ການຈໍລະຈອນສິນຄ້າເປັນຈຳນວນຫຼວງຫຼາຍຕາມເສັ້ນທາງສາຍນີ້ ໄດ້ສ່ອງແສງໃຫ້ເຫັນເຖິງຄວາມໝາຍຂອງການເຊື່ອມໂຍງເຊື່ອມຈອດຂອງພາກພື້ນຢ່າງແທ້ຈິງ. ປັດຈຸບັນ, ທາງລົດໄຟ ລາວ-ຈີນ ບໍ່ພຽງແຕ່ແມ່ນທາງລົດໄຟທີ່ຂົນສົ່ງຜູ້ໂດຍສານ ແລະ ສິນຄ້າເທົ່ານັ້ນ, ຍັງໄດ້ກາຍເປັນຊ່ອງທາງໃໝ່ທີ່ຊຸກຍູ້ການເຊື່ອມໂຍງເຊື່ອມຈອດຂອງພາກພື້ນ ຊຶ່ງເປັນແບບຢ່າງໃຫ້ແກ່ການຮ່ວມມືແບບຕ່າງຝ່າຍຕ່າງມີຜົນປະໂຫຍດໃຫ້ແກ່ການຮ່ວມມືລະຫວ່າງສອງຝ່າຍ ແລະ ຫຼາຍຝ່າຍລະຫວ່າງບັນດາປະເທດແມ່ນໍ້າລ້ານຊ້າງ-ແມ່ນໍ້າຂອງ.
ທ່ານ ກະຕ່າຍ ມາກໂນຊາ ນັກຂ່າວວິທະຍຸກະຈາຍສຽງແຫ່ງຊາດລາວເຫັນວ່າ, ທາງລົດໄຟ ລາວ-ຈີນ ໄດ້ສ່ອງແສງໃຫ້ເຫັນເຖິງ “ໜຶ່ງແລວ ໜຶ່ງເສັ້ນທາງ” ຢ່າງມີຊີວິດຊີວາ. ທ່ານກ່າວວ່າ, ທາງລົດໄຟ ລາວ-ຈີນ ຈາກຄວາມຝັນໄດ້ກາຍມາເປັນທາງລົດໄຟຕົວຈິງ ຊຶ່ງເຮັດໃຫ້ການອອກເດີນທາງຂອງປະຊາຊົນລາວມີຄວາມສະດວກສະບາຍກວ່າເກົ່າ ແລະ ກໍໄດ້ເພີ່ມທະວີມິດຕະພາບລະຫວ່າງປະຊາຊົນສອງຊາດ ລາວ ແລະ ຈີນ.
(ແຫຼ່ງຂ່າວ: ໜັງສືພິມລາຍວັນຢຸນນານ)