ການເຈລະຈາເສດຖະກິດການຄ້າລະຫວ່າງຈີນ-ອາເມຣິກາໃກ້ຈະສຳເລັດ ຄວນສືບຕໍ່ເປີດກວ້າງຜົນປະໂຫຍດຮ່ວມ
ຄວນເວົ້າວ່າ,ການເຈລະຈາເສດຖະກິດການຄ້າລະຫວ່າງຈີນ-ອາເມຣິກາໄດ້ຮັບຄວາມຄືບໜ້າທີ່ເປັນຮູບປະທຳ ແມ່ນປາສະຈາກຄວາມພະຍາຍາມຂອງສອງຝ່າຍໃນການເປີດກວ້າງຜົນປະໂຫຍດຮ່ວມກັນນັ້ນບໍ່ໄດ້.ໝາກຜົນຂອງການເຈລະຈາຄັ້ງນີ້ຕົ້ນຕໍກວມເຖິງບັນຫາຄວາມດຸ່ນດ່ຽງດ້ານການຄ້າແລະບັນຫາໂຄງປະກອບ.ໃນນັ້ນກ່ຽວກັບບັນຫາຄວາມດຸ່ນດ່ຽງດ້ານການຄ້າ,ຈີນຈະເປີດກວ້າງການນຳເຂົ້າຜະລິດຕະພັນກະສິກຳ,ຜະລິດຕະພັນພະລັງງານ,ຜະລິດຕະພັນການບໍລິການແລະອື່ນໆຈາກອາເມຣິກາ,ບໍ່ພຽງແຕ່ມີຜົນດີຕໍ່ການແກ້ໄຂຄວາມສົນໃຈຂອງອາເມຣິກາຕໍ່ການຂາດດຸນການຄ້າສິນຄ້າປະເພດຈັບຕ້ອງໄດ້ລະຫວ່າງສອງປະເທດເທົ່ານັ້ນ,ແຕ່ຍັງມີຜົນດີຕໍ່ການຕອບສະໜອງຄວາມຕ້ອງການຂອງປະຊາຊົນປະເທດຕົນທີ່ມີຕໍ່ຊີວິດການເປັນຢູ່ທີ່ສວຍສົດງົດງາມ,ທັງຊ່ວຍຊຸກຍູ້ການຍົກລະດັບໂຄງປະກອບຂອງອຸດສາຫະກຳພາຍໃນປະເທດອີກດ້ວຍ.
ເມື່ອຍົກຜະລິດຕະພັນກະສິກຳມາເປັນຕົວຢ່າງ,ເອກະສານເລກ 1 ທີ່ສູນກາງພັກກອມມູນິດແລະລັດຖະບານຈີນເຜີຍແຜ່ໃນອາທິດແລ້ວນີ້ໄດ້ສະເໜີໃຫ້ເປີດກວ້າງການນຳເຂົ້າຜະລິດຕະພັນກະສິກຳທີ່ຂາດເຂີນພາຍໃນປະເທດຢ່າງເປັນເຈົ້າການແລະເພີ່ມຊ່ອງທາງນຳເຂົ້າໃນຂະນະທີ່ເນັ້ນໃສ່ການຮັບປະກັນຄວາມປອດໄພດ້ານສະບຽງອາຫານ. ປີ 2018, ຄວາມຂັດແຍ້ງກັນດ້ານເສດຖະກິດການຄ້າລະຫວ່າງຈີນ-ອາເມຣິກາມີຄວາມຮຸນແຮງຂຶ້ນຈົນເຮັດໃຫ້ການຄ້າໝາກຖົ່ວເຫຼືອງລະຫວ່າງສອງຝ່າຍໄດ້ຮັບຜົນກະທົບ. ປັດຈຸບັນ, ສອງປະເທດໄດ້ມີຄວາມພະຍາຍາມຮ່ວມກັນເພື່ອແກ້ໄຂບັນຫາ,ຈີນເພີ່ມການນຳເຂົ້າໝາກຖົ່ວເຫຼືອງຈາກອາເມຣິກາຢ່າງເໝາະສົມ,ກໍ່ເປັນເລື່ອງທີ່ເປັນໄປຕາມສະພາບເຫດການ.