ຂ່າວສານຢຸນນານ·ຈີນ| ສໍາຜັດກັບແບບແຜນຊີວິດຢຸນນານດ້ວຍຫຼາຍຮູບແບບ
ໃນກິດຈະກຳແລກປ່ຽນວັດທະນະທຳສາກົນພາຍໃຕ້ຫົວຂໍ້ “ສາຍນໍ້າສາຍໃຈດຽວ ກົມກຽວດັ່ງຄອບຄົວດຽວກັນ” ໃນຍຸກໃໝ່, ຜະລິດຕະພັນວາງສະແດງທີ່ມີຫຼາກຫຼາຍສີສັນຈາກນະຄອນລິນຊາງ, ນະຄອນປາວຊານ, ກິ່ງແຂວງປົກຄອງຕົນເອງເຜົ່າລື້ ແລະ ເຜົ່າຈິງໂພ ເຕີຫົງ ແລະ ກິ່ງແຂວງປົກຄອງຕົນເອງເຜົ່າຮານີເຜົ່າຢີ ຫົງເຫີ ໄດ້ດຶງດູດສາຍຕາຂອງແຂກຜູ້ມີກຽດທີ່ມາຈາກປະເທດແມ່ນໍ້າລ້ານຊ້າງ-ແມ່ນໍ້າຂອງຕ່າງໆ.
ຢູ່ເຂດວາງສະແດງຂອງນະຄອນເຕີຫົງ, ຜະລິດຕະພັນປະເພດໝາກຮາວາຍທີ່ມີຫຼາກຫຼາຍສີສັນ ເຊັ່ນ: ນໍ້າຕານໝາກຮາວາຍ, ນໍ້າມັນໝາກຮາວາຍແກ່ນໝາກຮາວາຍ, ຂະໜົມໝາກຮາວາຍ ແລະ ໝາກຮາວາຍເປັນຕົ້ນ ໄດ້ດຶງດູດນັກທ່ອງທ່ຽວເປັນຈຳນວນຫຼວງຫຼາຍ. ພະນັກງານແນະນຳໃຫ້ຮູ້ວ່າ: “ຜະລິດຕະພັນຫຼາກຫຼາຍສີສັນໄດ້ຕອບສະໜອງຄວາມຕ້ອງການຂອງລູກຄ້າຕ່າງກັນ.” ພະນັກງານທັງແນະນຳ ທັງເຊີນຊວນລູກຄ້າຊິມຜະລິດຕະພັນເຫຼົ່ານີ້.
ຢູ່ເຂດວາງສະແດງມໍລະດົກວັດທະນະທຳນາມມະທຳ ນະຄອນລິນຊາງ, ທ່ານ ຈຽນລຽງເລຂາແຫ່ງລັດ ກະຊວງຖະແຫຼງຂ່າວກຳປູເຈຍຖາມວ່າ: “ນີ້ແມ່ນຊາຫຍັງ? ຂ້ອຍຊິມເບິ່ງໄດ້ບໍ່?”ພະນັກງານຕອບວ່າ: “ນີ້ແມ່ນຊາເກິງມາ ຂອງນະຄອນລິນຊາງພວກເຮົາ, ຫອມຫຼາຍ, ເຊີນ.” ຊາເກິງມາ ແມ່ນໜຶ່ງໃນຊາບູຮານ ຂອງນະຄອນລິນຊາງ, ມີຈຳນວນໜ້ອຍທີ່ສຸດ.
ເຂດວາງສະແດງນະຄອນປາວຊານສ່ວນຫຼາຍແມ່ນເພັດພອຍ, ແຂກຜູ້ມີກຽດຈາກປະເທດຕ່າງໆໄດ້ສົນໃຈນຳເຂດວາງສະແດງເຄື່ອງເອ້ຫີນໂມລາແດງທີ່ຜະລິດຈາກນະຄອນປາວຊານ ແລະ ອຸທານວ່າ: “ເພັດພອຍເຄື່ອງນີ້ຈັ່ງແມ່ນງາມແທ້!” ພະນັກງານເຂດວາງສະແດງໄດ້ແນະນຳວ່າ, ຫີນໂມລາແດງນິ້ມນວນດີ ແລະ ນະຄອນປາວຊານເປັນ 1 ໃນ 3 ເຂດຜະລິດຫີນໂມລາແດງທີ່ມີຊື່ສຽງຂອງຈີນຢູ່ເຂດວາງສະແດງມໍລະດົກວັດທະນະທຳນາມມະທຳ ນະຄອນຫົງເຫີ, ແວ່ນ, ປອກແຂນ ແລະ ກະຕ່ານ້ອຍ ທີ່ປະດັບດ້ວຍລວດລາຍເຜົ່າຢີ ໄດ້ກາຍເປັນຜະລິດຕະພັນທີ່ໄດ້ຮັບຄວາມນິຍົມຊົມຊອບຈາກແຂກທັງຫຼາຍ. ຈົນມີແຂກຖາມວ່າ: “ລວດລາຍຕາມລິບສະຕິກ ແລະແວ່ນເຫຼົ່ານີ້ງາມອີ່ຫຼີ! ນີ້ໄດ້ໃຊ້ສີມືພິເສດແນວໃດແດ່?” ນອກຈາກນີ້ແລ້ວ, ເຂດວາງສະແດງນະຄອນຫົງເຫີຍັງໄດ້ວາງສະແດງຜະລິດຕະພັນສ້າງສັນດ້ານມໍລະດົກວັດທະນະທຳນາມມະທຳຕ່າງໆ ເຊັ່ນ: ເຄື່ອງເງິນ, ເຄື່ອງຊື່ນ, ເຄື່ອງປັ້ນດິນເຜົາ ແລະອື່ນໆ.
(ແຫຼ່ງຂ່າວ: ໜັງສືພິມລາຍວັນຢຸນນານ)