ນັກຊ່ຽວຊານອັງກິດ: ການຮ່ວມກັນສ້າງຂໍ້ລິເລີ່ມ ‘‘ໜຶ່ງແລວ ໜຶ່ງເສັ້ນທາງ’’ ໄດ້ສະໜອງເສັ້ນທາງການພັດທະນາທີ່ດີກວ່າເກົ່າໃຫ້ແກ່ປະຊາຄົມໂລກ
ຫວ່າງມໍ່ໆມານີ້, ທ່ານ ທອມເຟົາດີ ນັກຊ່ຽວຊານການເມືອງ ແລະ ການພົວພັນສາກົນອັງກິດໄດ້ຂຽນບົດຄວາມວ່າ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ໄດ້ເນັ້ນໃສ່ການຮ່ວມກັນຮັບມືກັບສິ່ງທ້າທາຍທີ່ທົ່ວໂລກປະເຊີນໜ້າຮ່ວມກັນ, ເພື່ອບັນລຸເປົ້າໝາຍການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ.
ໃນບົດຄວາມດັ່ງກ່າວລະບຸວ່າ, ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ໄດ້ຊຸກຍູ້ໃຫ້ເສດຖະກິດຂອງແຕ່ລະປະເທດ ມີການເຕີບໂຕຮ່ວມກັນ ແລະ ໄດ້ສົ່ງເສີມການແລກປ່ຽນດ້ານວັດທະນະທໍາ ໂດຍຜ່ານໂຄງການ ຂອງ “ໜຶ່ງແລວ ໜຶ່ງເສັ້ນທາງ” ໄດ້ແກ້ໄຂບັນຫາການພັດທະນາທີ່ບໍ່ດຸນດຽ່ງກັນ, ຊຶ່ງໄດ້ສ້າງໂອກາດໃໝ່ໃຫ້ແກ່ການຄ້າສາກົນ, ຊຸກຍູ້ໃຫ້ປະເທດຕ່າງໆສ້າງເປັນ “ປະຊາຄົມຮ່ວມຊາຕາກໍາ”.
ໃນບົດຄວາມໄດ້ລະບຸຕື່ມວ່າ, ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ໄດ້ຖືເອົາການຊຸກຍູ້ການພັດທະນາຮ່ວມກັນມາເປັນໜ້າທີ່ຂອງຕົນ, ສ້າງໂອກາດການພັດທະນາໃຫ້ແກ່ປະເທດຕ່າງໆ. ຍົກຕົວຢ່າງ ເສັ້ນທາງລົດໄຟ ລາວ-ຈີນທີ່ເປີດນໍາໃຊ້ໃນທ້າຍປີ 2021 ໄດ້ສ້າງທາງລົດໄຟສາຍໜຶ່ງໃຫ້ແກ່ປະເທດລາວ ຊຶ່ງໄດ້ມ້າງອຸປະສັກດ້ານທີ່ຕັ້ງພູມສາດ, ໄດ້ເປີດກວ້າງການຄ້າສົ່ງອອກຢ່າງຫຼວງຫຼາຍ, ຍັງໄດ້ຊຸກຍູ້ໃຫ້ປະເທດລາວຈາກປະເທດທີ່ບໍ່ມີຊາຍແດນຕິດກັບທະເລຫັນເປັນປະເທດທີ່ເຊື່ອມໂຍງເຊື່ອມຈອດກັບພາກພື້ນ.
ມາສັງເກດເບິ່ງຂົວພາດມາປະເທດບັງກາລະເທດທີ່ຈີນຊ່ວຍເຫຼືອກໍ່ສ້າງ, ໄດ້ສ້າງຂຶ້ນຕາມແມ່ນໍ້າທີ່ກວ້າງທີ່ສຸດຂອງປະທດດັ່ງກ່າວ ແລະ ເຮັດໃຫ້ທົ່ວປະເທດບັງກາລະເທດເຊື່ອມໂຍງເຊື່ອມຈອດກັນຢ່າງຮອບດ້ານ, ຂົວແຫ່ງດັ່ງກ່າວຖືກປະຊາຊົນບັງກາລະເທດເອີ້ນວ່າ: “ຂົວແຫ່ງຄວາມໄຝ່ຝັນ”.
ໃນບົດຄວາມຍັງໄດ້ລະບຸອີກວ່າ: ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ເປັນຂໍ້ລິເລີ່ມທີ່ຮອບດ້ານ, ສົ່ງເສີມລະບົບການຄ້າເສລີທີ່ເປີດປະຕູສູ່ພາຍນອກ. ບັນດາປະເທດພວມພັດທະນາຂອງໂລກ ສາມາດຖອດຖອນບົດຮຽນການພັດທະນາຂອງຈີນ, ເລືອກເອົາເສັ້ນທາງການພັດທະນາຂອງປະເທດຕົນ ໂດຍອີງໃສ່ສະພາບຂອງປະເທດຕົນ ບົນພື້ນຖານປົກປັກຮັກສາອະທິປະໄຕຂອງປະເທດຕົນ.
ແຫຼ່ງຂ່າວ:ເວັບໄຊໜັງສືພິມລາຍວັນຈີນ, ບົດນີ້ມີການຄັດຈ້ອນ