ຂ່າວສານຢຸນນານ·ຈີນ| RCEP ມີຜົນບັງຄັບໃຊ້ຮອບດ້ານ ເພີ່ມພະລັງຂັບເຄື່ອນອັນແຂງແຮງ ໃຫ້ແກ່ຂະບວນການເຊື່ອມໂຍງເຂົ້າກັນຂອງເສດຖະກິດພາກພື້ນ
ວັນທີ 2 ມິຖຸນາຜ່ານມາ, ສັນຍາວ່າດ້ວຍການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ ຫຼື RCEP ມີຜົນບັງຄັບໃຊ້ຕໍ່ຟິລິບປິນຢ່າງເປັນທາງການ ຊຶ່ງ ໝາຍຄວາມວ່າ RCEP ໄດ້ມີຜົນບັງຄັບໃຊ້ຢ່າງຮອບດ້ານຕໍ່ 15 ປະເທດພາຄີ, ແລະ ຍັງໝາຍຄວາມວ່າ ເຂດການຄ້າເສລີທີ່ມີປະຊາກອນຫຼາຍທີ່ສຸດ, ມີຂະໜາດເສດຖະກິດການຄ້າໃຫຍ່ທີ່ສຸດ ແລະ ມີຄວາມສາມາດບົ່ມຊ້ອນດ້ານການພັດທະນາທີ່ສຸດໃນໂລກ ໄດ້ກ້າວເຂົ້າສູ່ໄລຍະການປະຕິບັດຢ່າງຮອບດ້ານ, ທັງ ໝົດເຫຼົ່ານີ້ຈະນໍາເອົາພະລັງຂັບເຄື່ອນຢ່າງແຂງແຮງໃຫ້ແກ່ຂະບວນການເຊື່ອມໂຍງເຂົ້າກັນດ້ານເສດຖະກິດຂອງພາກພື້ນ.
ວັນທີ 15 ພະຈິກ 2020, 10 ປະເທດອາຊຽນ, ອົສຕຣາລີ, ຈີນ, ຍີ່ປຸ່ນ, ສ.ເກົາຫຼີ ແລະນູແວນເຊລັງ ໄດ້ຮ່ວມກັນລົງນາມໃນ RCEP, ພ້ອມທັງຊຸກຍູ້ສັນຍາດັ່ງກ່າວໃຫ້ມີຜົນບັງຄັບໃຊ້ຢ່າງເປັນທາງການໃນວັນທີ1 ມັງກອນ 2022. ປະຊາກອນ, ຍອດມູນຄ່າ GDP ແລະ ມູນຄ່າການຄ້າສິນຄ້າປະເພດຈັບຕ້ອງໄດ້ໃນບັນດາປະເທດສະມາຊິກ RCEP ໄດ້ກວມເອົາເຖິງ 30% ຂອງໂລກ.
ທ່ານ ອາວເຟຼໂດ ປາສຄູອາວ ລັດຖະມົນຕີກະຊວງການຄ້າ ແລະ ອຸດສາກະກໍາຟິລິບປິນ ກ່າວວ່າ, RCEP ຈະນໍາເອົາຜົນປະໂຫຍດຫຼາຍກວ່າເກົ່າໃຫ້ແກ່ວິສາຫະກິດຂະໜາດກາງ ແລະ ຂະໜາດນ້ອຍຂອງຟິລິບປິນ, ພ້ອມທັງເຮັດໃຫ້ວິສາຫະກິດດັ່ງກ່າວມີໂອກາດເຂົ້າຮ່ວມການແບ່ງງານໃນຕ່ອງໂສ້ຄຸນຄ່າທົ່ວໂລກ. ລັດຖະບານຟິລິບປິນຈະເນັ້ນໃສ່ການເຜີຍແຜ່ກະຕິກາ ແລະ ທ່າແຮງຂອງ RCEP ໄປຍັງວົງການທຸລະກິດໃຫ້ທົ່ວເຖິງ, ເພື່ອຊ່ວຍວິສາຫະກິດຂະໜາດກາງ ແລະ ຂະໜາດນ້ອຍ ໝູນໃຊ້ເວທີການຄ້າເສລີທີ່ເປີດປະຕູສູ່ພາຍນອກ ແລະ ໂອບເອື້ອອາລີດັ່ງກ່າວໃຫ້ໄດ້ດີກວ່າເກົ່າ.
ທ່ານ ແອນໂທນີ ອາສເດັນກົງສຸນໃຫຍ່ ອົສຕຣາລີ ປະຈໍານະຄອນກວາງໂຈ່ວ ສປ ຈີນ ກ່າວວ່າ, RCEP ມີຜົນດີຕໍ່ການຊຸກຍູ້ຂະບວນການເຊື່ອມໂຍງເຂົ້າກັນດ້ານເສດຖະກິດ, ຈະສ້າງໂອກາດການຄ້າທີ່ດີກວ່າເກົ່າໃຫ້ແກ່ວິສາຫະກິດຂອງອົສຕຣາລີ, ຈີນ ແລະ ປະເທດສະມາຊິກ RCEP ອື່ນໆ, ພ້ອມທັງຈະຊຸກຍູ້ການເຕີບໂຕດ້ານເສດຖະກິດຂອງອາຊີ.
ທ່ານ ເອັດດີ ພຼິໂອ ແພມດີ ຮອງລັດຖະມົນຕີ ກະຊວງວາງແຜນເສດຖະກິດອິນໂດເນເຊຍ ກ່າວວ່າ, ໃນຖານະທີ່ເປັນກຸ່ມເສດຖະກິດໃຫຍ່ອັນດັບສອງຂອງໂລກທີ່ມີປະຊາກອນ 1,4 ຕື້ຄົນ, ຈີນໄດ້ສະໜອງໂອກາດການບໍລິໂພກອັນມະຫາສານໃຫ້ແກ່ປະເທດສະມາຊິກ RCEP, ຈີນຈະເສີມຂະຫຍາຍບົດບາດອັນສໍາຄັນຕໍ່ຂອບ RCEP.
ຕາມຂໍ້ມູນຂອງກະຊວງການຄ້າຈີນໃຫ້ຮູ້ວ່າ, ນັບແຕ່ເດືອນມັງກອນຫາເດືອນເມສາປີ 2023, ຍອດມູນຄ່າການຄ້າຂາເຂົ້າ-ຂາອອກ ລະຫວ່າງຈີນກັບ ປະເທດສະມາຊິກ ອື່ນໆຂອງ RCEP ມີເຖິງ 4.120 ຕື້ຢວນຈີນ, ເພີ່ມຂຶ້ນ 7,3% ເມື່ອທຽບໃສ່ໄລຍະດຽວກັນຂອງປີກາຍ, ກວມເອົາ 30,9% ຂອງຍອດມູນຄ່າການຄ້າຂາເຂົ້າ-ຂາອອກຂອງຈີນ.
(ລວມຂ່າວຈາກສໍານັກຂ່າວຊິນຮວາ) ບັນນາທິການ: ວິມົນ