ທົ່ວໂລກຊົມໃຊ້ກາເຟຈີນຮ່ວມກັນ
ວັນທີ 5 ມັງກອນຜ່ານມາ, ງານວາງສະແດງກາເຟສາກົນຈີນ (ຜູເອີ) ພາຍໃຕ້ຫົວຂໍ້ “ກາເຟຈີນ-ທົ່ວໂລກຊົມໃຊ້ຮ່ວມກັນ” ໄດ້ຈັດຂຶ້ນຢູ່ນະຄອນຜູເອີແຂວງຢຸນນານສປຈີນ. ຝ່າຍຕ່າງໆໄດ້ອອກ “ຂໍ້ລິເລີ່ມຜູເອີວ່າດ້ວຍກາເຟຈີນ-ທົ່ວໂລກຊົມໃຊ້ຮ່ວມກັນ” ໂດຍມີໂຄງການກາເຟ 12 ໂຄງການໄດ້ລົງລາຍເຊັນໃນໄລຍະຈັດງານວາງສະແດງຢ່າງເປັນເອກະພາບກັນ.
ງານວາງສະແດງຄັ້ງນີ້ໄດ້ດຶງດູດວິສາຫະກິດກາເຟ 200 ກວ່າແຫ່ງຂອງໂລກເຂົ້າຮ່ວມ, ຜູ້ແທນຈາກ 10 ກວ່າປະເທດ ແລະ ເຂດແຄວ້ນໄດ້ຮ່ວມກັນປຶກສາຫາລືອະນາຄົດອັນດີງາມຂອງກາເຟ. ຕາມຂ່າວແຈ້ງວ່າ, “ງານວາງສະແດງກາເຟສາກົນຜູເອີ”ໄດ້ຈັດຂຶ້ນ 2 ຄັ້ງຢ່າງສຳເລັດຜົນແລ້ວໂດຍມີວິສາຫະກິດ 300 ກວ່າແຫ່ງຈາກ 21 ປະເທດ ແລະ ເຂດແຄວ້ນເຂົ້າຮ່ວມງານວາງສະແດງ ແລະ ໄດ້ຕ້ອນຮັບນັກວິຊາການເກືອບ 20.000 ເທື່ອຄົນ. ມູນຄ່າໃບສັ່ງຈອງຄ້າຂາຍທີ່ຕົກລົງກັນໃນສັນຍາຂອງນັກທຸລະກິດຈັດຊື້ກາເຟມີເຖິງ 2,236 ຕື້ຢວນ.
ບົດໂດຍ: LiLing, Wang Yunya
ເນື້ອໃນເພີ່ມເຕີມ: ຈີນແມ່ນປະເທດຜະລິດກາເຟທີ່ສຳຄັນໃນໂລກ, ແຂວງຢູນນານແມ່ນເຂດປູກກາເຟທີ່ໃຫຍ່ທີ່ສຸດຂອງຈີນ, ການປູກກາເຟມີປະຫວັດສາດມາເປັນເວລາ 130 ກວ່າປີແລ້ວ, ເນື້ອທີ່ປູກກາເຟມີເຖິງ 846.000 ກວ່າເຮັກຕາ, ຜົນຜະລິດເມັດກາເຟດິບມີເຖິງ 114.000 ກວ່າໂຕນ, ເນື້ອທີ່ປູກ ແລະ ຜົນຜະລິດລ້ວນແຕ່ໄດ້ກວມ 98% ຂອງຈີນ.
ປັດຈຸບັນນີ້, ການບໍລິໂພກເມັດກາເຟຕໍ່ປີຂອງຈີນມີເກືອບ 300.000 ໂຕນ, ວິສາຫະກິດກາເຟປະເພດຕ່າງໆມີຫຼາຍກວ່າ 220.000 ແຫ່ງ, ຈັງຫວະການເຕີບໂຕ ໃນການລົງທະບຽນຂອງວິສາຫະກິດ ປະເພດກາເຟມີຫຼາຍກວ່າ 20% ແລະ ຈັງວະການເຕີບໂຕ ດ້ານການບໍລິໂພກກາເຟສະເລ່ຍຕໍ່ປີຫຼາຍກວ່າ 15%.
ແຫຼ່ງຂ່າວ: ເວັບໄຊໜັງສືພິມລາຍວັນຈີນ