“ໜຶ່ງແລວໜຶ່ງເສັ້ນທາງ”ຊຸກຍູ້ການພັດທະນາ ຂອງອາຊີຕາເວັນອອກສ່ຽງໃຕ້
ຫວ່າງມໍ່ໆມານີ້, ທ່ານຈາງຈັກເຢນ(CHANG CHAK YAN) ຫົວໜ້າວິທະຍາໄລຂໍ້ມູນຂ່າວສານມາເລເຊຍໄດ້ພິມບົດຄວາມວ່າ, ນັບແຕ່ປີ 2013 ເປັນຕົ້ນມາ, ອາຊຽນພ້ອມດ້ວຍປະເທດສະມາຊິກອາຊຽນໄດ້ກາຍເປັນຄູ່ຮ່ວມມືສຳຄັນ ໃນການຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ”. ຈຳນວນໂຄງການທີ່ສ້າງສຳເລັດ ແລະ ກຳລັງກໍ່ສ້າງພາຍໃຕ້ຂອບ “ໜຶ່ງແລວໜຶ່ງເສັ້ນທາງ” ໄດ້ສະແດງໃຫ້ເຫັນວ່າ, ຂໍ້ລິເລີ່ມດັ່ງກ່າວເປັນຂໍ້ລິເລີ່ມທີ່ສ້າງຜົນປະໂຫຍດໃຫ້ແກ່ທຸກຝ່າຍ.
ກ່ອນອື່ນ, “ໜຶ່ງແລວ ໜຶ່ງເສັ້ນທາງ” ໄດ້ຊຸກຍູ້ການເຕີບໂຕດ້ານເສດຖະກິດ ແລະ ການພັດທະນາທາງສັງຄົມຂອງຫຼາຍປະເທດ. ການກໍ່ສ້າງທາງລົດໄຟ, ທາງຫຼວງ ແລະ ທ່າກຳປັ່ນໄດ້ປັບປຸງລະບົບຄົມມະນາຄົມຂົນສົ່ງ ຊຶ່ງໄດ້ກາຍເປັນເສົາຄ້ຳໃນການເຕີບໂຕດ້ານເສດຖະກິດ.ໂດຍໄດ້ຮັບຜົນປະໂຫຍດຈາກການກໍ່ສ້າງພື້ນຖານໂຄງລ່າງເຫຼົ່ານີ້, ຕົວເມືອງຕ່າງໆ, ຕາແສງຕ່າງໆ, ເຂດຊົນນະບົດຈົນເຖິງບ້ານທີ່ຢູ່ເຂດຫ່າງໄກສອກຫຼີກ ໄດ້ບັນລຸການເຊື່ອມຈອດກັນ ຊຶ່ງໄດ້ເລັ່ງຂະບວນການຈໍລະຈອນຂອງຜະລິດຕະພັນກະສິກຳ ແລະ ຜະລິດຕະພັນປະເພດອື່ນໆ, ພ້ອມທັງໄດ້ເປີດກວ້າງຕະຫຼາດ, ຫຼຸດອັດຕາຫວ່າງງານໃຫ້ຕ່ຳລົງ ແລະ ຊຸກຍູ້ພາລະກິດການສຶກສາ.
ສອງ, ໂດຍຜ່ານຈາກການກໍ່ສ້າງ ແລະ ປັບປຸງພື້ນຖານໂຄງລ່າງຕ່າງໆ ເຊັ່ນ: ທ່າກຳປັ່ນ, ສະໜາມບິນ ແລະ ທາງຫຼວງເປັນຕົ້ນໃຫ້ສົມບູນຂຶ້ນ, ໄດ້ຊ່ວຍຫຼາຍປະເທດເປີດກວ້າງການຄ້າກັບຕ່າງປະເທດ ຊຶ່ງມີບົດບາດຈະແຈ້ງທີ່ສຸດຕໍ່ລາວ, ກຳປູເຈຍ, ມຽນມາ, ມາເລເຊຍແລະ ອິນໂດເນເຊຍ. ພາຍໃຕ້ການຊຸກຍູ້ຂອງໂຄງການເຫຼົ່ານີ້, ອາຊຽນກາຍເປັນຄູ່ການຄ້າໃຫຍ່ອັນດັບໜຶ່ງຂອງຈີນ.
ສາມ, ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ໄດ້ຊ່ວຍປະເທດຈຳນວນໜຶ່ງບັນລຸສະຖຽນລະພາບທາງການເມືອງ, ໂດຍໄດ້ຊຸກຍູ້ການຍົກລະດັບຂອງສິ່ງກໍ່ສ້າງພື້ນຖານໂຄງລ່າງ ພາຍໃຕ້ຂອບ “ໜຶ່ງແລວ ໜຶ່ງເສັ້ນທາງ”, ປະເທດຈຳນວນໜຶ່ງໄດ້ເລັ່ງການພັດທະນາດ້ານເສດຖະກິດ ແລະໄດ້ສ້າງໂອກາດປະກອບອາຊີບເປັນຈຳນວນຫຼວງຫຼາຍ.
ສີ່, ການລົງທຶນ ແລະ ການຄ້າພາຍໃຕ້ຂອບ “ໜຶ່ງແລວ ໜຶ່ງເສັ້ນທາງ” ໄດ້ຊຸກຍູ້ການພັດທະນາຖາວອນຂອງປະເທດສະມາຊິກອາຊຽນ ພ້ອມທັງໄດ້ຍົກສູງຖານະໃຈກາງຂອງອາຊຽນໃນພາກພື້ນອາຊີປາຊີຟິກ.
ແຫຼ່ງຂ່າວ: ເວັບໄຊໜັງສືພິມລາຍວັນຈີນ