ຂ່າວສານຢຸນນານ·ຈີນ| ຈີນຟື້ນຟູການໄປທ່ຽວຕ່າງປະເທດ ເພີ່ມຄວາມໝັ້ນໃຈໃຫ້ແກ່ການຟື້ນຕົວຂອງການທ່ອງທ່ຽວທ່ົວໂລກ
ວັນທີ 18 ກຸມພາຜ່ານມາ, ນັກທ່ອງທ່ຽວຈີນຈໍານວນ 210 ຄົນໄດ້ຂີ່ເຮືອບິນເໝົາລໍາຖ້ຽວບິນ Indonesian Lion Airlines ເດີນທາງຈາກເກາະບາຫຼີ ຂອງອິນໂດເນເຊຍ ກັບຄືນນະຄອນເຊິ່ນເຈີ້ນ ແຂວງກວາງຕຸ້ງຈີນ. ນີ້ແມ່ນຄັ້ງທີ 4 ໃນການຂີ່ເຮືອບິນເໝົາລໍາ ໄປ-ກັບ ລະຫວ່າງເຊິ່ນເຈີ້ນ ແລະ ເກາະບາຫຼີ ຂອງນັກທ່ອງທ່ຽວຈີນໃນປີນີ້. ໃນ 7 ມື້ກ່ອນໜ້ານັ້ນ, ເວລາເຮືອບິນລົງຮອດສະໜາມບິນເກາະບາຫຼີ, ພະນັກງານສະໜາມບິນໄດ້ມອບພວງມະໄລດອກໄມ້ຕ້ອນຮັບແຂກໃຫ້ແກ່ນັກທ່ອງທ່ຽວຈີນທຸກຄົນ, ຜູ້ນໍາທ່ຽວທ້ອງຖິ່ນໄດ້ແນະນໍາທິວທັດຂອງເກາະບາຫຼີຢ່າງອົບອຸ່ນ.
ຄຽງຄູ່ກັບປະເທດຈີນຟື້ນຟູການໄປທ່ຽວຕ່າງປະເທດຂອງພົນລະເມືອງຢ່າງເປັນລະບຽບ, ຄະນະນັກທ່ອງທ່ຽວຂອງຈີນຊຸດທໍາອິດທີ່ເດີນທາງໄປທ່ຽວບັນດາປະເທດທີ່ເປັນຈຸດທົດລອງເຊັ່ນ: ໄທ, ອິນໂດເນເຊຍ, ກໍາປູເຈຍ, ສິງກະໂປ, ອາລັບເອມິເລດ, ອີຢິບ ເປັນຕົ້ນ ໄດ້ເດີນທາງກັບຄືນປະເທດຈີນຕາມໆກັນ, ຢູ່ປະເທດທີ່ກ່ຽວຂ້ອງ, ນັກທ່ອງທ່ຽວຈີນໄດ້ຮັບການຕ້ອນຮັບຢ່າງອົບອຸ່ນ.
ກ່ອນເກີດການແຜ່ລະບາດຂອງພະຍາດໂຄວິດ-19, ປະເທດຈີນເປັນຕະຫຼາດທ່ອງທ່ຽວທີ່ມີນັກທ່ອງທ່ຽວໄປທ່ຽວຕ່າງປະເທດຫຼາຍທີ່ສຸດໃນໂລກເປັນຫຼາຍປີລຽນຕິດກັນ, ນັກທ່ອງທ່ຽວຈີນ ແມ່ນກຸ່ມບໍລິໂພກການທ່ອງທ່ຽວຕ່າງປະເທດ ທີ່ໃຫຍ່ທີ່ສຸດໃນທົ່ວໂລກ. ປີ 2019, ຈໍານວນພົນລະເມືອງຈີນທີ່ໄປທ່ຽວຕ່າງປະເທດມີເຖິງ 155 ລ້ານເທື່ອຄົນ. ໃນສາຍຕາຂອງບຸກຄົນໃນວົງການທ່ອງທ່ຽວສາກົນແລ້ວ, ການໄປທ່ຽວຕ່າງປະເທດຂອງຈີນ ໄດ້ຟື້ນຟູຢ່າງເປັນລະບຽບ ແລະ ອົບອຸ່ນຄືນມາຢ່າງໄວວາ, ຊຶ່ງເປັນຜົນດີຕໍ່ການຟື້ນຕົວຄືນຂອງຕະຫຼາດທ່ອງທ່ຽວທົ່ວໂລກ, ນຳພາການບໍລິໂພກຢູ່ຈຸດໝາຍປາຍທາງທ່ອງທ່ຽວ ແລະ ການຂະຫຍາຍຕົວຂອງເສດຖະກິດກວມລວມໃນອະນາຄົດ.
ໃນເວທີປຶກສາຫາລືການທ່ອງທ່ຽວ ອາຊຽນ ປີ 2023 ທີ່ຈັດຂຶ້ນໃນຫວ່າງມໍ່ໆມານີ້, ບັນດາປະເທດໃນອາຊຽນຄອງຄອຍຢ່າງຈົດຈໍ່ໃຫ້ນັກທ່ອງທ່ຽວຈີນກັບມາທ່ຽວປະເທດຕົນ. ທ່ານ ຊານເດຍ ກາອູໂນ ລັດຖະມົນຕີກະຊວງການທ່ອງທ່ຽວ ແລະ ເສດຖະກິດຫົວຄິດປະດິດສ້າງ ຂອງອິນໂດເນເຊຍ ກ່າວວ່າ: ຫຼັງຈາກປະເທດຈີນເລີ່ມເປີດການໄປທ່ຽວຕ່າງປະເທດຄືນໃໝ່ແລ້ວ, ຂະແໜງການທ່ອງທ່ຽວຂອງອາຊຽນຈະຟື້ນຕົວຄືນຢ່າງແຂງແຮງ.
“ນັບແຕ່ເດືອນ ກຸມພາປີນີ້ ເປັນຕົ້ນມາ, ຂ້າພະເຈົ້າໄດ້ຕ້ອນຮັບຄະນະນັກທ່ອງທ່ຽວ 3 ຄະນະຈາກແຂວງຢຸນນານ, ແຂວງກວາງຕຸ້ງ ແລະ ແຂວງເສສວນຂອງປະເທດຈີນ”. ທ້າວ ສຸລິເດດ ລາວັນພອນ ທີ່ເປັນຜູ້ນໍາທ່ຽວປະເທດລາວ ທີ່ຮູ້ພາສາຈີນເວົ້າວ່າ: ເມື່ອທຽບໃສ່ໄລຍະທີ່ນັກທ່ອງທ່ຽວຈີນຂັບລົດມາເອງມາທ່ຽວປະເທດລາວແລ້ວ, ດຽວນີ້ນັກທ່ອງທ່ຽວສ່ວນຫຼາຍຈະເລືອກໃຊ້ຂະບວນລົດໄຟຕາມທາງລົດໄຟ ລາວ-ຈີນ. ລາວເວົ້າວ່າ: “ຂ້ອຍຕ້ອງທຳການກະກຽມໃຫ້ຫຼາຍກວ່າເກົ່າ, ຮຽນຮູ້ຄວາມຮູ້ທາງດ້ານວັດທະນະທໍາ ແລະ ປະຫວັດສາດຂອງປະເທດລາວໃຫ້ຫຼາຍຂຶ້ນກວ່າເກົ່າ, ເອົາໃຈໃສ່ໃນການບໍລິການຕ້ອນຮັບໃຫ້ດີ, ເພື່ອໃຫ້ນັກທ່ອງທ່ຽວແຕ່ລະຄົນໄດ້ຮັບຄວາມຮູ້ ແລະ ປະສົບການທີ່ດີທີ່ສຸດ ແລະ ສາມາດເກີດຄວາມປະທັບໃຈອັນດີງາມຕໍ່ປະເທດລາວອີກດ້ວຍ.”
ກຸ່ມບໍລິສັດ ອິນທິລາດ ດໍາເນີນທຸລະກິດການບໍລິການທີ່ມີຊື່ສຽງຫຼາຍຢູ່ປະເທດລາວ, ທ່ານ ອິນທິລາດ ປະທານຝ່າຍບໍລິຫານຂອງກຸ່ມບໍລິສັດໄດ້ດຳເນີນທຸລະກິດການບໍລິການດ້ານອາຫານການກິນມາໄດ້ 20 ກວ່າປີ ກ່າວວ່າ: ການຟື້ນຟູຢ່າງເປັນລະບຽບຂອງການໄປທ່ຽວຕ່າງປະເທດຂອງຈີນຈະສົ່ງເສີມໃຫ້ກິດຈະການທ່ອງທ່ຽວ ແລະ ເສດຖະກິດຂອງປະເທດລາວຟື້ນຕົວຄືນຢ່າງຈະແຈ້ງ. “ພວກເຮົາຄອງຄອຍນັກທ່ອງທ່ຽວຈີນກັບມາທ່ຽວປະເທດລາວ.”
ອົງການທ່ອງທ່ຽວສາກົນແຫ່ງສະຫະປະຊາຊາດຄາດຄະເນວ່າ: ປີ 2023 ຈໍານວນນັກທ່ອງທ່ຽວສາກົນໃນທົ່ວໂລກອາດຈະຟື້ນຟູຮອດ 80% ຫາ 95% ຂອງລະດັບກ່ອນເກີດການແຜ່ລະບາດຂອງພະຍາດໂຄວິດ-19. ໃນຖານະທີ່ເປັນຕະຫຼາດໄປທ່ຽວຕ່າງປະເທດທີ່ໃຫຍ່ທີ່ສຸດໃນໂລກໃນປີ 2019 ນັ້ນ, ປະເທດຈີນຟື້ນຟູການໄປທ່ຽວຕ່າງປະເທດຂອງພົນລະເມືອງຢ່າງເປັນລະບຽບຈະສົ່ງເສີມໃຫ້ຂະແໜງການທ່ອງທ່ຽວຢູ່ພາກພື້ນອາຊີປາຊີຟິກ ຈົນຮອດທົ່ວໂລກຟື້ນຕົວຄືນຢ່າງແຂງແຮງ.
(ຂ່າວ: ໜັງສືພິມປະຊາຊົນລາຍວັນຂອງຈີນ, ສໍານັກຂ່າວຊິນຮວາ)