ຂ່າວສານຢຸນນານ·ຈີນ| "ການພັດທະນາຢ່າງມີຄຸນນະພາບສູງຂອງຈີນສະໜອງໂອກາດ ທີ່ຫາຍາກໃຫ້ແກ່ພວກເຮົາ"
ເມື່ອບໍ່ດົນມານີ້, ທ່ານ ອີຣອນ ມັສ ຜູ້ບໍລິຫານທຸລະກິດສູງສຸດຂອງບໍລິສັດ ເທສລາຂອງອາເມຣິກາໄດ້ມາຢ້ຽມຢາມປະເທດຈີນ ໄດ້ກ່າວວ່າ: ຂ້າພະເຈົ້າຢາກບອກໃຫ້ທົ່ວໂລກຮູ້ວ່າ, ໂຮງງານເທສລາ ສາຂາຊຽງໄຮ້ ບໍ່ພຽງແຕ່ເປັນໂຮງງານທີ່ມີປະສິດທິພາບສູງທີ່ສຸດໃນໂລກເທົ່ານັ້ນ, ຫາກຍັງໄດ້ຜະລິດລົດທີ່ມີຄຸນນະພາບດີທີ່ສຸດໃນໂລກ... ຂ້າພະເຈົ້າເຫັນວ່າອະນາຄົດມີຄວາມປອດໂປ່ງສົດໃສ ແລະ ເປັນທີ່ໜ້າຄອງຄອຍຫຼາຍ. ນອກຈາກ ທ່ານ ອີຣອນ ມັສ ແລ້ວ, ຍັງມີຜູ້ບໍລິຫານລະດັບສູງຫຼາຍທ່ານ ໄດ້ເດີນທາງມາຢ້ຽມຢາມປະເທດຈີນ.
ໃນຫວ່າງມໍ່ໆມານີ້, ກອງປະຊຸມສຸດຍອດຈີນທົ່ວໂລກຂອງ ບໍລິສັດເຈ.ພີ.ມໍແກນ ຄັ້ງທີ 19 ໄດ້ຈັດຂຶ້ນຢູ່ ນະຄອນຊຽງໄຮ້ ສປ ຈີນ, ມີຜູ້ບໍລິຫານທຸລະກິດສູງສຸດຂອງບໍລິສັດສະຕາຣບັກ ແລະ ຫຼາຍວິສາຫະກິດຂອງອາເມຣິກາໄດ້ເຂົ້າຮ່ວມກອງປະຊຸມດັ່ງກ່າວ. ກ່ອນໜ້ານີ້ບໍ່ດົນ, ທ່ານທິມ ຄູກ ຜູ້ບໍລິຫານທຸລະກິດສູງສຸດຂອງບໍລິສັດ Apple, ທ່ານນາງ ມາຣີ ໂບຣາ ຜູ້ບໍລິຫານທຸລະກິດສູງສຸດຂອງບໍລິສັດ GE ຂອງອາເມຣິກາ ໄດ້ມາຢ້ຽມຢາມປະເທດຈີນຕາມໆກັນ.
ອີກດ້ານໜຶ່ງ, ມີວິສາຫະກິດຕ່າງປະເທດຫຼາຍແຫ່ງໄດ້ສືບຕໍ່ເພີ່ມການລົງທຶນຢູ່ປະເທດຈີນ. ທ້າຍເດືອນມີນາປີນີ້, ໃນກອງປະຊຸມປະຈໍາປີ 2023 ຂອງເວທີປຶກສາຫາລືລະດັບສູງກ່ຽວກັບການພັດທະນາຂອງຈີນທີ່ຈັດຂຶ້ນຢູ່ນະຄອນຫຼວງປັກກິ່ງ, ການລົງທຶນຢູ່ປະເທດຈີນ ໄດ້ກາຍເປັນແຜນການໃໝ່ຂອງວິສາຫະກິດໃຫຍ່ 500 ແຫ່ງຂອງໂລກ ແລະ ວິສາຫະກິດຂ້າມຊາດຕ່າງໆ.
ທ່ານ ໂອລາ ຄາເລນຽສ ປະທານກຸ່ມບໍລິສັດ ເມີຊີເດສ ເບນສ໌ ເອຈີ ຄອນລິນສັນ ກ່າວວ່າ: ພວກເຮົາຈະສືບຕໍ່ລົງທຶນຢູ່ປະເທດຈີນແບບຄົບວົງຈອນ, ການພັດທະນາຢ່າງມີຄຸນນະພາບສູງ ແລະ ການເປີດປະຕູສູ່ພາຍນອກຂອງຈີນ ໄດ້ສະໜອງໂອກາດທີ່ຫາຍາກໃຫ້ແກ່ພວກເຮົາ. ໃນຂະນະທີ່ເພີ່ມທະວີການລົງທຶນຢູ່ປະເທດຈີນ, ວິສາຫະກິດທຶນຕ່າງປະເທດກໍໄດ້ປັບປຸງໂຄງປະກອບດ້ານອຸດສາຫະກຳຂອງຕົນຢູ່ຈີນໃຫ້ສົມບູນຂຶ້ນຕື່ມອີກ.
ຕາມ “ບົດວິເຄາະສະພາບແວດລ້ອມດ້ານການດໍາເນີນທຸລະກິດຂອງທຶນຕ່າງປະເທດຢູ່ຈີນປະຈຳໄຕມາດທີໜຶ່ງ ປີ 2023” ຂອງສະມາຄົມສົ່ງເສີມການຄ້າຈີນໃຫ້ຮູ້ວ່າ, ໃນໄຕມາດທີໜຶ່ງປີນີ້, ວິສາຫະກິດທຶນຕ່າງປະເທດທີ່ຕອບການສໍາພາດ 80% ແມ່ນມີ ຄວາມເພິ່ງພໍໃຈຕໍ່ການບໍລິການດ້ານການເສຍສ່ວຍສາອາກອນ, ການຄ້າຂ້າມຊາຍແດນ ແລະ ການແກ້ໄຂ້ຂໍ້ຂັດແຍງດ້ານທຸລະກິດຂອງຈີນ. ວິສາຫະກິດທຶນຕ່າງປະເທດ 97% ມີຄວາມເພິ່ງພໍໃຈ ນໍານະໂຍບາຍຕໍ່ວິສາຫະກິດທຶນຕ່າງປະເທດທີ່ລັດຖະບານຈີນວາງອອກ ນັບແຕ່ໄຕມາດທີ 4 ຂອງປີກາຍເປັນຕົ້ນມາ.
(ລວມຂ່າວຈາກໜັງສືພິມຊາວໜຸ່ມຈີນ ແລະ ສື່ມວນຊົນຕ່າງໆ)