ການທ່ອງທ່ຽວແບບສຶກສາຄົ້ນຄວ້າ, ກາຍເປັນ “ຫ້ອງຮຽນເຄື່ອນທີ່”
ຂະແໜງການທ່ອງທ່ຽວໄດ້ຟື້ນຕົວຄືນນຳພາໃຫ້ເສດຖະກິດພັດທະນາດ້ວຍຫຼາຍຮູບແບບ, ການສຶກສາຄົ້ນຄວ້າຕາມທາງລົດໄຟລາວ-ຈີນ ກໍໄດ້ຮັບຄວາມນິຍົມຊົມຊອບຈາກປະຊາຊົນລາວ ແລະ ອາດຈະສາມາດກາຍເປັນວິທີການທ່ອງທ່ຽວໃໝ່ຢ່າງໜຶ່ງ.
ນາງ ວິຈິດ ສີີນພົມມາ ນັກຮຽນຈາກໂຮງຮຽນປະຖົມພຽງງາມ ແຂວງບໍ່ແກ້ວ ຂອງປະເທດລາວກ່າວວ່າ: “ການສຶກສາຄົ້ນຄວ້າຄັ້ງນີ້ໄດ້ເດີນທາງຈາກໃຕ້ຮອດເໜືອ, ຈາກທິດຕາເວັນຕົກໄປເຖິງທິດຕາເວັນອອກ, ໄດ້ເຫັນເພື່ອນມິດນັກຮຽນຈີນທີ່ຮັກແພງທີ່ສຸດ ແລະ ກໍໄດ້ສຳຜັດກັບວັດທະນະທຳຈີນທີ່ມີຫຼາກຫຼາຍສີສັນ ຊຶ່ງເຮັດໃຫ້ຂ້າພະເຈົ້າຮັບຮູ້ຈີນດີຂື້ນກວ່າເກົ່າ. ສິ່ງທີສຳຄັນກວ່ານັ້ນກໍຄື, ໄດ້ໄປທ່ຽວນະຄອນຫຼວງປັກກິ່ງ ທີ່ເປັນຄວາມໄຝ່ຝັນຂອງນ້ອງມາໂດຍຕະຫຼອດ. ພາຍຫຼັງກັບຄືນປະເທດລາວແລ້ວ, ນ້ອງຈະພະຍາຍາມຕື່ມອີກ ແລະ ພະຍາຍາມມາຮຽນຕໍ່ຢູ່ປະເທດຈີນ.”
ຫວ່າງມໍ່ໆມານີ້, ມີນັກຮຽນລາວ 100 ກວ່າຄົນຈາກທ້ອງຖິ່ນຕ່າງໆຂອງປະເທດລາວໄດ້ຂີ່ຂະບວນລົດໄຟໂດຍສານສາກົນຈາກນະຄອນຫຼວງວຽງຈັນເດີນທາງມາເຖິງຈີນແລ້ວ, ໂດຍຖືເອົາກິ່ງແຂວງສິບສອງພັນນາເປັນຈຸດເລີ່ມຕົ້ນກິດຈະກຳ, ໄດ້ໄປສຶກສາຄົ້ນຄວ້າແບບມິດຕະພາບເປັນເວລາ 16 ວັນຢູ່ນະຄອນຄຸນໝິງ, ນະຄອນຫຼວງປັກກິ່ງ, ນະຄອນຊີອ່ານ ແລະ ຕົວເມືອງອື່ນໆຂອງຈີນ.
ນັບແຕ່ເປີດນຳໃຊ້ຂະບວນລົດໄຟໂດຍສານຕາມທາງລົດໄຟ ລາວ-ຈີນແລ້ວ, ມີປະຊາຊົນລາວໄປທ່ຽວປະເທດຈີນນັບມື້ນັບຫຼາຍຂຶ້ນ ແລະ ການໄປມາຫາສູ່ກັນຂອງພົນລະເຮືອນລະຫວ່າງລາວ-ຈີນ ກໍນັບມື້ນັບແໜ້ນແຟ້ນ. ນາງວິຈິດ ສີີນພົມມາ ກໍເປັນຕົວຢ່າງໃນການສຶກສາຄົ້ນຄວ້າປະເທດຈີນຕາມທາງລົດໄຟລາວ-ຈີນ.
ທ່ານ ຈັນທະວີ ພັນນາມວົງ ເຄີຍດຳເນີນທຸລະກິດໃນຂະແໜງການທ່ອງທ່ຽວເປັນເວລາສິບກວ່າປີແລ້ວ, ທ່ານໄດ້ຄົ້ນພົບໂອກາດການຄ້າດ້ານການທ່ອງທ່ຽວໃນຍາມພັກລະດູຮ້ອນປີນີ້ ແລະ ໄດ້ເປີດລາຍການສຶກສາຄົ້ນຄວ້າຈີນຢູ່ລາວໂດຍໄວ. ພວກເຮົາຈະຕ້ອນຮັບຄະນະສຶກສາຄົ້ນຄວ້າລາວຈາກຈີນ. ພາຍຫຼັງພວກເຮົາມີບົດຮຽນໃນດ້ານນີ້ແລ້ວ, ຫວັງວ່າ ຈະສາມາດເປີດລາຍການສຶກສາຄົ້ນຄວ້າຈີນຈາກປະເທດລາວ, ນຳພາຄົນລາວໄປສຶກສາຄົ້ນຄວ້າຈີນນັບມື້ນັບຫຼາຍຂຶ້ນ ເພື່ອສຳຜັດກັບວັດທະນະທຳຈີນ.”
ທ່ານ ວົງດາວອນ ວົງໄຊຍະລາດ ຮອງຫົວຫນ້າພະແນກ ຖວທ ແຂວງຫຼວງພະບາງກ່າວວ່າ: “ພາຍໃຕ້ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ, ການທ່ອງທ່ຽວແບບສຶກສາຄົ້ນຄວ້າສາມາດກາຍເປັນປ່ອງຢ້ຽມໜຶ່ງສຳລັບປະເທດຢູ່ຕາມລ້ອງແມ່ນ້ຳຂອງ-ແມ່ນ້ຳລ້ານຊ້າງຄົ້ນຄວ້າກົນໄກການພັດທະນາ ແລະ ການຮ່ວມມືແບບຍືນຍົງດ້ານການທ່ອງທ່ຽວໃນພາກພື້ນ ພ້ອມທັງລົງເລິກຖອດຖອນແລກປ່ຽນດ້ານອະລິຍະທຳຢ່າງບໍ່ຢຸດຢັ້ງ. ທ່ານກ່າວຕື່ມວ່າ, ຄຽງຄູ່ກັບລາຍການທ່ອງທ່ຽວແບບສຶກສາຄົ້ນຄວ້າຂ້າມຊາດນັບມື້ນັບຫຼາຍຂຶ້ນ ແລະ ເສັ້ນທາງການທ່ອງທ່ຽວແບບສຶກສາຄົ້ນຄວ້າໄດ້ຮັບການປັບປຸງໃຫ້ດີຂຶ້ນຢ່າງບໍ່ຢຸດຢັ້ງ, ຈະມີຄະນະທ່ອງທ່ຽວມາທ່ຽວ ແລະ ສຶກສາຄົ້ນຄວ້າຢູ່ຫຼວງພະບາງ ທີ່ເປັນມໍລະດົກວັດທະນະທຳໂລກ ທີ່ຕັ້ງຢູ່ພາກເໜືອຂອງລາວນັບມື້ນັບຫຼາຍຂຶ້ນ ຊຶ້ງຈະມີຜົນດີຊ່ວຍໃຫ້ລົງເລິກການແລກປ່ຽນທາງດ້ານວັດທະນະທຳ ແລະ ການຖອດຖອນບົດຮຽນເຊິ່ງກັນແລະກັນລະຫວ່າງປະເທດຕ່າງໆຕື່ມອີກ.
ແຫຼ່ງຂ່າວ: ໜັງສືພິມລາຍວັນຢຸນນານ