ຂ່າວສານຢຸນນານ·ຈີນ| ໝາກໄມ້ຂອງໄທຖືກຂົນສົ່ງໄປຈີນ ໂດຍຜ່ານທາງລົດໄຟ ລາວ-ຈີນ

ວັນທີ 27 ມິຖຸນາຜ່ານມາ, ຂະບວນລົດໄຟ 2 ຂະບວນທີ່ໄດ້ບັນທຸກໝາກຖົ່ວລຽນ ແລະ ໝາກມັງຄຸດແຊ່ເຢັນໄດ້ເດີນທາງໄປເຖິງສະຖານີລົດໄຟຕູ້ຄອນເທນເນີວາງເຈ່ຍຢິງຕາເວັນຕົກຂອງນະຄອນຄຸນໝິງ, ຂະບວນລົດໄຟເດີນທາງອອກຈາກສະຖານີວຽງຈັນໃຕ້ຂອງລາວໄປເຖິງນະຄອນຄຸນໝິງຂອງຈີນໃຊ້ເວລາພຽງ 26 ຊົ່ວໂມງເທົ່ານັ້ນ, ເມື່ອໝາກໄມ້ຖືກຂົນສົ່ງໄປເຖິງນະຄອນຄຸນໝິງແລ້ວ, ກໍຖືກແບ່ງອອກຂົນສົ່ງໄປເຖິງຕະຫຼາດໝາກໄມ້ໃຫຍ່ແຫ່ງຕ່າງໆໃນທົ່ວປະເທດຈີນຢ່າງວ່ອງໄວ. ໃນໄລຍະມໍ່ໆມານີ້, ສະພາບການແບບນີ້ມີໃຫ້ເຫັນຢູ່ທຸກມື້.

ໝາກໄມ້ເຂດຮ້ອນຮັກສາໄວ້ໄດ້ບໍ່ດົນ. ເຮັດແນວໃດ ເພື່ອຂົນສົ່ງໝາກໄມ້ເຂດຮ້ອນຈາກແຫຼ່ງຜະລິດເຖິງຕະຫຼາດບໍລິໂພກຢ່າງວ່ອງໄວ ແມ່ນບັນຫາຄວາມຫຍຸ້ງຍາກສຳລັບຂະແໜງການຈໍລະຈອນສິນຄ້າມາໂດຍຕະຫຼອດ. ໂດຍສະເພາະແມ່ນໝາກຖົ່ວລຽນ ທີ່ຖືກເອີ້ນວ່າເປັນ “ກະສັດໝາກໄມ້”, ຕ້ອງຖືກຂົນສົ່ງໃນຕູ້ແຊ່ເຢັນທີ່ມີອຸນຫະພູມລົບ 18 ອົງສາ, ປ້ອນເຂົ້າຕະຫຼາດກ່ອນມື້ໜຶ່ງ ຫຼື ຫຼັງມື້ໜຶ່ງ, ຈະມີຄຸນນະພາບຕ່າງກັນຫຼາຍ ແລະ ຕົ້ນທຶນໃນການຂົນສົ່ງກໍແຕກຕ່າງກັນຫຼາຍ.

ນັບແຕ່ມີການເປີດນຳໃຊ້ຂະບວນລົດໄຟຂົນສົ່ງໝາກໄມ້ສະເພາະຕາມທາງລົດໄຟ ລາວ-ຈີນ ເປັນຕົ້ນມາ, ການຂົນສົ່ງໝາກຖົ່ວລຽນໄທຮອດນະຄອນຄຸນໝິງຈາກ 5 ຫາ 7 ວັນໃນເມື່ອກ່ອນຫຼຸດລົງເປັນ 3 ວັນໃນປັດຈຸບັນ, ໄດ້ປະຢັດເວລາຫຼາຍມື້, ແຕ່ກ່ອນ, ຕ້ອງເດັດໝາກຖົ່ວລຽນສຸກລະດັບ 70% ເທົ່ານັ້ນ, ດຽວນີ້, ສາມາດໃຫ້ໝາກຖົ່ວລຽນສຸກເຖິງ 90%, ລົດຊາດແລະ ຄຸນນະພາບຂອງໝາກຖົ່ວລຽນກໍດີກວ່າແຕ່ກ່ອນຫຼາຍ, ບວກກັບວ່າ, ການຂົນສົ່ງຕາມທາງລົດໄຟ, ອັດຕາການຫຼຸ້ຍຫ້ຽນໃນການຂົນສົ່ງກໍໄດ້ຫຼຸດໜ້ອຍລົງ, ໄດ້ຫຼຸດຕົ້ນທຶນການນຳເຂົ້າໃຫ້ໜ້ອຍລົງໂດຍລວມ, ລາຄາຈຳໜ່າຍໃນຕະຫຼາດໄດ້ຫຼຸດລົງຢ່າງຈະແຈ້ງ. ມີຊາວເນັດຈີນວິຈານວ່າ: “ປີນີ້ກິນໝາກຖົ່ວລຽນໄດ້ສະບາຍ ຍ້ອນທາງລົດໄຟ ລາວ-ຈີນ”. ທາງລົດໄຟ ລາວ-ຈີນ ໄດ້ສ້າງຜົນປະໂຫຍດຕົວຈິງໃຫ້ແກ່ຜູ້ບໍລິໂພກຈີນ ແລະ ຊາວກະສິກອນປູກໝາກໄມ້ຂອງໄທ.

ບໍລິສັດການຄ້າສາຍຫາງຂອງນະຄອນຄຸນໝິງແຂວງຢຸນນານຈີນ ໄດ້ດຳເນີນການນຳເຂົ້າໝາກໄມ້ໄທມາເປັນເວລາ 10 ກວ່າປີແລ້ວ, ຕົ້ນຕໍຈະນຳເຂົ້າໝາກພຸກຂຽວ ແລະ ທຸກປີຈະນຳເຂົ້າໝາກພຸກຂຽວຈາກໄທຫຼາຍໝື່ນໂຕນ. ທ່ານຫຼີຮຸຍ ຜູ້ອຳນວຍການໃຫຍ່ລິສັດດັ່ງກ່າວກ່າວວ່າ: “ນັບແຕ່ປີ 2010 ເປັນຕົ້ນມາ, ໂດຍຜ່ານຈາກການຮ່ວມມືກັບຊາວກະສິກອນປູກໝາກໄມ້ຂອງໄທ, ປັດຈຸບັນ, ບໍລິສັດໄດ້ສ້າງຍີ່ຫໍ້ທີ່ມີຊື່ສຽງຫຼາຍຍີ່ຫໍ້.” ນັບແຕ່ຈີນໄດ້ຟື້ນຟູການແຈ້ງຜ່ານດ່ານຢ່າງວ່ອງໄວຢ່າງຮອບດ້ານໃນວັນທີ 15 ພຶດສະພາເປັນຕົ້ນມາ, ປະສິດທິພາບດ້ານການຈໍລະຈອນສິນຄ້າໄດ້ຖືກຍົກສູງຂຶ້ນຢ່າງຈະແຈ້ງ ຊຶ່ງໄດ້ຮັບປະກັນຄວາມສົດຂອງໝາກໄມ້ໃນຕະຫຼາດ ພ້ອມທັງໄດ້ຍົກຄຸນນະພາບ ແລະ ປະລິມານການຈຳໜ່າຍໝາກໄມ້ສູງຂຶ້ນ.

ຕາມສະຖິຕິ, 5 ເດືອນຕົ້ນປີນີ້, ດ່ານເມືອງຫຼ້າກິ່ງແຂວງສິບສອງພັນນາແຂວງຢຸນນານຈີນ ໄດ້ກວດກາ ແລະ ປ່ອຍໝາກໄມ້ນຳເຂົ້າປະເທດຈີນຜ່ານທາງລົດໄຟ ລາວ-ຈີນ 21.000 ກວ່າໂຕນ, ທາງລົດໄຟ ລາວ-ຈີນ ໄດ້ກາຍເປັນຊ່ອງທາງໃໝ່ສຳລັບໝາກໄມ້ປະເທດໄທເຂົ້າສູ່ປະເທດຈີນ. ປັດຈຸບັນ, ຂະບວນຂົນສົ່ງໝາກໄມ້ແຊ່ເຢັນຕາມທາງລົດໄຟ ລາວ-ຈີນ ໄດ້ເປີດມື້ລະຂະບວນ.

ຕາມສະຖິຕິຂອງພະແນກການຄ້າແຂວງຢຸນນານສະແດງໃຫ້ເຫັນວ່າ, ຍອດມູນຄ່າການຄ້າໝາກໄມ້ລະຫວ່າງແຂວງຢຸນນານກັບໄທໃນປີ 2022 ມີຫຼາຍກວ່າ 1 ຕື້ໂດລາ ຊຶ່ງໄດ້ກວມປະມານ 70% ຂອງຍອດມູນຄ່າການຄ້າຜະລິດຕະພັນກະສິກຳຂອງສອງຝ່າຍ. ໃນໄຕມາດທຳອິດປີ 2023, ຍອດມູນຄ່າການຄ້າໝາກໄມ້ລະຫວ່າງແຂວງຢຸນນານກັບໄທບັນລຸເຖິງ 165 ລ້ານໂດລາ.

ແຫຼ່ງຂ່າວ: ໜັງສືພິມລາຍວັນຢຸນນານ ແລະ ສື່ມວນຊົນຕ່າງໆ