ທ່ານ ສີຈິ້ນຜິງ ເລີ່ມຢ້ຽມຢາມຟິລິບປິນທາງລັດຖະກິດ
ວັນທີ 20 ພະຈິກນີ້, ທ່ານ ສີຈິ້ນຜິງ ປະທານປະເທດຈີນ ໄດ້ເດີນທາງເຖິງນະຄອນຫຼວງມານີລາ ເລີ່ມຢ້ຽມຢາມສາທາລະນະລັດຟິລິບປິນທາງລັດຖະກິດ.
ທ່ານ ສີຈິ້ນຜິງ ໄດ້ຕາງໜ້າລັດຖະບານແລະປະຊາຊົນຈີນສະແດງຄວາມຢື້ຢາມຖາມຂ່າວດ້ວຍຄວາມຈິງໃຈແລະຄວາມອວຍພອນທີ່ຈົບງາມຕໍ່ລັດຖະບານແລະປະຊາຊົນຟິລິບປິນ. ທ່ານ ສີຈິ້ນຜິງ ກ່າວວ່າ: ຈີນແລະຟິລິບປິນແມ່ນປະເທດໃກ້ຄຽງທີ່ມີມິດຕະພາບຕໍ່ກັນທີ່ມີເຊື້ອສາຍໃກ້ກັນ ແລະມີວັດທະນະທຳຄ້າຍກັນ. ນັບແຕ່ທ່ານ ໂລດຣີໂກ ດູເຕີເຕ ປະທານາທິບໍດີຂຶ້ນກຳອຳນາດເປັນຕົ້ນມາ, ພາຍໃຕ້ຄວາມພະຍາຍາມຮ່ວມຂອງສອງຝ່າຍ, ການຮ່ວມມືດ້ວຍໄມຕີຈິດມິດຕະພາບລະຫວ່າງຈີນ-ຟິລິບປິນ ໄດ້ເປີດປະຕູຄືໃໝ່ ເຊິ່ງໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ ແລະເປັນການປະກອບສ່ວນອັນສຳຄັນເພື່ອສັນຕິພາບ, ສະຖຽນລະພາບ ແລະຄວາມຈະເລີນຮຸ່ງເຮືອງຂອງພາກພື້ນ. ຈີນແລະຟິລິບປິນລ້ວນແຕ່ແມ່ນປະເທດພວມພັດທະນາແລະກຸ່ມເສດຖະກິດທີ່ຈະເລີນໃໝ່ຢູ່ອາຊີ, ການທີ່ສອງປະເທດມີມິດຕະພາບຕໍ່ກັນນັ້ນ ແມ່ນທາງເລືອກທີ່ຖືກຕ້ອງພຽງເສັ້ນດຽວລະຫວ່າງສອງປະເທດ. ໃນໄລຍະຢ້ຽມຢາມ, ຂ້າພະເຈົ້າຫວັງວ່າຈະໄດ້ຮ່ວມກັບຜູ້ນຳຟິລິບປິນລົງເລິກແລກປ່ຽນຄວາມຄິດເຫັນກ່ຽວກັບການເພີ່ມທະວີສາຍພົວພັນສອງປະເທດພ້ອມດ້ວຍບັນຫາສາກົນແລະພາກພື້ນທີ່ສົນໃຈຮ່ວມກັນ. ເຊື່ອວ່າການຢ້ຽມຢາມຄັ້ງນີ້ ຍ່ອມຈະບັນລຸເປົ້າໝາຍທີ່ປັບປຸງມິດຕະພາບອັນເປັນມູນເຊື້ອ, ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະພັດທະນາຮ່ວມກັນ, ເພີ່ມພະລັງແຮງໃໝ່ເຂົ້າໃນການພົວພັນມິດຕະພາບທີ່ເປັນບ້ານໃກ້ເຮືອນຄຽງທີ່ດີຕໍ່ກັນລະຫວ່າງສອງປະເທດ ແລະສ້າງຄວາມສຸກໃຫ້ແກ່ປະຊາຊົນສອງປະເທດ.