ຈີນຈັດພິທີໄວ້ອາໄລລະດັບຊາດເພື່ອສະແດງເຖິງຄວາມໄວ້ອາໄລຢ່າງສຸດຊຶ້ງຂອງປະຊາຊົນບັນດາເຜົ່າທົ່ວປະເທດຈີນທີ່ມີຕໍ່ຜູ້ເສຍສະຫຼະຊີວິດໃນການຕ້ານພະຍາດ COVID-19 ພ້ອມດ້ວຍພີ່ນ້ອງຮ່ວມຊາດທີ່ເສຍຊີວິດຈາກພະຍາດດັ່ງກ່າວ

2020-04-04 15:19:13 |ມາຈາກ: CRI

ເພື່ອສະແດງເຖິງຄວາມໄວ້ອາໄລຢ່າງສຸດຊຶ້ງຂອງປະຊາຊົນບັນດາເຜົ່າທົ່ວປະເທດຈີນທີ່ມີຕໍ່ຜູ້ເສຍສະຫຼະຊີວິດໃນການຕ້ານພະຍາດ COVID-19 ກໍຄືພີ່ນ້ອງຮ່ວມຊາດທີ່ເສຍຊີວິດຈາກພະຍາດດັ່ງກ່າວ, ພິທີໄວ້ອາໄລລະດັບຊາດໄດ້ຈັດຂຶ້ນໃນວັນທີ 4 ເມສາ 2020 ນີ້. ໃນໄລຍະນີ້, ທົ່ວປະເທດຈີນກໍຄືສະຖານທູດ,ສະຖານກົງສຸນຈີນປະຈຳຕ່າງປະເທດໃຫ້ຊັກທຸງຊາດລົງເຄິ່ງເສົາເພື່ອສະແດງຄວາມໄວ້ອາໄລ, ທົ່ວປະເທດງົດການບັນເທີງສາທາລະນະທຸກປະເພດ.ເລີ່ມແຕ່ ເວລາ 10 ໂມງຂອງວັນທີ 4 ເມສານີ້ເປັນຕົ້ນໄປ, ປະຊາຊົນທົ່ວປະເທໄດ້ພາກັນດຢືນກົ້ມຫົວໄວ້ອາໄລເປັນເວລາ 3 ນາທີ. ລົດຍົນບີບແກ,ລົດໄຟ,ເຮືອແລະກຳປັ່ນໄດ້ເປີດໂຫວດ, ເປີດສຽງເຕືອນໄພປ້ອງກັນທາງອາກາດ.

ຕອນເຊົ້າວັນທີ 4 ເມສານີ້, ຢູ່ສະໜາມຫຼວງທ່ຽນອ່ານເມີນນະຄອນຫຼວງປັກກິ່ງໄດ້ຈັດພິທີຊັກທຸງຊາດລົງເຄິ່ງເສົາ.

“ວິລະຊົນຜູ້ເສຍສະຫຼະຊີວິດ” ແມ່ນນາມມະຍົດສູງສຸດທີ່ຈີນມອບໃຫ້ແກ່ພົນລະເມືອງຈີນທີ່ເສຍສະຫຼະຊີວິດຢ່າງກ້າຫານເພື່ອປະເທດຊາດ ສັງຄົມ ແລະ ປະຊາຊົນ. ກ່ອນໜ້ານີ້, ອົງການປົກຄອງແຂວງຫູເປີຍໄດ້ກຳນົດໃຫ້ຜູ້ປະຕິບັດງານທີ່ເສຍສະຫຼະຊີວິດຢູ່ແນວໜ້າໃນການຕ້ານພະຍາດ COVID -19ຈຳນວນ 14 ທ່ານເປັນວິລະຊົນຜູ້ເສຍສະຫຼະຊີວິດຊຸດທຳອິດ. ໃນຈຳນວນນັ້ນມີພະນັກງານການແພດທີ່ເຂົ້າຮ່ວມວຽກງານປິ່ນປົວຢູ່ແນວໜ້າ, ມີຕຳຫຼວດທີ່ຍຶດໝັ້ນປະຈຳການຢູ່ແນວໜ້າເພື່ອປ້ອງກັນ ແລະ ຄວບຄຸມພະຍາດ, ມີພະນັກງານເຂດຊຸມຊົນທີ່ຊ່ວຍເຫຼືອແກ້ໄຂຄວາມຫຍຸ້ງຍາກໃຫ້ປະຊາຊົນທີ່ພົບຄວາມຫຍຸ້ງຍາກດ້ວຍຄວາມຈິງໃຈ. ປະຊາຊົນຈີນຂະໜານນາມໃຫ້ພວກເພິ່ນວ່າ “ຜູ້ທີ່ໜ້າຮັກທີ່ສຸດໃນຍຸກໃໝ່, ນ້ຳໃຈສູງສົ່ງຂອງພວກເພິ່ນໝັ້ນຍືນ!”

ນັບມາຮອດເວລາ 24 ໂມງຂອງວັນທີ 3 ເມສານີ້, ຢູ່ແຜ່ນດິນໃຫຍ່ຈີນມີ 3326 ຄົນເສຍຊີວິດຍ້ອນເປັນພະຍາດCOVID -19. ຕາມສະຖິຕິທີ່ບໍ່ຄົບຖ້ວນ, ນັບມາຮອດປະຈຸບັນ, ມີພະນັກງານການແພດ ຢ່າງໜ້ອຍ 46 ຄົນໄດ້ສະຫຼະຊີວິດໃນວຽກງານປ້ອງກັນ ແລະ ຄວບຄຸມພະຍາດ. ໃນເວລາ 2 ເດືອນປາຍມານີ້, ຢູ່ແຂວງຫູເປີຍມີພະນັກງານການແພດທີ່ຕໍ່ສູ້ຢູ່ແນວໜ້າ 1500 ກວ່າຄົນໄດ້ຕິດເຊື້ອພະຍາດ, ພະນັກງານການແພດຫຼາຍໝື່ນຄົນ ໄດ້ເດີນທາງໄປຊ່ວຍເຫຼືອນະຄອນອູຮັ້ນ, ຫຼື ເຝົ້າປະຈຳການຢູ່ທ້ອງຖິ່ນຕົນ, ປະກອບສ່ວນເຂົ້າໃນການຕໍ່ສູ້ຕ້ານພະຍາດ ແລະ ຊ່ວຍກອບກູ້ຊີວິດຢ່າງອົງອາດກ້າຫານ.