ສະຫລອງວັນຊາດ ແລະ ວັນເກີດປະທານໄກສອນ ພົມວິຫານ ຢູ່ປັກກິ່ງ
(ວັນທີ 30 ພະຈິກ ສະຖານທູດ ສປປ ລາວປະຈຳ ສປ ຈີນໄດ້ຈັດພິທີສະຫຼອງວັນຊາດຄົບຮອບ 44 ປີ ແລະວັນເກີດທ່ານປະທານໄກສອນ ພົມວິຫານຄົບຮອບ 99 ປີ ໂດຍທ່ານນາງຄຳເພົາ ເອີນທະວັນ ເອກອັກຄະລັດຖະທູດລາວປະຈຳຈີນໄດ້ປະກອບຄຳເຫັນທີ່ສຳຄັນ)
ສະຖານເອກອັກຄະລັດຖະທູດ ສປປລາວ ປະຈຳນະຄອນຫລວງປັກກິ່ງ ສປ ຈີນໄດ້ຈັດພິທີສະຫລອງວັນຊາດ 2 ທັນວາຄົບຮອບ 44 ປີ ແລະ ວັນເກີດ ປະທານ ໄກສອນ ພົມວິຫານຄົບຮອບ 99 ປີ ຂື້ນຢູ່ສະໂມສອນຂອງຕົນໃນວັນທີ 30 ພະຈິກ 2019 ໂດຍການໃຫ້ກຽດເຂົ້າຮ່ວມຂອງທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດ ວິສາມັນຜູ້ມີອຳນາດ ເຕັມແຫ່ງ ສປປ ລາວ ປະຈຳ ສປ ຈີນ,ນອກນີ້ຍັງມີພະນັກງານສະຖານທູດ,ແຂກຖືກເຊີນ ແລະ ນັກສຶກສາທຸກລະດັບເຂົ້່າຮ່ວມຢ່າງພ້ອມພຽງ.
ໃນພິທີທີ່ມີຄວາມໝາຍສຳຄັນນີ້, ທ່ານ ນາງຄຳເພົາ ເອີນທະວັນໄດ້ ຂື້ນເລົ່າມູນເຊື້ອວັນສຳຄັນຂອງຊາດວ່າ: ປະທານ ໄກສອນ ພົມວິຫານ ເປັນຜູ້ນຳທີ່ຄົບເລົາຮັກຍ່ິງ,ເປັນວິລະບຸລຸດຂອງຊາດເຮົາ,ຊີວິດການເຄື່ອນໄຫວຂອງປະທານ ໄກສອນ ພົມວິຫານ ຕິດພັນກັບການປະຕິວັດຊາດ,ນຳພາພາລະກິດປົດປ່ອຍຊາດຢ່າງສຳເລັດຜົນ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຂື້ນໃນວັນທີ 2 ທັນວາ 1975 ເຊິ່ງແມ່ນໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ. ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫລະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ.ແມ່ນວັນທີ່ປະເທດລາວໄດ້ມີເອກະລາດຢ່າງສົມບູນ,ມີອະທິປະໄຕຢ່າງຄົບຖ້ວນ,ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆໃນເວທີປະຊາຄົມໂລກ.
ປະທານ ໄກສອນ ພົມວິຫານ ໄດ້ຕີລາຄາ ວັນຊາດທີ 2 ທັນວາ 1975 ດັ່ງນີ້: ບໍທັນມີເວລາໃດທີ່ປະຊາຊົນເຮົາ ເຊິ່ງເປັນຜູ້ສ້າງປະຫວັດສາດຂອງຊາດນັ້ນ ໄດ້ຍາດເອົາໄຊຊະນະສົມບູນ, ເຖິງຖອງ ແລະ ບໍລິບູນ ໄດ້ຢ່າງສະຫງ່າລາສີຄືແນວນີ້ຈັກເທື່ອ. ໄຊຊະນະນັ້ນ ບໍ່ສະເພາະແຕ່ໄດ້ຟື້ນຟູຄວາມເປັນເອກະລາດຂອງປະເທດເຮົາ, ຫາກຍັງເປັນຄັ້ງທຳອິດທີ່ປະຊາຊົນບັນດາເຜົ່າ ຜູ້ເຄີຍດຳລົງຊີວິດເປັນທາດ ໄດ້ກາຍມາເປັນເຈົ້າຂອງທີ່ແທ້ຈິງຂອງຊາດໜ່ຶງທີ່ມີເອກະລາດ,ມີອິດສະຫລະພາບຢ່າງສົມບູນ ແລະ ພວມກ້າວຂື້ນສັງຄົມນິຍົມ,ເຮັດໃຫ້ຄວາມມຸ້ງຫວັງອັນແຮງກ້າຂອງປວງຊົນລາວກໍຄືຂອງມວນມະນຸດປະກົດເປັນຈິງຢູ່ບົນຜືນແຜ່ນດິນອັນແສນຮັກຂອງພວກເຮົາ.
ທ່ານ ເອກອັກຄະລັດຖະທູດຍັງໄດ້ກ່າວເຖິງຜົນສຳເລັດໃນການປົກປັກຮັກສາ ແລະ ພັດທະນາປະເທດຊາດວ່າ: ນັບຈາກປະເທດຊາດໄດ້ຮັບການປົດປ່ອຍໃໝ່ ປະເທດເຮົາເກືອບວ່າເລີ່ມຈາກສູນໃນຫລາຍດ້ານເຊັ່ນ: ໃນປີ 1975 ຢູ່ ສປປລາວ ມີຄົນກືກໜັງສືກວມເອົາ 90% ຂອງພົນລະເມືອງ.ມາເຖິງປະຈຸບັນນີ້ພວກເຮົາມີມະຫາວິທະຍາໄລເຖິງ 5 ແຫ່ງ.
ໃນປີ 1976 ຜະລິດເຂົ້າໄດ້ທັງໝົດພຽງ 660 ພັນກວ່າໂຕນ,ສະມັດຕະພາບການຜະລິດມີພຽງ 1,26 ໂຕນຕໍ່ເຮັກຕາ,ໃນປີ 2014 ຜະລິດເຂົ້າໄດ້ 4 ລ້ານກວ່າໂຕນ,ສະມັດຕະພາບການຜະລິດ 4,18 ໂຕນຕໍ່ເຮັກຕາ.ປີ 2017 ຜະລິດເຂົ້າໄດ້ 4,27 ລ້ານໂຕນ.
ດ້ານພະລັງງານ: ພາຍຫລັງປົດປ່ອຍມີເຂື່ອນໄຟຟ້າພຽງ 1 ແຫ່ງ,ມາຮອດປີ 2017 ມີເຂື່ອນໄຟຟ້າທັງໝົດ 50 ກວ່າເຂື່ອນ.ຈຳນວນຄອບຄົວທີ່ໄດ້ໃຊ້ໄຟຟ້າແລ້ວກວມ 92,05% ຂອງຄອບຄົວທັງໝົດພາຍໃນປະເທດ. ນອກນີ້ທ່ານຍັງໄດ້ຍົກໃຫ້ເຫັນຜົນສຳເລັດດ້ານວຽກງານຄົມມະນາຄົມ, ດ້ານຖະແຫລງຂ່າວ ວັດທະນາທຳ ແລະ ທ່ອງທ່ຽວ ແລະ ດ້ານອື່ນໆກໍໄດ້ຮັບການພັດທະນາເປັນກ້າວໆ.
ພິທີສະເຫລີມສະຫລອງວັນສຳຄັນດັ່ງກ່າວໄດ້ສິ້ນສຸດລົງດ້ວຍການມອບຂັນລາງວັນປະເພດຕ່າງໆໃນການແຂ່ງຂັນກິລາເພື່ອຕ້ອນຮັບວັນຊາດທີ່ 2 ທັນວາຂອງນັກສຶກສານະຄອນຫລວງປັກກິ່ງ ແລະ ຊົມການສະແດງສິລະປະວັນນະຄະດີ ແລະ ອ່ານກາບກອນຂອງນັກສຶກສາຢ່າງເບີກບານມ່ວນຊື່ນ.