“ເລື່ອງການເຕີບໃຫຍ່” ຂອງຜູ້ແທນສະພາປະຊາຊົນ ທີ່ເກີດຫຼັງປີ 1990
ໃນລະຫວ່າງວັນທີ 23 -28 ມັງກອນນີ້, ແຂວງຢູນນານໄດ້ດໍາເນີນ “ກອງປະຊຸມສອງສະພາ” (ກອງປະຊຸມສອງສະພາແມ່ນຊື່ຫຍໍ້ຂອງສະພາປະຊາຊົນແຫ່ງຊາດຈີນ ແລະ ສະພາປຶກສາການເມືອງປະຊາຊົນຈີນ). ກອງປະຊຸມສອງສະພາແຂວງຢູນນານປີນີ້, ແມ່ນກອງປະຊຸມ ຄັ້ງທີ 2 ຂອງສະພາປະຊາຊົນ ແຂວງຢູນນານ ສະໄໝທີ 14 ແລະ ກອງປະຊຸມຄັ້ງທີ 2 ສະໄໝທີ 13 ຂອງສະພາປຶກສາການເມືອງປະຊາຊົນແຂວງຢູນນານ.
ກອງປະຊຸມສອງສະພາ ເປັນເຫດການສຳຄັນໃນຊີວິດການເມືອງ ຂອງປະຊາຊົນບັນດາເຜົ່າໃນແຂວງຢູນນານ. ສໍາລັບກອງປະຊຸມສອງສະພາແຂວງຢູນນານປີນີ້, ມີຜູ້ແທນສະພາປະຊາຊົນຊຸດໜຶ່ງທີ່ເກີດຫຼັງປີ 1990 ຫຼື ຫຼັງປີ 1995 ໄດ້ດຶງດູດຄວາມສົນໃຈຈາກຄົນທັງຫຼາຍເປັນຢ່າງຍິ່ງ, ມື້ນີ້, ພວກເຮົາມາ ຮັບຟັງເລື່ອງການເຕີບໃຫຍ່ຂອງຜູ້ແທນສະພາປະຊາຊົນທີ່ເກີດຫຼັງປີ 1990 ນຳກັນ.
ນາງ ຫົງຈື້ເຫວີນ ຜູ້ແທນສະພາປະຊາຊົນແຂວງຢູນນານ: ເຮັດໃຫ້ປະຊາຊົນຊົມໃຊ້ການບໍລິການສາທາລະນະສຸກ ທີ່ຍຸຕິທຳ ແລະ ເຂົ້າເຖິງໄດ້ຫຼາຍກວ່າເກົ່າ
ນັບແຕ່ການດຳລົງຕຳແໜ່ງເປັນເວລາໜຶ່ງປີມານີ້, ນາງ ຫົງຈື້ເຫວີນ ທີ່ເປັນຜູ້ແທນສະພາປະຊາຊົນເກີດຫຼັງປີ 1990 ທີ່ມາຈາກລະບົບສາທາລະນະສຸກຂອງເຂດເມືອງເກົ່ານະຄອນລີ້ຈ່ຽງ ແຂວງຢູນນານ ໄດ້ພະຍາຍາມຢ່າງໃຫຍ່ຫຼວງ ໃນດ້ານການຮໍ່າຮຽນ, ການທັດສະນະສຶກສາ ແລະການຄົ້ນຄວ້າ, ນາງ ກໍໄດ້ກຽມພ້ອມໃນການປະກອບຄຳສະເໜີທີ່ດີຕໍ່ກອງປະຊຸມສອງສະພາແຂວງຢູນນານປີນີ້.
“ຕົວຢ່າງ, ຂ້າພະເຈົ້າສັງເກດເຫັນວ່າ ແຂວງຢູນນານຕັ້ງຢູ່ໃນເຂດພູດອຍທີ່ສູງຈາກໜ້ານ້ຳທະເລ ຊຶ່ງເກີດມີ ພະຍາດຊຳເຮື້ອຫຼາຍຊະນິດເຊັ່ນ: ຄວາມດັນເລືອດສູງ ເປັນຕົ້ນ ໄດ້ເກີດຂຶ້ນເປັນຈຳນວນຫຼວງຫຼາຍ, ແຕ່ຄົນເຈັບທີ່ເປັນພະຍາດຊຳເຮື້ອຂອງແຂວງຢູນນານຫຼາຍຄົນ ແມ່ນມີຄວາມແຕກຕ່າງກັບຄົນເຈັບແຂວງອື່ນໆໃນລັກສະນະການຍອມກິນຢາ (ການກິນຢາຕາມການແນະນຳຂອງແພດໝໍ ຫຼື ການກິນຢາຕາມແຜນ) ຍ້ອນໄດ້ພິຈາລະນາເຖິງເງື່ອນໄຂທາງເສດຖະກິດ ຫຼື ດ້ານອື່ນໆ.” ນາງ ຫົງຈື້ເຫວີນ ກ່າວວ່າ:“ ພວກເຮົາຫວັງວ່າ ຈະປະຕິບັດມາດຕະການແຈກຢາໃຫ້ຄົນເຈັບຫຼາຍກວ່າເກົ່າ ໂດຍບໍ່ເກັບຄ່າ ໃຫ້ແກ່ຄົນເຈັບທີ່ເປັນພະຍາດຊໍາເຮື້ອຕ່າງໆເຊັ່ນ: ພະຍາດເບົາຫວານ ແລະ ພະຍາດຄວາມດັນເລືອດສູງ.”
ໃນອະນາຄົດ, ນາງ ຫົງຈື້ເຫວີນ ຫວັງວ່າ ຈະສາມາດປະກອບສ່ວນກຳລັງວັງຊາຂອງຕົນ ໃນຄວາມເປັນໄວໜຸ່ມ ເຂົ້າໃນການກໍ່ສ້າງຢູນນານທີ່ມີສຸຂະພາບແຂງແຮງ, ເພື່ອໃຫ້ປະຊາຊົນສາມາດຊົມໃຊ້ການບໍລິການດ້ານສາທາລະນະສຸກທີ່ຍຸຕິທຳ ແລະ ເຂົ້າເຖິງໄດ້ນັບມື້ຫຼາຍຂຶ້ນ. “ພ້ອມດຽວກັນນັ້ນ, ຂ້າພະເຈົ້າຍັງຫວັງວ່າ ຈະມີໂອກາດປະກອບຄວາມເຫັນໃຫ້ຫຼາຍກວ່າເກົ່າ ເພື່ອກຸ່ມຄົນຕ່າງໆ.”
ທ່ານ ຫຼີຊົນຫຼີນ ຜູ້ແທນສະພາປະຊາຊົນແຂວງຢູນນານ: ເລັ່ງການກໍ່ສ້າງຊົນນະບົດທີ່ກົມກຽວ ແລະ ສວຍງາມ
ທ່ານ ຫຼີຊົນຫຼີນ, ເກີດ ປີ 1995, ເປັນຮອງຫົວໜ້າ ໜ່ວຍການຜະລິດໂລຫະປະສົມຂອງພະແນກພາລະກິດໂລຫະປະສົມ ບໍລິສັດອາລູມິນຽມ ຢີຊິນ ເມືອງເຮີ້ຊິ້ງ ກິ່ງແຂວງປົກຄອງຕົນເອງເຜົ່າປາຍຕ້າຫຼີແຂວງຢູນນານ, ຕົ້ນຕໍຮັບຜິດຊອບການຄວບຄຸມຄຸນນະພາບຂອງເຕັກນິກຫຼໍ່ຫຼອມໂລຫະປະສົມອາລູມິນຽມ, ການສ້າງທີມງານມາດຕະຖານ ແລະວຽກງານອື່ນໆທີ່ກ່ຽວຂ້ອງ, ຍັງໄດ້ເຂົ້າຮ່ວມການປັບປຸງລະບຽບການດ້ານເຕັກນິກ, ການຄຸ້ມຄອງອຸປະກອນ, ການດັດສ້າງ ແລະ ອື່ນໆ, ໄດ້ເຮັດວຽກຢູ່ແຖວໜ້າຂອງການຜະລິດມາໂດຍຕະຫຼອດ.
ໃນໜຶ່ງປີທີ່ຜ່ານມາ, ທ່ານ ຫຼີຊົນຫຼີນ ໄດ້ເກັບກຳຄຳເຫັນຂອງປະຊາຊົນ ໂດຍຜ່ານການສຳຫຼວດຄົ້ນຄວ້າເທື່ອແລ້ວເທື່ອອີກ, ໄດ້ເດີນທາງໄປເຖິງແຫ່ງຕ່າງໆໃນຕົວເມືອງ ແລະ ຊົນນະບົດ. ໃນໄລຍະການສຳຫຼວດຄົ້ນຄວ້າ, ທ່ານ ໄດ້ໄປຢ້ຽມຢາມຜົນງານຫຼາຍຢ່າງ ໃນການກໍ່ສ້າງຊົນນະບົດທີ່ສວຍງາມ ແລະ ໄດ້ຖອດຖອນບົດຮຽນຫຼາຍຢ່າງ. ນອກນີ້,ທ່ານ ຍັງໄດ້ພົບເຫັນວ່າ: ເມືອງເຮີ້ຊິ້ງ ທີ່ຕັ້ງຢູ່ທິດຕາເວັນຕົກສ່ຽງ ເໜືອຂອງແຂວງຢູນນານ ຍັງມີຫຼາຍບັນຫາທີ່ຍັງແກ້ໄຂບໍ່ຕົກເຊັ່ນ: ສະພາບແວດລ້ອມໃນບ້ານບໍ່ສະອາດ, ບໍ່ມີຄວາມເປັນລະບຽບຮຽບຮ້ອຍ ແລະ ພັດທະນາບໍ່ໄດ້ດີປານໃດ ເນື່ອງຈາກວ່າພື້ນຖານໂຄງລ່າງຂອງຊົນນະບົດທ້ອງຖິ່ນຍັງອ່ອນແອຫຼາຍ.
ຕໍ່ເລື່ອງນີ້, ໃນກອງປະຊຸມສອງສະພາແຂວງຢູນນານປີນີ້, ທ່ານ ຫຼີຊົນຫຼີນ ໄດ້ສຸມໃສ່ບັນຫາການປັບປຸງສະພາບແວດລ້ອມການດຳລົງຊີວິດຢູ່ຊົນນະບົດໃຫ້ດີຂຶ້ນ. ທ່ານ ຫຼີຊົນຫຼີນສະເໜີໃຫ້ເມືອງເຮີ້ຊິ້ງ ຊຸກຍູ້ວຽກງານຈຸດທົດລອງເພື່ອປັບປຸງສະພາບແວດລ້ອມການດຳລົງຊີວິດຢູ່ຊົນນະບົດໃຫ້ດີຂຶ້ນ, ເລັ່ງລັດປັບປຸງສະພາບແວດລ້ອມດຳລົງຊີວິດຢູ່ຊົນນະບົດ, ຍົກລະດັບການປັບປຸງສະພາບແວດລ້ອມການດຳລົງຊີວິດຢູ່ຊົນນະບົດທົ່ວເມືອງໃຫ້ສູງຂຶ້ນ, ສົ່ງເສີມການພັດທະນາແບບເຊື່ອມໂຍງເຂົ້າກັນ ລະຫວ່າງ ຕົວເມືອງແລະ ຊົນນະບົດ, ເລັ່ງລັດການກໍ່ສ້າງຊົນນະບົດທີ່ມີສະພາບແວດລ້ອມການດຳລົງຊີວິດທີ່ດີ, ມີສະພາບແວດລ້ອມປະກອບອາຊີບທີ່ດີ, ກົມກຽວກັນ ແລະ ສວຍງາມ.
ນາງ ຫຼີເຈີ້ງຈີ ຜູ້ແທນສະພາປະຊາຊົນແຂວງຢູນນານ: ຫວັງວ່າສາມາດເຮັດແທ້ທຳຈິງຫຼາຍກວ່າເກົ່າ ເພື່ອປະຊາຊົນ
ມີສາຍຕາທີ່ສົດໄສ ແລະ ມີຮອຍຍິ້ມທີ່ໜ້າຮັກ, ນາງ ຫຼີເຈີ້ງຈີ ເວົ້າດ້ວຍຄວາມໝັ້ນໃຈ.
ນາງ ຫຼີເຈີ້ງຈີ, ເກີດ ປີ 1990, ເປັນຫົວໜ້າໜ່ວຍຕຸລາການ ຕາແສງແຢວເຈີ ຫ້ອງການຕຸລາການ ເມືອງຊີວເປີຍກິ່ງແຂວງປົກຄອງຕົນເອງເຜົ່າຈ້ວງ-ເຜົ່າມົ້ງເຫວີນຊານ ແຂວງຢູນນານ. ພາຍຫຼັງໄດ້ຮັບເລືອກຕັ້ງເປັນຜູ້ແທນສະພາປະຊາຊົນເປັນເວລາ 1 ປີມານີ້, ນາງ ໄດ້ໃຊ້ໂອກາດໄກ່ເກ່ຍຂໍ້ຂັດແຍ່ງໃນການເຮັດວຽກ ແລະ ການຢ້ຽມຢາມບັນດາຄອບຄົວ ເພື່ອລົງເລິກ ຊອກຮູ້ຄວາມຕ້ອງການ ແລະ ຄວາມຫຍຸ້ງຍາກຂອງປະຊາຊົນ. ໃນເວລາຫວ່າງ, ນາງ ຍັງສືບຕໍ່ສຶກສາກົດໝາຍ ແລະ ກົດລະບຽບທີ່ກ່ຽວຂ້ອງກັບການປະຕິບັດໜ້າທີ່ຂອງຜູ້ແທນປະຊາຊົນ ເພື່ອສ້າງພື້ນຖານຄວາມຮູ້ຂອງຕົນໃຫ້ອຸດົມສົມບູນ. ນາງ ຍັງຈະໃຊ້ໂອກາດການທັດສະນະສຶກສາ ແລະ ການຄົ້ນຄວ້າຮ່ວມກັນ ເພື່ອຖອດຖອນບົດຮຽນນຳຜູ້ແທນປະຊາຊົນທີ່ມີປະສົບການ.
ນາງ ຫຼີເຈີ້ງຈີ ທີ່ເຮັດວຽກຢູ່ຂັ້ນຮາກຖານເປັນເວລາຫຼາຍປີ, ນາງ ໄດ້ສະເໜີໃຫ້ສ້າງຄວາມເຂັ້ມແຂງ ແລະ ໝັ້ນຄົງໃຫ້ແກ່ກຳລັງຕຸລາການຂັ້ນຮາກຖານ. ພ້ອມດຽວກັນນັ້ນ, ລາວຍັງໄດ້ປຸກລະດົມຄວາມຫ້າວຫັນຂອງຜູ້ໄກ່ເກ່ຍປະຊາຊົນ ແລະ ສົ່ງເສີມບົດບາດຂອງການໄກ່ເກ່ຍປະຊາຊົນຢ່າງເຕັມທີ່.
ນາງ ຫຼີເຈີ້ງຈີ ກ່າວວ່າ: ໃນຖານະເປັນຜູ້ແທນສະພາປະຊາຊົນທີ່ເກີດຫຼັງປີ 1990, ຂ້າພະເຈົ້າ ຈະເກັບກຳຄວາມເຫັນຂອງປະຊາຊົນໃຫ້ຫຼາຍກວ່າເກົ່າ ໂດຍຕິດຕໍ່ພົວພັນກັບ ວຽກງານຂອງຕົນ, ຫວັງວ່າ ສາມາດສະເໜີຂໍ້ສະເໜີທີ່ມີຄຸນນະພາບສູງຫຼາຍກວ່າເກົ່າ ໃນການປະຕິບັດໜ້າທີ່ຂອງຕົນໃນຕໍ່ໄປ ແລະ ເຮັດແທ້ທຳຈິງຫຼາຍກວ່າເກົ່າ ເພື່ອປະຊາຊົນ.
ແຫຼ່ງຂ່າວ: ເວັບໄຊຢູນນານ, ຖະແຫຼງຂ່າວຢູນນານ, ຮູບພາບໂດຍ ຜູ້ຮັບສຳພາດ, ເວັບໄຊຢູນນານ