ທິວທັດທໍາມະຊາດຕາມທາງລົດໄຟ ລາວ-ຈີນ ສວຍສົດງົດງາມ
“ກິ່ນໝາກມ່ວງຫອມຫວນ,ເມືອງຢວນຈ່ຽງທີ່ມີໝາກໄມ້ນາໆຊະນິດ; ກິ່ນໝາກມ່ວງທີ່ຫອມຫວນ, ເມືອງຢວນຈ່ຽງຂອງພວກເຮົາ” ຢູ່ຕາມຂະບວນລົດໄຟຈາກນະຄອນຢູ້ຊີໄປຫານະຄອນຜູເອີ, ນາງ ເຜິງຫົງນັກທ່ອງທ່ຽວຈາກນະຄອນຈົ່ງ ກິ່ງຈີນໄດ້ຊາບຊຶ້ງໃຈນຳຈັງຫວະມ່ວນຊື່ນຂອງເພງ “ໝາກມ່ວງ”, ເລີຍຮ້ອງຕາມຈັງຫວະ. ນາງເຜິງຫົງ ບອກນັກຂ່າວວ່າ, ຕົນກັບເພື່ອນ 5 ຄົນຕົກລົງມາທ່ຽວແຂວງຢູນນານຍ້ອນຊັບພະຍາກອນທ່ອງທ່ຽວທີ່ດີເລີດຢູ່ລຽບຕາມທາງລົດໄຟລາວ-ຈີນ.
ນັບແຕ່ເປີດນຳໃຊ້ທາງລົດໄຟລາວ-ຈີນ ເປັນເວລາ 2 ປີເປັນຕົ້ນມາ, ທາງລົດໄຟສາຍນີ້ໄດ້ຊຸກຍູ້ການຄ້າ, ການແລກປ່ຽນ ແລະ ຮ່ວມມືດ້ານວັດທະນະທຳ ແລະ ທ່ອງທ່ຽວຢູ່ຕາມທາງລົດໄຟ. ນັບແຕ່ເປີດຂະບວນລົດໄຟໂດຍສານສາກົນຕາມທາງລົດໄຟລາວ-ຈີນ ແຕ່ວັນທີ 13 ເມສາ ຫາ ວັນທີ 27 ທັນວາ 2023, ໄດ້ຂົນສົ່ງຜູ້ໂດຍສານຂ້າມຊາດ 112.000ກວ່າເທື່ອຄົນຈາກ 75 ປະເທດ ແລະ ເຂດແຄວ້ນ, ການທ່ອງທ່ຽວຕາມທາງລົດໄຟລາວ-ຈີນ ນັບມື້ນັບຄຶກຄື້ນຂຶ້ນ.
ຍາມຄ້ອຍຄ່ຳ, ເມືອງບູຮານມ້າຊາ ນະຄອນຜູເອີ ມີຄົນສັນຈອນໄປມາຢ່າງບໍ່ຂາດສາຍ, ມີນັກທ່ອງທ່ຽວຈາກຕ່າງແຂວງເດີນທາງມາທ່ຽວແຫ່ງນີ້ ເພື່ອສຳຜັດກັບຊີວິດທີ່ສະຫວາດສະເຫວີຍດື່ມກາເຟ ໃນຕອນເຊົ້າ ແລະ ດື່ມນ້ຳຊາໃນຕອນແລງ. ທ່ານ ໂຈ່ວ ຜູ້ຂັບລົດແທັກຊີອຸທານວ່າ: “ຂັບລົດມາເປັນເວລາ20 ກວ່າປີແລ້ວ, ພາຍຫຼັງເປີດນຳໃຊ້ ທາງລົດໄຟລາວ-ຈີນ ແລ້ວ, ນັກທ່ອງທ່ຽວທີ່ມາທ່ຽວນະຄອນຜູເອີນັບມື້ນັບຫຼາຍຂຶ້ນ,ໂດຍສະເພາະແມ່ນໃນລະດູການທີ່ມີນັກທ່ອງທ່ຽວຫຼາຍ, ຈະມີຄົນມາຂີ່ລົດແທັກຊີເປັນຈຳນວນຫຼວງຫຼາຍ.”
ທ່ານ ໄຊຊຽນມິນ ຜູ້ອຳນວຍການໃຫຍ່ໂຮງແຮມດອກຈໍາປາຫຼວງພະບາງ, ຕັ້ງແຕ່ປີ 2010 ທ່ານ ກໍໄດ້ມາບໍລິຫານໂຮງແຮມແຫ່ງນີ້. 10 ກວ່າປີມານີ້, ໄດ້ຕ້ອນຮັບນັກທ່ອງທ່ຽວຈາກປະເທດຕ່າງໆເປັນຈຳນວນຫຼວງຫຼາຍ. ໃນຊຸມປີຜ່ານມາ, ທ່ານຍິ່ງເອົາໃຈໃສ່ໂຄສະນາເຜີຍແຜ່ໂຮງແຮມຂອງຕົນທາງຜ່ານທາງອອນລາຍ, ທ່ານຍັງໄດ້ຜູກມິດສຳພັນກັບໝູ່ເພື່ອນຫຼາຍຄົນດ້ວຍວັດທະນະທຳເຫຼົ້າຂອງຈີນ ແລະ ລາວ.
ທ່ານ ວັນນະເດດ ພົງສຸກທິດ ຫົວໜ້າຫ້ອງການພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫຼວງພະບາງ ກ່າວວ່າ: “ນັບແຕ່ປະເທດລາວ ໄດ້ເປີດດ່ານສາກົນຄືນໃໝ່ໃນວັນທີ 9 ພຶດສະພາຫາຕົ້ນເດືອນທັນວາປີ 2023, ຫຼວງພະບາງໄດ້ຕ້ອນຮັບນັກທ່ອງທ່ຽວ 930.000 ກວ່າເທື່ອຄົນ, ໃນນັ້ນ, ມີ 700.000 ກວ່າເທື່ອຄົນແມ່ນນັກທ່ອງທ່ຽວສາກົນ, ຈຳນວນນັກທ່ອງທ່ຽວຈີນລຽງຢູ່ອັນດັບ 3.”
ເພື່ອຊຸກຍູ້ການພັດທະນາ ຂອງຂະແໜງການທ່ອງທ່ຽວ, ແຂວງຫຼວງພະບາງໄດ້ປັບປຸງສິ່ງກໍ່ສ້າງພື້ນຖານໂຄງລ່າງໃຫ້ສົມບູນຂຶ້ນຢ່າງບໍ່ຢຸດຢັ້ງ, ໄດ້ຄຸ້ມຄອງໂຮງແຮມ, ຮ້ານອາຫານ ແລະ ແຫຼ່ງທ່ອງທ່ຽວຕ່າງໆຢ່າງພິຖີພິຖັນ. ຄຽງຄູ່ກັບປີທ່ອງທ່ຽວລາວ 2024 ໝູນວຽນມາເຖິງ, ປະເທດລາວໄດ້ກຽມຫຼາຍກິດຈະກຳເພື່ອຕ້ອນຮັບນັກທ່ອງທ່ຽວຕ່າງປະເທດ. ທ່ານ ວັນນະເດດ ພົງສຸກທິດ ກ່າວວ່າ: “ຫວັງວ່າ, ໃນອະນາຄົດຈະສາມາດຈັດກິດຈະກຳຮ່ວມກັບຝ່າຍຈີນຫຼາຍກວ່າເກົ່າ ເພື່ອຊຸກຍູ້ການພັດທະນາຂະແໜງການທ່ອງທ່ຽສາກົນຕາມທາງລົດໄຟລາວ-ຈີນ.”
ໃນໄລຍະຈັດງານຕະຫຼາດນັດການທ່ອງທ່ຽວສາກົນຈີນປີ 2023, ໄດ້ເຜີຍແຜ່ “ຂໍ້ລິເລີ່ມວ່າດ້ວຍການຮ່ວມກັນສ້າງແລວທາງວັດທະນະທຳ, ທ່ອງທ່ຽວ ແລະ ເສດຖະກິດສາກົນຕາມທາງລົດໄຟລາວ-ຈີນ” ໂດຍໄດ້ສະເໜີໃຫ້ສືບຕໍ່ປັບປຸງນະໂຍບາຍການທ່ອງທ່ຽວຕາມທາງລົດໄຟລາວ-ຈີນ ໃຫ້ດີຂຶ້ນ,ສືບຕໍ່ເພີ່ມທະວີການວາງແຜນການທ່ອງທ່ຽວຕາມທາງລົດໄຟລາວ-ຈີນ ຕື່ມອີກ, ສືບຕໍ່ເພີ່ມທະວີການສ້າງສາສິ່ງກໍ່ສ້າງທ່ອງທ່ຽວຕາມທາງລົດໄຟລາວ-ຈີນຕື່ມອີກ ແລະ ອື່ນໆ. ບຸກຄົນວົງການວັດທະນະທຳ ແລະ ທ່ອງທ່ຽວຈີນ ແລະ ລາວກ່າວວ່າ, ຈະຮ່ວມກັນສ້າງ “ເສັ້ນທາງແຫ່ງຄຳ” ແຫ່ງວັດທະນະທຳ ແລະ ທ່ອງທ່ຽວຕາມທາງລົດໄຟລາວ-ຈີນ.
ບົດໂດຍ: ວິມົນ, Liu Ziyu