ສາຍການບິນສາກົນນະຄອນຫຼວງວຽງຈັນ-ນະຄອນ ຊາງສາ ໄດ້ຟື້ນຟູການບໍລິການຢ່າງເປັນທາງການ

ເວລາ 16:40 ຂອງວັນທີ 28 ເມສາ​ຜ່ານ​ມາ, ຍົນໂດຍສານລຸ້ນ​ແອ​ບັດ-320 ຂອງບໍລິສັດ​ສາຍການບິນລາວ ໄດ້ລົງຈອດຢູ່ສະໜາມບິນຮວງຮວາ ນະຄອນຊາງສາ ແຂວງຫູໜານ ສ​ປ ຈີນ, ຊຶ່ງ​ເປັນ​ຂີດ​ໝາຍ​ສະ​ແດງ​ໃຫ້​ເຫັນ​ວ່າ: ສາຍການບິນສາກົນນະຄອນຫຼວງວຽງຈັນ - ນະຄອນຊາງສາ ໄດ້ຟື້ນຟູການບໍລິການຢ່າງເປັນທາງການແລ້ວ.

ສາຍການບິນ ສາກົນນະຄອນຫຼວງວຽງຈັນ - ນະຄອນຊາງສາ ໄດ້ເປີດບໍລິການຕັ້ງແຕ່ປີ 2015, ໄດ້ໂຈະການບິນຍ້ອນການ​ແຜ່ລະບາດຂອງພະຍາດໂຄວິດ-19. ​ພາຍຫຼັງຟື້ນຟູການບໍລິການ​ຄືນ​ໃໝ່ແລ້ວ, ສາຍ​ການ​ບິນ​ດັ່ງ​ກ່າວ​ຈະບິນໄປກັບໃນທຸກວັນຈັນ ແລະ ວັນສຸກ. ເວລາບິນຈາກນະຄອນຫຼວງວຽງຈັນຫາຊາງສາ ແມ່ນ 13:25-16:40 ແລະ ເວລາການບິນຈາກຊາງສາຫານະຄອນຫຼວງວຽງຈັນແມ່ນ 17:40-19:10 (ເວລາດັ່ງກ່າວລ້ວນແຕ່ເປັນເວລາຂອງທ້ອງຖິ່ນ, ຊຶ່ງເວລາວຽງຈັນຈະຊ້າກວ່າເວລາ​ປັກ​ກິ່ງ 1 ຊົ່ວໂມງ).

ໃນ​ຊຸມ​ປີມໍ່ໆມານີ້, ແຂວງຫູໜານ ​ສ​ປ ຈີນ ແລະ ສປປ ລາວ ໄດ້​ຮັກ​ສາ​ການ​ພົວພັນ ແລະ ແລກປ່ຽນຢ່າງແໜ້ນແຟ້ນ, ແຂວງຫູໜານ ກັບ ບັນດານະຄອນ ແລະ ກິ່ງແຂວງຂອງແຂວງຫູໜານໄດ້​ສ້າງ​ເປັນ​ເມືອງ​ແຮກ​ສ່ຽວ​ກັບຫຼາຍ​ແຂວງ ແລະ ນະ​ຄອນ​ຂອງ ສ​ປ​ປ ລາວ. ​ເມື່ອປີ 2017, ສປປ ລາວ ໄດ້ສ້າງຕັ້ງສະຖານກົງສຸນໃຫຍ່​ຢູ່ນະຄອນສາງຊາ​ແຂວງ​ຫູ​ໜານ. ​ເມື່ອປີ 2019, ສະຖານທີ່ຝຶກອົບຮົມດ້ານອາຊີວະສຶກສາ​ສອງ​ປະ​ເທດ​ຈີນ ແລະ ລາວ ຕ່າງກໍໄດ້ສ້າງຕັ້ງຂຶ້ນ​ຢູ່ນະຄອນສາງຊາ​ຂອງ​ແຂວງ​ຫູ​ໜານ ແລະ ນະຄອນຫຼວງວຽງຈັນ ແຫ່ງ ສ​ປ​ປ ລາວ.

(ຂ່າວ: ໜັງສືພິມລາຍວັນຫູໜານ)