ໝູ່ເພື່ອນຕ່າງປະເທດມັກຮັກວິຖີຊີວິດພູເອີ ແບບ “ຕອນເຊົ້າດື່ມກາເຟ ຕອນແລງດື່ມນໍ້າຊາ”

“ຕອນເຊົ້າດື່ມກາເຟ ຕອນແລງດື່ມນໍ້າຊາ”, ນີ້ເປັນວິຖີຊີວິດຂອງປະຊາຊົນພູເອີ, ເປັນປະສົບການຂອງຊີວິດທີ່ຜ່ອນຄາຍ ສະບາຍໆ ແບບພັກຜ່ອນຢ່ອນອາລົມຢ່າງໜຶ່ງ. ນະຄອນພູເອີມີສິ່ງແວດລ້ອມທໍາມະຊາດທີ່ດີເດັ່ນ, ຢູ່ທີ່ນີ້ວັດທະນະທໍາຊາ ແລະ ວັດທະນະທໍາກາເຟຂ້ອນຂ້າງເຂັ້ມຂຸ້ນ. ປັດຈຸບັນນີ້, ມີຄົນນັບມື້ນັບຫຼາຍມັກຮັກພູເອີ, ມັກຮັກສໍາຜັດຊີວິດທີ່ “ຕອນເຊົ້າດື່ມກາເຟ ຕອນແລງດື່ມນໍ້າຊາ”, ເປັນນັກໃຊ້ຊີວິດແບບພູເອີ.

ທ່ານ ຊູໄຮ ມາຈາກປະເທດປາກິສະຖານ ລາວໄດ້ດໍາລົງຊີວິດຢູ່ແຂວງຢູນນານເປັນເວລາ 5 ປີແລ້ວ. ປີກາຍນີ້ລາວໄດ້ຮຽນຈົບປະລີນຍາເອກ, ມາເປັນອາຈອນສອນຂອງວິທະຍາໄລພູເອີ. ທ່ານ ຊູໄຮ ກວ່າວ່າ: “ສໍາລັບຂ້າພະເຈົ້າແລ້ວ, ພູເອີເປັນສະຖານທີ່ແຫ່ງຄວາມຝັນດ້ານການດໍາເນີນການຄົ້ນຄວ້າ ວິທະຍາສາດ, ພຸູມອາກາດຢູ່ທີ່ນີ້ອຸດົມສົມບູນຫຼາຍ, ມີພືດພັນທັນຍາຫານ, ພືດ, ສັດ, ຈຸລິນຊີ ແລະ ສັດສາວາສິ່ງນາໆພັນ. ນອກຈາກນັ້ນ ພູເອີກໍເປັນສະຖານທີ່ແຫ່ງຄວາມຝັນດ້ານຊີວິດການເປັນຢູ່ຂອງລາວ. “ຄວາມພົ້ນເດັ່ນຂອງອາຫານຈີນແມ່ນມີຫຼາກຫຼາຍລົດຊາດ, ອາຫານ ແລະ ລົດຊາດທີ່ຂ້າພະເຈົ້າມັກທີ່ສຸດຢູ່ນີ້ມີໝົດ. ຢູ່ທີ່ນີ້ຂ້າພະເຈົ້າຍັງຮຽນຮູ້ການຊິມຊາແລະ ກາເຟ, ຊາ ແລະ ກາເຟຂອງພູເອີໄດ້ກາຍເປັນເຄື່ອງດື່ມຕິດປາກຂອງຂ້າພະເຈົ້າ. ຂ້າພະເຈົ້າຍັງເອົາກາເຟ ແລະ ຊາ ເປັນຂອງຂວັນມອບໃຫ້ໝູ່ເພື່ອນທີ່ເປັນຄົນປະເທດສິລັງກາ, ໄທ ແລະ ປາກິສະຖານ.”

ທ້າວ ເລີຍຫຼອງ ມາຈາກປະເທດລາວ, ປີນີ້ເປັນປີທີ 2 ທີ່ລາວມາດໍາເນີນການສິດສອນຢູ່ພູເອີ. “ຂ້າພະເຈົ້າເພີດເພີນກັບຊີວິດຢູ່ທີ່ນີ້ຫຼາຍ, ຂ້າພະເຈົ້າມັກອາຫານຂອງພູເອີ, ທັງມັກວິຖີຊີວິດແບບ ‘ມືຊ້າຍຈັບກາເຟ ມືຂວາຈັບຊາ’ ຂອງພູເອີ. ແຕ່ກ່ອນໃນຄວາມຊົງຈໍາຂອງຂ້າພະເຈົ້າ ຊາເປັນເຄື່ອງດື່ມທີ່ມີລົດຊາດຂົມຫຼາຍ, ຫຼັງຈາກມາຮອດພູເອີ, ຂ້າພະເຈົ້າໄດ້ຄ່ອຍໆຫຼົງຮັກກິ່ນຫອມອັນເປັນເອກະລັກຂອງຊາພູເອີທີ່ປະລົດຊາດອັນຫອມຫວນໄວ້ໃນປາກ.” ຫຼັງຈາກທາງລົດໄຟລາວ-ຈີນ ເປີດນໍາໃຊ້ແລ້ວ, ໄດ້ເຮັດໃຫ້ການໄປມາຫາສູ່ກັນລະຫວ່າງຜູ້ໂດຍສານສອງປະເທດລາວ-ຈີນນັບມື້ນັບສະດວກສະບາຍ. “ຈາກນະຄອນຫຼວງວຽງຈັນໄປຫານະຄອນພູເອີສະດວກຫຼາຍ, ທາງລົດໄຟໄດ້ສ້າງໂອກາດໃໝ່ໃນການແລກປ່ຽນເສດຖະກິດ, ວັດທະນະທໍາ ແລະ ການໄປມາຫາສູ່ກັນຂອງປະຊາຊົນ.” ທ້າວ ເລີຍຫຼອງຫວັງວ່າຈະມີປະຊາຊົນອາຊີຕາເວັນອອກສ່ຽງໃຕ້ຮັບຮູ້ພູເອີ, ມາສໍາຜັດວິຖີຊີວິດພູເອີ, ເຮັດໃຫ້ຊາພູເອີເປັນທີ່ຮັບຮູ້ໄປທົ່ວໂລກ.

ແຫຼ່ງຂ່າວ: ໜັງສືພິມລາຍວັນຢູນນານ