ປະເທດເຫຼົ່ານີ້ກໍສະຫຼອງບຸນໄຫວ້ພະຈັນເຊັ່ນກັນ
ນອກຈາກຈີນແລ້ວ, ຫຼາຍປະເທດໃນອາຊີກໍມີມູນເຊື້ອສະຫຼອງບຸນໄຫວ້ພະຈັນເຊັ່ນກັນ. ເຖິງວ່າວິທີສະຫຼອງອາດຈະຕ່າງກັນ, ແຕ່ກໍລ້ວນແລ້ວແຕ່ຝາກຄວາມຮັກຫອມຊີວິດທີ່ດີງາມ ແລະ ຝາກຄວາມປາຖະໜາດີຕໍ່ອະນາຄົດ.
ຢູ່ປະເທດລາວ, ວັນບຸນໄຫວ້ພະຈັນພໍດີຖືກກັບໄລຍະບຸນຫໍ່ເຂົ້າສະຫຼາກ. ເມື່ອມື້ບຸນໝູນວຽນມາເຖິງ, ຄອບຄົວເຕົ້າໂຮມກັນຊົມດວງຈັນ ແລະ ກິນຂະໜົມໄຫວ້ພະຈັນ. ຊາວລາວເຊື້ອສາຍຈີນຍັງໄດ້ຈັດກິດຈະກຳສະຫຼອງບຸນ ເຊັ່ນ: ຈູດທູບ, ເຊີດມັງກອນ ແລະອື່ນໆ.
ຊາວມາເລເຊຍເຊື້ອສາຍຈີນຕ້ອງເຮັດ 3 ຢ່າງໃນມື້ບຸນໄຫວ້ພະຈັນ ຄື: ຊົມດວງຈັນ, ກິນຂະໜົມໄຫວ້ພະຈັນ ແລະ ຖືໂຄມໄຟ ແຫ່ຂະບວນ. ບາງແຫ່ງໃນນະຄອນຫຼວງ ກົວລາລຳເປີ ຈະຈັດກິດຈະກຳຖືໂຄມໄຟ ແຫ່ຂະບວນ ເພື່ອສະຫຼອງບຸນໄຫວ້ພະຈັນ.
ເວົ້າສຳລັບຊາວສິງກະໂປເຊື້ອສາຍຈີນ ແລ້ວ, ໃນການສະຫຼອງບຸນໄຫວ້ພະຈັນ, ນອກຈາກມອບຂະໜົມໄຫວ້ພະຈັນເປັນຂອງຂວັນ ແລະ ສະແດງຄວາມຢື້ຢາມຖາມຂ່າວ ແລະ ອວຍພອນຊຶ່ງກັນແລະກັນແລ້ວ, ຍັງໄປທ່ຽວຫຼິ້ນ ແລະ ຊົມໂຄມໄຟຢູ່ແຄມແມ່ນ້ຳສິງກະໂປ ແລະ ແຫ່ງອື່ນໆ.
ຢູ່ປະເທດໄທ, ຄົນທັງຫຼາຍເອີ້ນບຸນໄຫວ້ພະຈັນວ່າເປັນ “ບຸນຂໍພອນນຳດວງຈັນ”. ອາຫານ 3 ຢ່າງໃນວັນບຸນໄຫວ້ພະຈັນຂອງໄທແມ່ນໝາກຄາຍ, ໝາກພຸ ແລະ ຂະໜົມໄຫວ້ພະຈັນ. ຕາມການເລົ່າຂານກັນມາວ່າ, ຢູ່ໄທ, ຈະໄປຂໍພອນນຳດວງຈັນໃນວັນບຸນໄຫວ້ພະຈັນ, ເທວະດາ 8 ອົງຈະນຳເອົາໝາກຄາຍໄປອວຍພອນໃຫ້ເຈົ້າແມ່ກວນອິມຈົ່ງມີອາຍຸໝັ້ນຂວັນຍືນ, ເຈົ້າແມ່ກວນອິມ ແລະ ເທວະດາທັງຫຼາຍຈະສົ່ງພອນໄຊອັນປະເສີດໃຫ້ແກ່ໂລກມະນຸດ. ສະນັ້ນ, ຄົນໄທຈະມັກກິນໝາກຄາຍ ທີ່ເປັນສັນຍະລັກໃຫ້ແກ່ອາຍຸຍືນໃນໄລຍະສະຫຼອງວັນບຸນໄຫວ້ພະຈັນ.
ຢູ່ຫວຽດນາມ, ບຸນໄຫວ້ພະຈັນຖືກຖືເປັນ “ບຸນເດັກນ້ອຍ”. ໃນໄລຍະສະຫຼອງມື້ບຸນ, ທ້ອງຖິ່ນຕ່າງໆຂອງຫວຽດນາມໄດ້ຈັດການວາງສະແດງໂຄມໄຟ ແລະ ການແຫ່ຂະບວນເຊີດສີງໂຕ, ເດັກນ້ອຍທັງຫຼາຍໄດ້ຖືໂຄມໄຟຮູບປາໄນໄປຫຼິ້ນນຳກັນ ຊຶ່ງມີຄວາມໝາຍວ່າ “ປາໄນໂດດຂຶ້ນປະຕູມັງກອນ”. ແຫຼ່ງຂ່າວ: ແອັບໜັງສືພິມໄວໜຸ່ມຈີນ, ສໍານັກຂ່າວຊິນຮວາ ແລະ ສື່ມວນຊົນອື່ນໆ