ຈີນໄດ້ສ້າງຄວາມມະຫັດສະຈັນດ້ານການພັດທະນາ ທີ່ປະຈັກຕາຊາວໂລກ
ຫວ່າງມໍ່ໆມານີ້, ທ່ານແດນ ສະເຕອິນບົກ ຫົວໜ້າຫ້ອງການຄົ້ນຄວ້າການຄ້າສາກົນໃນສະຖາບັນຄົ້ນຄວ້າ ອິນເດຍ-ຈີນ-ອາເມຣິກາ ທີ່ເປັນອົງການທີ່ສຳຄັນຂອງອາເມຣິກາໄດ້ພິມບົດຄວາມວ່າ, ນັບແຕ່ຈີນໄດ້ປະຕິຮູບ ແລະ ເປີດປະຕູສູ່ພາຍນອກ 40 ກວ່າປີມານີ້, ຈີນໄດ້ສ້າງຄວາມມະຫັດສະຈັນດ້ານການພັດທະນາທີ່ປະຈັກຕາຊາວໂລກ.
ບົດຄວາມລະບຸວ່າ: ນັບແຕ່ຈີນໄດ້ປະຕິບັດນະໂຍບາຍປະຕິຮູບ ແລະ ເປີດປະຕູສູ່ພາຍນອກ ແຕ່ທ້າຍຊຸມປີ 1970 ເປັນຕົ້ນມາ, ຈີນໄດ້ສຸມໃສ່ຊຸກຍູ້ການປະຕິຮູບກະສິກຳ, ດຶງດູດການລົງທຶນຈາກຕ່າງປະເທດ, ນຳເຂົ້າເຕັກນິກສູງ ແລະ ໃໝ່ ແລະ ສົ່ງເສີມການສ້າງພາລະກິດ. ປັດຈຸບັນ, ຜູ້ປະດິດສ້າງໃໝ່ ແລະ ວິສາຫະກິດເຕັກນິກສູງ ແລະ ໃໝ່ຂອງຈີນ ໄດ້ກາຍເປັນບົດຮຽນທີ່ດີທີ່ເຮັດໃຫ້ທົ່ວໂລກຮຽນນຳ.
ນະຄອນເສິນເຈິ້ນແຂວງກວາງຕຸ້ງເປັນຕົວແບບສຳເລັດຜົນແຫ່ງການປະຕິຮູບ ແລະເປີດປະຕູສູ່ພາຍນອກຂອງຈີນ.ປີ 1979, ເສິນເຈິ້ນຍັງເປັນບ້ານປະມົງນ້ອຍບ້ານໜຶ່ງ. ປັດຈຸບັນ, ພົນລະເມືອງຂອງນະຄອນເສິນເຈິ້ນມີເກືອບ 18 ລ້ານຄົນ, GDP ສະເລ່ຍຕໍ່ຫົວຄົນສູງເຖິງ 27.000 ໂດລາ. ປີ 2018, ຄຽງຄູ່ກັບການສ້າງສາເຂດອ່າວໃຫຍ່ກວາງຕຸ້ງ-ຮົງກົງ-ມາເກົາ ໄດ້ຢ່າງບາດກ້າວໜັກແໜ້ນ, ການພັດທະນາເສດຖະກິດຂອງແຂວງກວາງຕຸ້ງໄດ້ກ້າວຂຶ້ນສູ່ລະດັບໃໝ່.
ປີ 2001, ຈີນໄດ້ເຂົ້າເປັນສະມາຊິກອົງການການຄ້າໂລກ ແລະ ໄດ້ກ້າວເຂົ້າສູ່ໄລຍະທີ່ເສດຖະກິດໄດ້ພັດທະນາຢ່າງວ່ອງໄວ. ນັບແຕ່ປີ 2012 ເປັນຕົ້ນມາ, ຈີນໄດ້ຊຸກຍູ້ໃຫ້ເສດຖະກິດມີຄວາມດຸນດ່ຽງຄືນໃໝ່ ບົນພື້ນຖານທີ່ມີຄວາມສາມາດດ້ານການປະດິດສ້າງໃໝ່ໃນລະດັບທີ່ນຳໜ້າຂອງໂລກ ແລະ ເປີດກວ້າງການບໍລິໂພກ. ສິ່ງທີ່ຕ້ອງເວົ້າເຖິງເປັນພິເສດນັ້ນກໍຄື: ການລຶບລ້າງຄວາມທຸກຍາກເດັດຖານຢູ່ປະເທດພວມພັດທະນາທີ່ມີປະຊາກອນ 1,4 ຕື້ກວ່າຄົນ ຈະເປັນຜົນສຳເລັດຄັ້ງປະຫວັດສາດ.
ບົດຄວາມລະບຸຕື່ມວ່າ, ການເຕີບໂຕຂອງທົ່ວໂລກຈະອີງອາໄສຈີນ ແລະ ກຸ່ມເສດຖະເກິດຈະເລີນໃໝ່ຂະໜາດໃຫຍ່ອື່ນໆນັບມື້ນັບຫຼາຍຂຶ້ນ. ບໍ່ຕ້ອງສົງໄສເລີຍວ່າ, ການພັດທະນາຂອງກຸ່ມເສດຖະກິດຈະເລີນໃໝ່ຕ້ອງການຄວາມກວມລວມ ແລະ ຂະບວນການໂລກາພິວັດ, ອະນາຄົດຄວນເປັນໂລກທີ່ມີລະບຽບຫຼາຍຂົ້ວທີ່ມີຄວາມໂອບເອື້ອອາລີກວ່າເກົ່າ, ຫາກບໍ່ແມ່ນໂລກທີ່ມີລະບຽບຫຼີກເວັ້ນຄົນອື່ນ.
(ແຫຼ່ງຂ່າວ: ໜັງສືພິມລາຍວັນຈີນ)