ຊາວໜຸ່ມລາວ ເວົ້າວ່າ: ທາງລົດໄຟ ໄດ້ປ່ຽນແປງພວກເຮົາ
ຄຽງຄູ່ກັບທາງລົດໄຟລາວ-ຈີນ ໄດ້ເປີດນຳໃຊ້ຂະບວນລົດໄຟໂດຍສານສາກົນ ເປັນຕົ້ນມາ, ການຂີ່ລົດໄຟຈາກນະຄອນຄຸນໝິງ ແຕ່ເຊົ້າ ຈະສາມາດເດີນທາງໄປເຖິງນະຄອນຫຼວງວຽງຈັນ ໃນຕອນບ່າຍ ຊຶ່ງໄດ້ອຳນວຍຄວາມສະດວກຫຼາຍກວ່າເກົ່າ ໃຫ້ແກ່ຊາວໜຸ່ມລາວທີ່ມາຮຽນ ຫຼື ເຮັດວຽກຢູ່ຈີນ.
ນາງ ສູໄຫຮວາ ນັກສຶກສາລາວ ທີ່ມາຈາກນະຄອນຫຼວງວຽງຈັນ ເຫັນວ່າ: ທາງລົດໄຟລາວ-ຈີນ ໄດ້ນຳເອົາການປ່ຽນແປງອັນໃຫຍ່ຫຼວງມາໃຫ້ແກ່ຊີວິດຂອງຕົນ, ນາງ ເວົ້າວ່າ: ແຕ່ກ່ອນ, ຂ້ອຍ ແລະ ໝູ່ຮ່ວມຮຽນຂອງຂ້ອຍ ຕ້ອງອອກເດີນທາງຈາກນະຄອນຫຼວງວຽງຈັນ ແຕ່ 8 ໂມງເຊົ້າ, ຂີ່ລົດໂດຍສານຫຼາຍສິບຊົ່ວໂມງ, ຈຶ່ງສາມາດເດີນທາງໄປເຖິງນະຄອນຜູເອີ ແຂວງຢຸນນານ ໃນເວລາປະມານ 7 ໂມງແລງຂອງມື້ທີ 2, ແຕ່ປັດຈຸບັນ, ຂີ່ລົດໄຟແມ່ນໃຊ້ເວລາພຽງ 8 ຊົ່ວໂມງກໍຮອດ.
ນາງ ໂຈ່ວວານຈິ່ນ ນັກສຶກສາລາວ ທີ່ຫາກໍ່ຮຽນຈົບຈາກວິທະຍາໄລຜູເອີ ໃນປີກາຍ, ໃນຂະນະ ທີ່ນັກສຶກສາສ່ວນຫຼາຍ ຫາກໍ່ຮຽນຈົບຈາກມະຫາວິທະຍາໄລ ແມ່ນມີຄວາມຫຍຸ້ງຍາກໃນການຊອກຫາວຽກເຮັດງານທຳ, ແຕ່ ນາງ ສາມາດຊອກໄດ້ວຽກເຮັດງານທຳ ຍ້ອນໄດ້ກຳໂອກາດຂອງຍຸກສະໄໝ.
ນາງ ໂຈ່ວວານຈິ່ນ ທີ່ຮຽນຂະແໜງວິຊາບັນຊີ ຢູ່ວິທະຍາໄລຜູເອີ ໄດ້ຍຶດໝັ້ນຄວາມຝັນຂອງຕົນມາໂດຍຕະຫຼອດ ແລະ ຕັ້ງໃຈຮຽນພາສາຈີນ ຢ່າງດຸໝັ່ນຂະຫຍັນພຽນ. ປັດຈຸບັນ, ນາງ ສາມາດເວົ້າພາສາຈີນ ໄດ້ຢ່າງລ່ຽນໄຫຼ, ນາງ ເວົ້າຕໍ່ນັກຂ່າວວ່າ: ຂ້ອຍໄດ້ໂອກາດເຮັດວຽກທີ່ດີ, ນັ້ນກໍຄື ຂ້ອຍຈະໄປເຮັດວຽກຢູ່ທະນາຄານອຸດສາຫະກຳການຄ້າຈີນ ຫຼື ICBC ສາຂານະຄອນຫຼວງວຽງຈັນ, ນີ້ແມ່ນໂອກາດເຮັດວຽກທີ່ຊາວໜຸ່ມທັງຫຼາຍຢາກໄດ້ເຊັ່ນກັນ.
ພາຍຫຼັງເປີດນຳໃຊ້ທາງລົດໄຟ ລາວ-ຈີນ, ຊາວໜຸ່ມລາວ ທີ່ຮຽນຕໍ່ຢູ່ຈີນ ກໍສາມາດຊອກພົບໂອກາດການຄ້າ. ໃນເວລາ ທ້າວ ວາງຈື້ເສິງ ທີ່ມາຈາກແຂວງຜົ້ງສາລີ ຮຽນຢູ່ວິທະຍາໄລຜູເອີ ໃນປີ 2019, ລາວ ໄດ້ສຳຜັດກັບສີມືປຸງແຕ່ງຊາຜູເອີ, ກໍເລີຍຕັດສິນໃຈຢາກນຳເອົາບົດຮຽນ ແລະ ແຜນການພັດທະນາອຸດສາຫະກຳຊາຂອງຈີນ ກັບເມືອບ້ານເກີດຂອງຕົນ ເພື່ອພັດທະນາອຸດສາຫະກຳຊາ ຢູ່ແຂວງຜົ້ງສາລີ ແລະ ຊຸກຍູ້ການພັດທະນາຂອງເສດຖະກິດທ້ອງຖິ່ນ.
ໃນໄລຍະຮຽນຢູ່ຈີນ, ທ້າວ ວາງຈື້ເສິງ ໄດ້ໄປທ່ຽວຕະຫຼາດຊາຫຼາຍແຫ່ງ, ໄດ້ໂຄສະນາເຜີຍແຜ່ໃບຊາຜົ້ງສາລີ ແລະ ຫວັງວ່າ ຈະສາມາດດຳເນີນການຮ່ວມມືກັບນັກທຸລະກິດຈີນ ໄດ້ດີກວ່າເກົ່າ. ລາວ ເວົ້າວ່າ: ແຂວງຜົ້ງສາລີ ແມ່ນແຫຼ່ງຜະລິດຊາທີ່ດີ, ຄ້າຍຄືກັບນະຄອນຜູເອີ ຂອງຈີນ. ພາຍຫຼັງຂ້ອຍມາຮອດນະຄອນຜູເອີແລ້ວ, ໄດ້ເຫັນໃບຊາຊະນິດຕ່າງໆ ແລະ ຍີ່ຫໍ້ຕ່າງໆ, ສີມືປຸງແຕ່ງຊາຢູ່ແຫ່ງນີ້ ກໍທັນສະໄໝຫຼາຍ ແລະ ມີບັນຍາກາດການຄ້າທີ່ເຂັ້ມຂຸ້ນ ຊຶ່ງເປັນສິ່ງທີ່ສົນໃຈເພື່ອໃຫ້ຂ້ອຍຖອດຖອນບົດຮຽນໄດ້ຫຼາຍ.
“ຂ້ອຍຢາກເສີມຂະຫຍາຍທ່າແຮງທີ່ຮຽນຢູ່ຈີນຂອງຕົນ ເພື່ອທຳການຄ້າຂາຍ ລະຫວ່າງ ຈີນ ແລະ ລາວ.” “ທິວທັດທຳມະຊາດຂອງບ້ານເກີດຂອງຂ້ອຍງາມຫຼາຍ, ຍັງມີອາຫານທີ່ແຊບຫຼາຍຢ່າງ, ຍິນດີຕ້ອນຮັບນັກທ່ອງທ່ຽວຈີນໄປທ່ຽວປະເທດລາວ.”
ນັກຂ່າວ: ບົວໃສ