ດໍາເນີນການສິດສອນທ່າມກາງບັນຍາກາດມ່ວນຊື່ນ ເພື່ອໃຫ້ນັກຮຽນເດັກນ້ອຍໄດ້ຮັບການພັດທະນາຢ່າງຮອບດ້ານ
ໃນລະດູຮ້ອນທີ່ຮ້ອນເອົ້າ, ການທ່ອງທ່ຽວແບບພັກຮ້ອນໄດ້ກາຍເປັນກະແສຂອງຍຸກສະໄໝ, ໃນນັກທ່ອງທ່ຽວຈຳນວນຫຼວງຫຼາຍ, ໝູ່ນັກຮຽນເປັນກຸ່ມຄະນະທີ່ສຳຄັນ. ການຮັບການສຶກສາດ້ານການເຜີຍແຜ່ຄວາມຮູ້ວິທະຍາສາດ, ສຳຜັດກັບທຳມະຊາດ ແລະ ສຳຜັດກັບການສືບທອດມໍລະດົກວັດທະນະທຳນາມມະທຳ ເປັນຕົ້ນ ໄດ້ເຮັດໃຫ້ການທ່ອງທ່ຽວກາຍເປັນ “ຫ້ອງຮຽນເຄື່ອນທີ່” ເທື່ອລະກ້າວ.
ຫົວລົດໄຟອາຍນ້ຳທີ່ບູຮານທີ່ສຸດຂອງຈີນ, ເຄື່ອງຈັກຈູດໄຟພາຍໃນລຸ້ນທຳອິດ ທີ່ຈີນອອກແບບຜະລິດດ້ວຍຕົນເອງ ພາຍຫຼັງສະຖາປະນາ ສປ ຈີນ, ເຄື່ອງຈັກໄຟຟ້າ “ສາວຊານ” ລຸ້ນທຳອິດເປັນຕົ້ນ, ເມື່ອຍາມພັກລະດູຮ້ອນໝູນວຽນມາເຖິງ, ຫໍພິພິທະພັນທາງລົດໄຟຈີນ ທີ່ເປັນຖານການສຶກສາພຶດຕິກຳດ້ານການສຶກສາຄົ້ນຄວ້າສຳລັບນັກຮຽນປະຖົມມັດທະຍົມຊຸດທຳອິດຂອງຈີນ ໄດ້ດຶງດູດນັກຮຽນປະຖົມ ແລະ ມັດທະຍົມມາສຶກສາຄົ້ນຄວ້າເປັນຈຳນວນບໍ່ໜ້ອຍ.
“ມື້ນີ້, ຕົ້ນຕໍພວກເຮົາຈະຮຽນຮູ້ກ່ຽວກັບຊີວະຊາດບູຮານຂອງຝູງຊີວະຊາດເສິງຈ່ຽງ ແລະຮຽນຮູ້ວິທີ ແລະ ສີມືຟື້ນຟູຊາກຫີນ.” ໃນຍາມພັກລະດູຮ້ອນ, ໃນຫໍພິພິທະພັນມໍລະດົກທຳມະຊາດໂລກຢູ່ຕາມຊາກຫີນເມືອງເສິງຈ່ຽງນະຄອນຢູ້ຊີແຂວງຢຸນນານ, ພະນັກງານໄດ້ນຳພານັກຮຽນປະຖົມ ແລະ ມັດທະຍົມທີ່ມາຈາກທ້ອງຖິ່ນຕ່າງໆຂອງຈີນດຳເນີນການສຶກສາຄົ້ນຄວ້າຊາກຫີນເລື້ອຍໆ. “ຫຼັກສູດນີ້ເປັນຕາມ່ວນຫຼາຍ, ຍັງສາມາດຮຽນຮູ້ວິທະຍາສາດຫຼາຍຢ່າງ.” ພາຍຫຼັງຫຼັກສູດສຶກສາຄົ້ນຄວ້າສິ້ນສຸດລົງແລ້ວ, ນັກຮຽນທັງຫຼາຍຍັງຢາກສຶກສາຄົ້ນຄວ້າຕໍ່ໄປອີກ.
ມໍລະດົກທຳມະຊາດໂລກຢູ່ຕາມຊາກຫີນເມືອງເສິງຈ່ຽງ ເປັນການບັນທຶກຮອງຮອຍຊີວິດຂອງໜ່ວຍໂລກໃນຕົ້ນສະໄໝແຄມບຣຽນ ທີ່ໂຮມສູນທີ່ສຸດ, ຮັກສາໄດ້ຄົບຖ້ວນທີ່ສຸດ ແລະ ມີປະເພດທີ່ອຸດົມສົມບູນທີ່ສຸດ. ປັດຈຸບັນ, ໄດ້ຄົ້ນພົບຊາກຫີນສັດ ແລະ ພືດຫາຍາກໃນສະໄໝແຄມບຣຽນ 20 ກວ່າປະເພດ ແລະ 300 ກວ່າຊະນິດ. ນັບແຕ່ໄດ້ເປີດໃຫ້ປະຊາຊົນເຂົ້າຊົມໂດຍບໍ່ເສຍຄ່າຢ່າງເປັນທາງການໃນປີ 2020 ເປັນຕົ້ນມາ, ນັບລວມແລ້ວ, ຫໍພິພິທະພັນດັ່ງກ່າວໄດ້ຕ້ອນຮັບຜູ້ມາສຶກສາຄົ້ນຄວ້າຫຼາຍກວ່າ 1,5 ລ້ານເທື່ອຄົນ.
ຫວ່າງມໍ່ໆມານີ້, ອາຈານໃນໂຮງລະຄອນງິ້ວປັກກິ່ງແຂວງຢຸນນານ ແລະ ນັກສຳມະນາກອນ 20 ກວ່າຄົນທີ່ມີອາຍຸ 6 ຫາ 12 ປີ ໃນຫ້ອງຮຽນງິ້ວປັກກິ່ງເດັກໄດ້ໄປສະແດງຢູ່ໂຮງລະຄອນຫຼຽນຮວາສືນະຄອນຄຸນໝິງ. ຢູ່ເທິງເວທີ, ນັກສຳມະນາກອນນ້ອຍທັງຫຼາຍໄດ້ໃສ່ຊຸດງິ້ວປັກກິ່ງທີ່ງົດງາມ ແລະ ມີທ່າຟ້ອນທີ່ດີຫຼາຍ.
ທ່ານຈ່າງຊືເຈຍ ອາຈານໃນໂຮງລະຄອນງິ້ວປັກກິ່ງແຂວງຢຸນນານເປັນອາຈານມາ 30 ປີແລ້ວ. ທ່ານກ່າວວ່າ, ການສະແດງທຸກເທື່ອ, ນັກສະແດງທັງຫຼາຍລ້ວນແຕ່ໃສ່ເກີບທີ່ມີພື້ນສູງເຖິງ 10 ຊັງຕີແມັດ, ໃນເວລາຟ້ອນ, ຕີກັນ ແລະ ຕີລັງກາ, ມີຄວາມທ້າທາຍຫຼາຍ. ທ່ານໂຈ່ວໄຂ ຮອງຫົວໜ້າສະຖາບັນງິ້ວປັກກິ່ງແຂວງຢຸນນານກ່າວວ່າ: “ພວກເຮົາຫວັງວ່າໂດຍຜ່ານການສະແດງ ແລະ ການສຶກສາຄົ້ນຄວ້າເຫຼົ່ານີ້ ຈະເຮັດໃຫ້ເດັກນ້ອຍທັງຫຼາຍສາມາດຮຽນຮູ້ງິ້ວປັກກິ່ງໄດ້ດີກວ່າເກົ່າ, ດຶງດູດເດັກນ້ອຍທັງຫຼາຍມັກງິ້ວປັກກິ່ງ ແລະ ຮຽນງິ້ວປັກກິ່ງນັບມື້ນັບຫຼາຍຂຶ້ນ.
ແຫຼ່ງຂ່າວ: ໜັງສືພິມລາຍວັນຢຸນນານ